Ad 27 kastryčnika nabyvaje moc novaja redakcyja pravił darožnaha ruchu z šeraham zaŭvažnych źmien dla kiroŭcaŭ, piešachodaŭ, ravarystaŭ, taksistaŭ. Pahladzieli na asnoŭnyja novaŭviadzieńni.
Vyznačylisia z elektrasamakatčykami
U novaj redakcyi PDR źjavicca termin «srodki indyvidualnaj mabilnaści (SIM)». Zhodna z praviłami, pad imi buduć razumiecca elektrasamakaty, hiraskutary, siehvei, monakoły dy inšyja padobnyja pryłady.
Jeździć na ich možna budzie pa viełasipiednaj darožcy, a pry jaje adsutnaści — pa tratuary, piešachodnaj darožcy albo abočynie. Maksimalnaja chutkaść takich devajsaŭ musić być nie bolšaja za 25 km/h. Čałaviek, jaki na ich pierasoŭvajecca, budzie ličycca piešachodam. Na elektrasamakatach i monakołach zabaraniajecca jeździć u stanie ałkaholnaha abo narkatyčnaha apjanieńnia.
Za miežami piešachodnych i žyłych zon jeździć na ich dazvolena tolki z 14 hadoŭ. Taksama zabaraniajecca pieravozka pasažyraŭ pa-za śpiecyjalna abstalavanymi miescami, praduhledžanymi kanstrukcyjaj samakataŭ, siehvejaŭ i inšych padobnych srodkaŭ. Pry ruchu ŭ ciomny čas na SIM musić być uklučany lichtaryk, a čałaviek na im abaviazany nasić flikier.
Źmienšycca kolkaść dakumientaŭ, jakija kiroŭca musić mieć pry sabie
Pačynajučy z 27 kastryčnika, kiroŭcy abaviazany mieć z saboju tolki dva dakumienty: paśviedčańnie kiroŭcy i paśviedčańnie ab rehistracyi transpartu. Pry hetym uładalniki ID-kartak majuć prava siadać za styrno, nie majučy pry sabie vadzicielskaha paśviedčańnia, u dadzienym vypadku pravy zamienić bijamietryčny dakumient, u jakim jość nieabchodnaja dla supracoŭnikaŭ DAI infarmacyja. Ale važna pamiatać, što termin dziejańnia ID-kartki i termin dziejańnia vadzicielskaha paśviedčańnia — heta roznyja rečy.
Mieć pry sabie strachoŭku spatrebicca ŭ tym vypadku, kali jana vydadziena tolki ŭ papiarovym varyjancie. Kali ž u elektronnym, to vazić z saboj papiarovy varyjant nie abaviazkova.
Nahadajem, što z 1 krasavika 2022 hoda była admieniena nieabchodnaść afarmleńnia tałona da paśviedčańnia kiroŭcy i siertyfikata ab prachodžańni dziaržtechahladu, pakolki ŭsia infarmacyja zachoŭvajecca ŭ bazach danych.
Pasažyra mohuć paprasić dychnuć u trubačku
Pa novych praviłach pasažyr abaviazany prajści ŭ vyznačanym paradku ahlad na pradmiet užyvańnia ałkaholu albo zabaronienych rečyvaŭ, bo ŭ KoAP zhadvajecca adkaznaść nie tolki dla kiroŭcaŭ i piešachodaŭ, ale i pasažyraŭ, u tym liku ŭ niećviarozym stanie.
Matacyklistam uvohule zabaroniać pieravozku niećviarozych pasažyraŭ, aproč vypadkaŭ, kali taki pasažyr budzie pieravozicca nie na samim matacykle, a ŭ bakavoj kalascy.
Uvodzicca zabarona pierasoŭvacca na matacykłach (a taksama na rovarach i SIM), nie trymajučysia rukami za rul.
Pryjemnyja źmieny čakajuć amataraŭ kvadracykłaŭ, śniehachodaŭ i motaŭsiudychodaŭ — im dazvolać udzielničać u darožnym ruchu, ale tolki pa darohach biez asfaltavaha pakryćcia. Nahadajem, što zimoj 2018 hoda amatarami takoho transpartu zacikaviŭsia Łukašenka. Tady jon patrabavaŭ žorstkaha pakarańnia dla «kruciakoŭ» na kvadracykłach i śniehachodach za jazdu pa sielhasuhodździach.
Što čakaje viełasipiedystaŭ?
Viełasipiedystam dazvolać nie śpiešvacca na piešachodnych pierachodach, dastatkova budie źnižać chutkaść i pierasiakać prajeznuju častku z chutkaściu piešachoda (5 km/h). Inšaje novaŭviadzieńnie — abaviazak mieć flikier pry jaździe ŭ ciomny čas sutak.
U novych praviłach udakładniać, što pieravaha ŭ ruchu ličycca pradastaŭlenaj, kali adlehłaść pamiž transpartam i piešachodam skłała nie mienš za dźvie pałasy ruchu (pry ich najaŭnaści).
Pavysiać maksimalnuju chutkaść
Da 120 km/h pavysiać limit chutkaści na aŭtamahistralach i darohach dla aŭtamabilaŭ dla lehkavych aŭto, matacykłaŭ i hruzavikoŭ masaj nie bolš za 3,5 t. Maksimalnuju chutkaść dla aŭtobusaŭ pavysiać da 100 km/h. Na astatnich zaharadnych darohach za miežami nasielenych punktaŭ dazvolenaja chutkaść i dalej zastajecca abmiežavanaj u 90 km/h.
Što jašče źmienicca z 27 kastryčnika?
Razam z novaj redakcyjaj zakona źjaviacca novyja darožnyja znaki i raźmietka. Znajšli adlustravańnie ŭ novych PDR i akcyi pa jaździe z uklučanymi farami abo dzionnymi śvietłavymi ahniami, jakija DAI štohod ładzili ŭ apošnija i pieršyja dni navučalnaha hoda. Ciapier u praviłach prapisana, što ŭ pieryjad z 25 maja pa 5 červienia i z 25 žniŭnia pa 5 vieraśnia padčas ruchu treba budzie ŭklučać śviatło.
Niekatoryja źmieny čakajuć i taksistaŭ. Ad 27 kastryčnika, jany majuć prava nie pryšpilvacca ramianiami biaśpieki ŭ miežach nasielenaha punktu tolki padčas pieravozki pasažyraŭ.
Elektramabilam dazvolać jeździć pa pałasie dla ruchu hramadskaha transpartu. Taksama zabaroniać stajanku na miescach dla zaradki elektratranspartu.
Pry ŭjeździe na kruhavoje skryžavańnie nie treba budzie ŭklučać sihnał pavarotu.
A jašče z 27 kastryčnika na zakanadaŭčym ŭzroŭni zabaroniać nie tolki razmaŭlać pa telefonie biez dadatkovych pryład, jakija dazvalajuć rabić heta biez ruk, ale i karystacca inšymi nie praduhledžanymi kanstrukcyjaj transpartnaha srodku pryładami, kali dla hetaha nieabchodna trymać ich u ruce albo ŭździejničać na ich rukoj.
Całkam aznajomicca z ŭsimi źmienami ŭ PDR možna pa spasyłcy.
Čytajcie taksama:
Rychtujem aŭtamabil da zimy. Paraŭnali ceny na novyja šyny ŭ Biełarusi, Polščy i Litvie
Kiraŭnik Akademii navuk raspavioŭ, kolki budzie kaštavać pieršy biełaruski elektramabil
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary