Kamandzir na mianušku «Jura Unitaz». Rasijskija bieśpiłotnyja vojski moža ŭznačalić były handlar santechnikaj

Rasija aficyjna zaviaršyła farmavańnie novaha rodu vojskaŭ — vojskaŭ bieśpiłotnych sistem, adnak imia ich kiraŭnika dahetul trymajecca ŭ sakrecie. Tym nie mienš, rasijskija błohiery i krynicy Ruskaj słužby Bi-bi-si adnahałosna śćviardžajuć, što kamandziram pryznačany Juryj Vahanaŭ — biznesoviec z padmaskoŭnaj Elektrastali, jaki da vajny nie mieŭ nijakaha dačynieńnia da vojska.

Hetaje pryznačeńnie vyklikała sapraŭdny šał siarod prychilnikaŭ uvarvańnia.

Vahanaŭ atrymaŭ šyrokuju viadomaść u vuzkich kołach pad źnievažalnaj mianuškaj «Jura Unitaz». Jak patłumačyŭ padčas svajho strymu z-błohier, kapitan 3‑ha ranhu ŭ zapasie Maksim Klimaŭ, takaja nazva prykleiłasia da biznesmena tamu, što da pačatku poŭnamaštabnaha ŭvarvańnia toj handlavaŭ santechnikaj i nie mieŭ navat bazavaj vajskovaj adukacyi.

Sa słoŭ Klimava, paśla pačatku vajny Vahanaŭ «staŭ manapalistam u pytańni pastaŭki FPV rasijskim vojskam», vykarystoŭvajučy administracyjny resurs i suviazi ŭ Ministerstvie abarony.

Łohiku takoha kadravaha rašeńnia krynicy VVS apisvajuć praz pryzmu kamiercyjnych intaresaŭ vyšejšaha kiraŭnictva.

Adzin z surazmoŭcaŭ vydańnia paraŭnaŭ Vahanava sa sprytnym dziejačam pry vysokim načalniku, jaki «ŭmieje nakryvać na stoł i palić łaźniu», a tamu i «kiruje finansavymi patokami».

Pryznačeńnie čałavieka, jaki nie źjaŭlajecca vajskovym prafiesijanałam, na klučavuju pasadu ŭ sučasnaj vajnie mnohija ŭsprymajuć jak demanstratyŭnaje ihnaravańnie bajavych patreb dziela zarobku. Vajskovy instruktar Śviatasłaŭ Holikaŭ krytyčna prakamientavaŭ hetuju navinu, zajaviŭšy, što poviaź Vahanava z vysokimi čynoŭnikami Minabarony — heta historyja «tolki pra kamiercyju», a nie pra raźvićcio technałohij ci skaračeńnie strat na froncie.

Da vajny Vahanaŭ kiravaŭ drobnymi firmami handlu budmateryjałami i raźviadzieńnia ptuški, a ŭ 2022 hodzie pačaŭ aktyŭna vazić humanitarnuju dapamohu na Danbas, dzie pastupova naładziŭ vytvorčaść dronaŭ «Sudapłataŭ».

Niahledziačy na adsutnaść dośviedu, jaho karjera raźvivałasia imkliva: u kastryčniku 2025 hoda patryjarch Kirył uznaharodziŭ jaho ordenam, pradstaviŭšy pry hetym jak padpałkoŭnika i daradcu namieśnika ministra abarony. 

Pryznačeńnie Vahanava nazyvajuć adkazam ukrainskamu kamandziru siłami bieśpiłotnych sistem Robiertu Broŭdzi («Madźjaru»), ale adkazam «banalnym i vulharnym».

U składzie Uzbrojenych Sił Ukrainy svaje siły bieśpiłotnych sistem byli stvoranyja na zahad Uładzimira Zialenskaha raniej, čym da hetaha dajšli ŭ Rasii — jašče ŭ lutym 2024 hoda. Ich pieršym kamandziram staŭ uradženiec Zakarpackaj vobłaści, vienhr pa pachodžańni Robiert Broŭdzi, viadomy pad pazyŭnym «Madźjar». Za čatyry hady vajny Broŭdzi vyras ad kamandzira nievialikaha atrada da kamandzira asobnym rodam vojskaŭ, atrymaŭ hodnaść Hieroja Ukrainy i pahony majora.

Kali pryznačeńnie Vahanava paćvierdzicca aficyjna, jon pavinien budzie atrymać hienieralskija pahony.

• 4
• 0
• 5
• 0
• 2
• 0
• 0
• 0