Ściapan Łatypaŭ: Pra čałavieka prosta pastupova zabyvajuć, niby chavajučy žyŭcom
Praź ścieny turmy prabiłasia krychu infarmacyi pra toje, jak pravodzić dni ŭ źniavoleńni palitviazień Ściapan Łatypaŭ, asudžany na 8,5 hadoŭ źniavoleńnia i adpraŭleny ŭ kałoniju №22 «Vaŭčynyja nory» ŭ Ivacevickim rajonie. Žyćcio ŭ jaho ciažkaje: hety hordy čałaviek pa-raniejšamu nie skarajecca, za što pastajanna traplaje ŭ ŠIZA. A taksama jamu amal nie pieradajuć listy, z-za čaho jon dumaje, što pra jaho na voli ŭžo i zabylisia.
U apošnim liście, jaki dajšoŭ ad jaho na volu, Ściapan piša:
«Pravieŭ 17 dzion u ŠIZA, dzie razvažaŭ pra tlennaje i zajmaŭsia sportam kožnuju noč. Ciapier u PKT, tut tempieratura vyšejšaja i dajuć koŭdry. Pju smačnuju harbatu i kavu, časam z małakom — raściraju suchoje ŭ kubku.
Ceny rastuć: na limit u 32 rubli za miesiac atrymlivajecca kupić usio mienš i mienš. Na hety miesiac płanuju karobku suchoha małaka 400 h, słoik padsałodžvalniku i 1 kh samych tannych cukierak. Pakul jość harbata, kava — heta daje mahčymaść raznastaić mieniu.
Čytaju knihi, časopisy. «Zahadkavuju historyju Biendžamina Batana» Ficdžeralda. Padpisaŭsia na 15 vydańniaŭ, ale ich nie prynieśli i pałovy, prasiŭ baćku telefanavać na poštu, razabracca. Jon hetuju spravu ŭmieje i lubić. Listy taksama amal nie prychodziać: mahčyma, ludzi stamilisia pisać. U hetym i sutnaść vialikich terminaŭ źniavoleńnia: pra čałavieka prosta pastupova zabyvajuć, niby chavajučy žyŭcom. Užo źmiryŭsia i staŭlusia da hetaha z humaram, u niečym tak praściej».
Siabry Łatypava paviedamili, što niadaŭna jon u kałonii hłytaŭ lazo i rezaŭ vienu na ruce, pratestujučy suprać niezakonnych dziejańniaŭ administracyi ŭ adnosinach da viaźniaŭ.
Jahony pratest vyklikała niezakonnaje abmiežavańnie pierapiski. Było tak, što Ściapan za miesiac nie atrymaŭ anivodnaha lista, navat ad blizkich svajakoŭ. Dy i da siabroŭ i znajomych Ściapana na praciahu bolš čym 7 miesiacaŭ dachodziać tolki adzinkavyja pasłańni.
Mienavita za hetyja demanstratyŭnyja ŭčynki Ściapana i pakarali 17 sutkami ŠIZA, jakija jon adsiedzieŭ u žniŭni i zhadvaje ŭ svaim liście. A listavańnie ź im dahetul nie palepšyłasia.
Na 15 vieraśnia pryznačany sud z nahody pieravodu Ściapana ŭ inšuju papraŭčuju ŭstanovu. Vidać pa ŭsim, jaho adpraviać u krytuju turmu na termin da 3 hadoŭ.
Ciapier čytajuć
Polšča pryznała Alaksandra Mašenskaha niepažadanaj asobaj1
Kamientary