Čatyry niezvyčajnyja recepty, jakija nie daduć prapaści višniam pad kaniec siezonu

Višni — nie tolki smačnyja, ale i vielmi kaštoŭnyja jahady. Jany źjaŭlajucca skarbnicaj takich vitaminaŭ, jak S, A, Je i K, a taksama źmiaščajuć folijevuju kisłatu, kalij, kalcyj, žaleza, fosfar i mahnij. Tamu ich varta jeści nie tolki letam.

Ale jak heta zrabić? Zastajecca pryhatavać ź ich prysmaki, jakija zachavajucca na doŭhi čas.

Marynavanyja višni

Inhredyjenty:

• Kiłahram ćviordych, śpiełych višań z čarankami,
• 3—4 sušanyja hvaździki,
• duchmiany pierac,
• pałova čajnaj łyžki nasieńnia harčycy,
• niekalki tonkich łustačak imbiru,
• 250 mililitraŭ biełaha vina,
• 100 mililitraŭ biełaha vinnaha vocatu,
• try čverci šklanki cukru,
• dźvie stałovyja łyžki miodu,
• čajnaja łyžka soli,
• čajnaja łyžka ciortaj apielsinavaj cedry.

Hatavańnie:

1. Vymyjcie i vysušycie višni. Akuratna abrežcie čaranki, ale nie vydalajcie ich całkam.
2. Raskładzicie višni ŭ čystyja praparanyja słoiki.
3. Pakładzicie ŭsie śpiecyi ŭ kožny słoik razam ź imbiram.
4. Raźlicie pa słoikach haračy sirop, pryhatavany ź vina, vocatu, miodu, cukru, soli i apielsinavaj cedry. Dla hetaha prosta źmiašajcie ich u kastruli i daviadzicie da kipieńnia.
5. Paśla ščylna zakrucicie słoiki i kipiacicie ich u vadzie kala 20 chvilin u vialikaj kastruli. Heta ich prasterylizuje.

Marynavanyja višni možna jeści prykładna praz dva tydni.

Višniovy sous dla barbiekiu

Inhredyjenty:

• dźvie stałovyja łyžki aliŭkavaha aleju,
• sałodkaja cybula, narezanaja kubikami,
• dva zubki časnaku, raścisnutyja ŭ časnočnym presie,
• dva kubki ciomnych višań biez kostačak,
• kubak kietčupu,
• dźvie traciny kubka karyčnievaha cukru,
• tracina kubka balzamičnaha vocatu,
• stałovaja łyžka vusterskaha sousu, kali majecie pad rukoj (možna zamianić balzamičnym vocatam),
• dźvie čajnyja łyžki harčycy,
• pałova čajnaj łyžki čornaha piercu.

Hatavańnie:

1. Nahrejcie aliŭkavy alej na siarednim ahni ŭ vialiki rondali. Dadajcie cybulu i smažcie kala piaci chvilin. Paśla dadajcie časnok i trymajcie na ahni jašče chvilinu.
2. Dadajcie višni, kietčup, cukar, balzamičny vocat, vusterski sous i pierac da cybuli i časnaku. Daviadzicie ŭsie da kipieńnia. Ciapier pamienšycie ahoń i hatujcie kala dziesiaci chvilin.
3. Źmiašajcie ŭsio da stanu pasty, jakuju paśla tušycie na pavolnym ahni jašče 10 chvilin.

Višniovy kanficiur

Inhredyjenty:

• paŭkiło višań,
• kiłahram cukru,
• limon,
• 50 mł vady.

Hatavańnie:

1. Pamyjcie višni i rukami vyciśnicie ź ich sok. Dadajcie tudy vadu z cukram.
2. Daviadzicie da kipieńnia, pastajanna pamiešvajučy.
3. Dadajcie płady višań, ź jakich vy vycisnuli sok, i varycie na pavolnym ahni kala paŭhadziny. Nie zabyvajcie pastajanna pamiešvać. Dajcie sumiesi astyć.
4. Pačakajcie try ci čatyry hadziny, a paśla znoŭ varycie ŭsio na praciahu prykładna 10 chvilin. Adstaŭcie sumieś na noč.
5. Ranicaj dadajcie ŭ vareńnie sok cełaha limona. Znoŭ varycie, pamiešvajučy, kala 25 chvilin.
6. Haračy džem raskładzicie ŭ słoiki i pasteryzujcie na praciahu vaśmi chvilin u ščylna zakrytych słoikach.

Višniovaje vareńnie

Inhredyjenty:

• dva kiłahramy višań,
• sok čatyroch limonaŭ,
• cedra dvuch limonaŭ,
• try kubki cukru.

Hatavańnie:

1. Pramyjcie višni i dastańcie ź ich kostki, paśla razrežcie ich napałovu. Narežcie adnu z pałovaŭ na drobnyja kavałački.
2. Pakładzicie višni ŭ rondal. Dadajcie sok i cedru limonaŭ. Źmiašajcie ŭsie i pastaŭcie rondal na siaredni ahoń.
3. Kali vy ŭbačycie, što višni puścili sok, źmiašajcie ŭsio i pamienšycie ahoń. Nakryjcie rondal i tušycie na praciahu 20 chvilin.
4. Dadajcie cukar i staranna ŭsie źmiašajcie. Hatujcie jašče siem chvilin biez nakryŭki.
5. Pierakładzicie vareńnie ŭ słoiki i pasteryzujcie kala 20 chvilin.

• 8
• 0
• 3
• 3
• 1
• 0
• 1
• 0