«Mieduza»: Na fonie nastupleńnia ŭ Danbasie ŭ Maskvie znoŭ stali dumać pra šturm Kijeva
Rasijskija vojski praciahvajuć nastupać na Danbasie i dabivajucca tam peŭnych pośpiechaŭ. Jak śćviardžajuć krynicy «Mieduzy», niahledziačy na toje, što vyniki rasijskaj armii vidavočna nie adpaviadajuć pieršapačatkovym płanam Maskvy, u Kramli znoŭ abmiarkoŭvajuć mahčymy šturm Kijeva — i navat spadziajucca na poŭnamaštabnuju pieramohu ŭ vajnie.
Va ŭnutrypalityčnym błoku Administracyi prezidenta Rasii — na fonie prasoŭvańnia rasijskich vojskaŭ u Danbasie — znoŭ paŭstała nadzieja, što Maskva moža za niekalki miesiacaŭ «davieści vajnu va Ukrainie da pieramohi». Pra heta «Mieduzie» raskazali dźvie krynicy, blizkija da Kramla, i adzin surazmoŭca niepasredna ŭ AP.
«Prahramaj-minimum» dla «abjaŭleńnia pieramohi» Kreml u kancy maja 2022 hoda ličyć uziaćcie rasijskimi vojskami pad kantrol usioj terytoryi Danieckaj i Łuhanskaj abłaściej. U cełym rasijanie nablizilisia da hetaha vyniku: zaraz pad kantrolem Ukrainy zastajecca kala 5% terytoryi Łuhanskaj vobłaści i krychu bolš za 40% Danieckaj.
«Prahramaj-maksimum» pa-raniejšamu nazyvajecca ŭziaćcie pad kantrol Kijeva. Choć raniejšaje nastupleńnie rasijskich vojskaŭ na stalicu Ukrainy skončyłasia pravałam, pa słovach surazmoŭcaŭ «Mieduzy» u Kramli, vyšejšaje kiraŭnictva Rasiei pa-raniejšamu nie admoviłasia ad hetaj mety.
«My ŭsio roŭna ich [ukraincaŭ] dakałupajem. Chutčej za ŭsio, da vosieni ŭžo ŭsio skončycca», — miarkuje adna z krynic «Mieduzy».
Pa słovach surazmoŭcaŭ «Mieduzy», padobnyja nastroi raspaŭsiudžanyja nie tolki ŭ Kramli, ale i ŭ kiraŭnictvie «Adzinaj Rasii». Sakratar hienieralnaha savieta partyi Andrej Turčak rehularna vyjazdžaje ŭ Danbas i navat pastaviŭ rasijski ściah na administracyi pasiołka ŭ Zaparožskaj vobłaści, zaniataha rasijskimi vajskoŭcami.
Naviedaŭ Danbas i kiraŭnik palityčnaha błoka Kramla Siarhiej Kiryjenka. Mienavita jon ciapier kuryruje samaabvieščanyja «DNR» i «ŁNR» — i, pa źviestkach «Mieduzy», viadzie padrychtoŭku refierendumaŭ ab ich dałučeńni da Rasii. Uvarvańnie va Ukrainu Kiryjenka publična nazyvaje «baraćboj z nacyzmam i fašyzmam».
Jak ciapier aceńvajuć pierśpiektyvy nastupleńnia na Kijeŭ u kiraŭnictvie Minabarony RF, surazmoŭcam «Mieduzy» nieviadoma. Jak pisałasia raniej, užo ŭ kancy sakavika 2022 hoda rasijskaje vajskovaje kiraŭnictva kančatkova źmiryłasia, što Kijeŭ nie atrymajecca «ŭziać małoj kryvioju» — heta značyć siłami, užo zadziejničanymi ŭ «śpiecapieracyi».
Surazmoŭcy «Mieduzy» śviedčać, što ŭ hetym sensie ŭ rasijskaha kiraŭnictva zastajecca prastora dla manieŭru: naprykład, na vajnu mohuć być masava adpraŭlenyja vajskoŭcy terminovaj słužby.
Paviedamleńni ab udziele i hibieli vajskoŭcaŭ terminovaj słužby źjaŭlajucca z pačatku ŭvarvańnia, ale, pa dadzienych vajskovych ekśpiertaŭ, heta davoli redkaja źjava.
«Pakul vajujuć u asnoŭnym kantraktniki. Ich chapaje dla adnosna pavolnaha prasoŭvańnia [pa Ukrainie]. Ale kali ruchacca treba budzie chutčej, možna zadziejničać vajskoŭcaŭ terminovaj słužby. Heta ŭsio roŭna armija», — razvažaje blizkaja da AP krynica «Mieduzy».
I dadaje, što ŭsieahulnaj mabilizacyi ŭ Rasii čakać nie varta: u Kramli bajacca iści na taki krok, bo jon moža ŭdaryć pa rejtynhu uładaŭ i asabista Pucina.
Akramia taho, u Kramli sumniajucca, što zachodnija krainy praciahnuć maštabna padtrymlivać Ukrainu finansami i ŭzbrajeńniem, kali vajna zaciahniecca.
«Rana ci pozna Jeŭropie nadakučyć dapamahać — heta i hrošy, i vytvorčaść zbroi, jakaja samim patrebnaja. Bližej da vosieni treba budzie damaŭlacca [z Rasijaj] pa hazie i nafcie da aciaplalnaha siezona», — pieraličvaje arhumienty adzin z surazmoŭcaŭ «Mieduzy».
«Ciapier zdajecca, što na froncie mała što adbyvajecca. Što rasijskaja armija biare niejkija druhasnyja nasielenyja punkty. Što ŭ jaje jość niejkija prablemy. Ale heta adčuvańnie stvarajecca tamu, što ŭkraincy adrazu nie zdalisia, jak mnohija dumali.
Tak, blickryhu nie atrymałasia, bačnyja niejkija praliki. Ale heta nie aznačaje, što pieramohu atrymać nie ŭdasca», — farmuluje adzin ź blizkich da AP surazmoŭcaŭ «Mieduzy».
«Resursaŭ u Rasii zaviedama bolš, [čym u Ukrainy biez padtrymki Zachadu]», — dadaje jašče adzin.
Publičnaja rytoryka pra mety Rasii ŭ hetaj vajnie zastajecca vielmi šyrokaj dla interpretacyj. U Minabarony RF dahetul kažuć, što hałoŭnaja zadača «śpiecapieracyi» — «vyzvaleńnie Danbasa», choć rasijskija vojski ŭžo zamacavalisia ŭ Chiersonskaj i Zaparožskaj abłaściach. Ukaz ab sproščanym nadańni rasijskaha hramadzianstva žycharam hetych rehijonaŭ taksama padpisany.
Sam Pucin na paradzie 9 maja ŭ čarhovy raz zajaviŭ, što «ŭsie namiečanyja płany vykonvajucca» i «vynik budzie dasiahnuty», — ale nie patłumačyŭ, što kankretna jon maje na ŭvazie. Raniej jon nazyvaŭ metaj Rasiei «demilitaryzacyju» i «dienacyfikacyju» Ukrainy — što b heta ni značyła.
Ciapier čytajuć
Analityk Hienštaba, jaki malavaŭ kartu «adkul rychtavałasia napadzieńnie», apynuŭsia ŭ SIZA KDB za pracu na ŭkrainskuju raźviedku5
Kamientary