U praviadzieńni vypusknych ekzamienaŭ u škołach u hetym hodzie ničoha nie źmianiajecca, a vypusknyja viečary ŭsio hetak ža zabaroniena pravodzić dzie-niebudź, akramia škoł, pry hetym jany nie abyducca biez napaminaŭ pra Hod histaryčnaj pamiaci.
Na pres-kanfierencyi ŭ paniadziełak pradstaŭniki Ministerstva adukacyi raspaviali pra toje, kali i jak projduć apošnija zvanki, ekzamieny i vypusknyja ŭ Biełarusi, piša Zerkalo.io.
Apošni zvanok
Va ŭsich škołach krainy jon pryznačany na paniadziełak, 30 maja. Pry hetym 27 maja ŭ Maładziečnie projdzie Respublikanski apošni zvanok, na jaki źbiaruć 1,5 tysiačy junakoŭ i dziaŭčat z usich rehijonaŭ. Vypuskniki projduć kałonaj pa horadzie, uskładuć kvietki da manumienta Pieramohi, zatym u Ladovym pałacy adbudziecca cyrymonija ŭznaharodžańnia najlepšych vypusknikoŭ i «moładzievaja dyskateka z udziełam papularnych vykanaŭcaŭ», raskazała kansultant upraŭleńnia sacyjalnaj, vychavaŭčaj i ideałahičnaj raboty ministerstva adukacyi Łarysa Jemialjančyk.
Vypusknyja ispyty
Sioleta i forma praviadzieńnia ispytaŭ, i ich śpis jašče zastajucca takimi ž, jak raniej. Projduć jany z 1 pa 9 červienia.
Dzieviacikłaśniki buduć zdavać ruskuju i biełaruskuju movy ŭ formie dyktoŭki (praciahłaść ekzamienu — hadzina) i kantrolnuju pracu pa matematycy (praciahłaść — čatyry hadziny). Ekzamieny projduć 2, 7 i 9 červienia.
Adzinaccacikłaśniki zdajuć čatyry ekzamieny: heta biełaruskaja ci ruskaja mova (pa vybary) u formie pierakazu, kantrolnaja rabota pa matematycy, vusnyja ekzamieny pa historyi Biełarusi i zamiežnaj movie. Na pierakaz dajecca čatyry hadziny, na kantrolnuju — piać, na padrychtoŭku adkazu pa bilecie — 30 chvilin. Piśmovyja ekzamieny buduć prachodzić 1, 3 albo 6 červienia.
Jak i raniej, zadańni piśmovych ekzamienaŭ abvieściać pa telebačańni. U adzin dzień moža być tolki adzin ispyt.
Vypusknyja viečary
Jany pryznačanyja va ŭsioj krainie na adzin dzień — 10 červienia. Pravodzić śviatkavańnie, paviedamiła Łarysa Jemialjančyk, pa-raniejšamu možna tolki va ŭstanovach adukacyi, u vyklučnych vypadkach — va ŭstanovach dadatkovaj adukacyi dziaciej i moładzi abo ŭstanovach kultury. U nazvanych ramkach čas i miesca praviadzieńnia śviata vyznačaje kiraŭnictva škoły z baćkoŭskim kamitetam pa ŭzhadnieńni ź miascovymi vykankamami.
— My nie vitajem praviadzieńnie školnaha mierapryjemstva dzie-niebudź u restaranie, ahrasiadzibie i inšych miescach. Zahadam vyrazna skazana ab miescy praviadzieńnia vypusknoha viečara. Hetaja ŭstanova adukacyi, — padkreśliła kansultant Ministerstva.
Havorka idzie pra sakavicki zahad viedamstva, dzie ŭžo prapisanyja ŭsie pytańni praviadzieńnia vypusknych.
— Rehłamientavany i źmiest scenaryjaŭ vypusknych viečaroŭ, apošniaha zvanka, jakija pavinny ŭ abaviazkovym paradku ŭklučać i mierapryjemstvy, pryśviečanyja hodu histaryčnaj pamiaci, — raspaviała Jemialjančyk.
U dzień apošnich zvankoŭ i vypusknych viečaroŭ praktyčna va ŭsich rehijonach Biełarusi zabaronieny prodaž ałkaholu. Abmiežavańni ŭvodziacca z 8.00 30 maja da 8.00 31maja i z 8.00 10 červienia da 8.00 11 červienia. Ale zabarona nie poŭnaja — možna kupić ałkahol na raźliŭ u kaviarniach, stałovych, restaranach.
Kamientary