Zaviaščańnie karalevy Vialikabrytanii Lizaviety II nie stanie zdabytkam publičnaści, jaho zapiačatajuć i začyniać u siejfie minimum na 90 hadoŭ. Pra heta piša Reuters.
Praktyka zapiačatvańnia zaviaščańniaŭ pamierłych členaŭ karaleŭskaj siamji biare svoj pačatak z 1910 hoda. Bolš za 30 ź ich ciapier zachoŭvajucca ŭ siejfie ŭ nieviadomym miescy ŭ Łondanie pad nahladam sudździ.
Paśla śmierci starejšaha člena karaleŭskaj siamji vykanaŭca zaviaščańnia źviartajecca da staršyni adździeła siamiejnych spraŭ Viarchoŭnaha suda Łondana z prośbaj zapiačatać zaviaščańnie.
Hetyja padrabiaznaści byli nieviadomyja śvietu da taho času, pakul u krasaviku 2021 hoda nie pamior muž karalevy, prync Filip. Tady sudździ Endru Makfarlejnu pryjšłosia razhladać zajavu ab zapiačatvańni jaho zaviaščańnia. Sudździa pastanaviŭ, što zaviaščańnie sapraŭdy pavinna być zmacavana piačatkaj, ale vyrašyŭ apublikavać svajo rašeńnie, kab dać hramadskaści choć niejkaje razumieńnie taho, što adbyvajecca i čamu.
«Stupień ahałošvańnia, jakuju, vierahodna, pryciahnie publikacyja, była b vielmi vialikaj i całkam supiarečyła b mecie zachavańnia hodnaści suvierena», — napisaŭ jon, dadaŭšy, što heta nieabchodna dla taho, kab manarch moh vykonvać svaju kanstytucyjnuju rolu.
Zaviaščańnie pamierłaj karalevy budzie zachoŭvacca ŭ siejfie razam z zaviaščańniem jaje muža, a taksama jaje maci Lizaviety i siastry pryncesy Marharet, jakija pamierli ŭ 2002 hodzie.
Pachavańnie Lizaviety II adbudziecca 19 vieraśnia.
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii18
Kamientary