«U aŭtobusie byli dzieci i navat taksa». Pasažyry rejsa Minsk — Varšava praviali noč na zapraŭcy pad Baranavičami
Pasažyry aŭtobusnaha rejsa Minsk — Varšava kampanii Intercars praviali noč na zapraŭcy pad Baranavičami. Aŭtobus złamaŭsia nieŭzabavie paśla vyjezdu, a padmienny nie pryjechaŭ. Pakul kiroŭcy jeździli ŭ Baranavičy ramantavać aŭtobus, ludzi načavali chto jak na AZS.
Pasažyry raspaviali www.abw.by, što aŭtobus adpraviŭsia z aŭtavakzała «Centralny» ŭ Minsku svoječasova, 25 žniŭnia ŭ 21:05. U 6:05 na nastupny dzień jon pavinien byŭ prybyć na aŭtavakzał «Zachodni» ŭ Varšavie. Ale nie byŭ.
Pieršy techničny prypynak vadzicieli zrabili ŭžo na 15-j chvilinie rejsa, na praśpiekcie Dziaržynskaha ŭ Minsku.
«Jechali, dźmuła haračaje pavietra, u sałonie było jak u duchavoj šafie. My — piražki», — žartuje pasažyr aŭtobusa Maryja.
Pryblizna ŭ 23:00 aŭtobus spyniŭsia praz pałomku ŭžo na trasie. Tut pasažyry zatrymalisia na paŭtary hadziny.
Potym aŭtobus padastyŭ, ludziej advieźli na bližejšuju zapraŭku niedaloka ad Baranavičaŭ.
Kiroŭcy skazali: «Łopnuŭ šłanh sistemy achaładžeńnia ruchavika».
Siem čałaviek udałosia pasadzić na aŭtobus, jaki prajazdžaŭ mima, da Varšavy. Astatnim skazali čakać da 8 ranicy, a aŭtobus pajedzie na ramont. Padmiennaha transpartu nie było.
«Na zapraŭcy dzieci lehli na łavački, astatnija stajali hadzinaŭ šeść, usiu noč. Ranicaj kiroŭca adtelefanavaŭsia, što adramantavaŭsia. U 6:20 aŭtobus narešcie viarnuŭsia pa nas. Da hetaha času niekatoryja ludzi zjechali ŭ Minsk, inšyja ŭziali taksi da Bresta», — praciahvaje Maryja.
«Dobra, my nikudy asabliva nie śpiašajemsia: u Varšavie biarem aŭto naprakat i jedziem pa Jeŭropie. Ale ŭ ludziej byli kvitki na samaloty, jany spaźnialisia na rejsy! U nas uźnikali dumki viarnucca ŭ Minsk pa svaju mašynu. U aŭtobusie byli dzieci i navat taksa — jana trymałasia małajcom», — raspaviała pasažyrka.
Sa šmathadzinnym spaźnieńniem aŭtobus taki prybyŭ na miažu ŭ punkt propusku «Brest».
Tam padarožnikaŭ čakaŭ jašče adzin fors-mažor: afarmleńnie transpartu było spynienaje praz aŭtamabil Kia z pradmietam, padobnym da vybuchovaha prystasavańnia, pad dniščam.
«I nichto nie ździviŭsia. Ci ŭ ludziej pierahareli niervy, ci ŭžo stała ŭsio roŭna», — raspaviadaje Maryja.
U kampanii «Interkars» karespandentu «Aŭtabiźniesu» adkazali, što pasažyry mohuć pisać pretenzii na elektronnuju poštu kampanii, paśla buduć prymacca tyja ci inšyja rašeńni.
Heta ŭžo druhaja historyja z aŭtobusami Intercars za miesiac. U lipieni dziaŭčynu źniali z rejsa Varšava — Minsk i jaje ž abvinavacili ŭ niapilnaści.
Čytajcie taksama:
Dziaŭčynu źniali z rejsa Varšava — Minsk. Sama vinavataja?
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii18
Kamientary
časam takoje zdarajecca. heta fors-mažor.
tak my adnojčy zanačavali na aŭtavakzale ŭ Krasnapierakopsku (heta było daŭno - zadoŭha da 14-ha). zatoje praz taki niespadziavany prypynak daznalisia, što ŭ Krasnapierakopsku taki ž bydanak rynka, jak naša Kamaroŭka, tolki ŭ 3 razy mieńšy. ranicaj aŭtobus šče nie byŭ hatovy, i my pajšli paznajomicca z vakolicami. i voś pabačyli taki da bolu znajomy budynak. Kamaroŭka kłanavałasia)