Źmieńvać panelnyja damy pryvatnyja zabudoŭščyki pačali dosyć daŭno. Potym i «dziaržaŭnyja» padciahnulisia: u «śviečkach» i «ścienach» pavialičylisia vokny, źjavilisia jeŭrapłaniroŭki, miescy ahulnaha karystańnia stali jarkimi i «vietłymi», a fasady — zapaminalnymi. Dobryja i pravilnyja źmieny. Adnak UKB Zavodskaha rajona pajšoŭ jašče dalej: svaje panelki zabudoŭščyk vyrašyŭ «zachamieleonić» pad stalinki. Što atrymałasia z hetaj zadumy, piša Onliner.by.
Niezvyčajnaja budoŭla razharnułasia vosieńniu minułaha hoda ŭ miežach vulic Kłumava — Stachanaŭskaj — Čabatarova — Ščarbakova. Sučasnyja damy pryjšli na źmienu paślavajennym dvuchpaviarchovikam. Try hmachi, zakryty dvor, ubudavanyja parkovačnyja miescy. Takim pavinien byŭ na vychadzie atrymacca kvartał dla majučych patrebu ŭ palapšeńni žyllovych umoŭ (i tolki dla ich — zvyčajnych dolščykaŭ u hetuju budoŭlu nie zvali).
Ale pryciahnuła ŭsieahulnuju ŭvahu, viadoma, nie heta. Novyja damy abiacali zrabić takimi, kab jany nie vybivalisia z ahulnaj architekturnaj karciny, sfarmiravanaj jašče ŭ kancy 40-ch — pačatku 50-ch. Kancept paznačyli tak: «u styli Partyzanskaha prajekta stalinskaha pieryjadu».
Zrešty, pry prahladzie rendaru ničoha nie było zrazumieła: damy i damy.
Varta addać UKB i Mapidu naležnaje: siamipaviarchoviki raśli jak na draždžach, tolki paśpiavaj vypuskać prajektnyja dekłaracyi i zaklučać damovy. Darečy, za mietr u novabudoŭlach prasili prykładna $695 i $1045 pa kursie (za narmatyŭnuju i zvyšnarmatyŭnuju płošču adpaviedna).
I voś vyšynnyja damy amal hatovyja. «Viadziecca praca pa ŭvodzie ŭ ekspłuatacyju», — tłumačać va upraŭleńni kapitalnaha budaŭnictva.
Što ž, upryhožvańniaŭ nie paškadavali: «lapnina» prapisałasia na ŭsich fasadach — fryzy abdymajuć šmatpaviarchoviki na niekalkich uzroŭniach. Koleram i šmatstupiennym «plintusam» abyhrali pierachod da dachu. Vokny atačajuć minimalistyčnyja karnizy.
Źviarnicie ŭvahu na terasu, jakaja atrymałasia za košt styłabata-parkoŭki! Hetaja terytoryja pavinna stać miescam adpačynku minčan, jakija pabudavali kvatery ŭ ŽK. Tut tabie i mini-kałony, i balustrada, i cahlany mur. Kolki fota dla Instagram budzie zroblena na hetaj terasie, navat ujavić składana. Praŭda, mohuć uźniknuć i kanflikty: žycharam pieršaha paviercha, vokny jakich vychodziać prosta na terasu, naŭrad ci spadabajecca, kali tak chtości ŭvieś čas budzie hulać-hudzieć.
Charakterna, što sami fasadnyja plity dekaravany pad kamień. Ale usiudyisnyja švy, viadoma, vydajuć panelnaje pachodžańnie.
Treci dom, jaki pavinien zamknuć kampazicyju i ŭtvaryć zakryty dvor, pakul jašče nie ŭziali ŭ pracu. Na jaho miescy znachodzicca budaŭničy haradok. Tak što da dobraŭparadkavańnia ahulnaj terytoryi jašče nie prystupali. Ale, vidavočna, pabudavany jon budzie ŭ tym ža styli, što i pieršyncy.
Ciapier čytajuć
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2222
Kamientary