U kalekcyju ŭvachodziać huki staroj techniki, transpartu, daŭnich videahulniaŭ i nie tolki. Prajekt choča pryciahnuć uvahu da «źnikajučych hukavych łandšaftaŭ śvietu».
Vydańnie The Verge raspaviadaje pra novy niezvyčajny prajekt pad nazvaj Obsolete Sounds (u pierakładzie «Sastarełyja Huki»).
Heta novy prajekt, jaki, jak śćviardžaje jaho stvaralnik — arhanizacyja «Harady i pamiać» (Cities and Memory), — jość «samaj vialikaj u śviecie kalekcyjaj sastarełych i źnikajučych hukaŭ». Jon składajecca z bolš jak 150 hukaŭ, jakija stanoviacca ŭsio bolš redkimi: pačynajučy ad hukaŭ, jakija vykarystoŭvalisia ŭ starych videahulniach, i praciahvajučy zapisami staroha transpartu i vialikaj kolkaściu miechaničnych hukaŭ sastarełaha abstalavańnia.
Jość tam i huk staroha madema 56K, jaki «kryčaŭ» kožny raz, kali vy ŭvachodzili ŭ internet. Inšyja huki, jakija vy možacie znajści, uklučajuć kłasičny rynhton Nokia z madeli 5120, šumnaje stakata kručeńnia staroha ćviordaha dyska Seagate i nastrojku staroha anałahavaha radyjo.
Akramia samich hukaŭ, Cities and Memory taksama apublikavali remiksy kožnaha ź ich z kalekcyi ŭ bolš čym 150 muzykaŭ i saŭnd-artystaŭ. Jany stvoranyja, kab razvažać pra «ŭspaminy i pačućci, jakija vyklikajuć hetyja huki».
«Sastarełyja Huki» raspracavanyja, kab pryciahnuć uvahu da źnikajučych hukavych łandšaftaŭ śvietu, kab vyłučyć tyja huki, jakija varta zachavać, tamu što jany źjaŭlajucca častkaj našaj kalektyŭnaj kulturnaj spadčyny […]», — skazaŭ Ściuart Foŭks, zasnavalnik arhanizacyi «Harady i pamiać».
Ahułam arhanizacyja sabrała bolš za 5000 hukaŭ ad bolš jak 1000 vykanaŭcaŭ z usiaho śvietu, u tym liku ŭ ramkach papiaredniaha prajekta, jaki sprabavaŭ zapisać «huki łakdaŭnu» padčas pandemii COVID-19 — prajekt, kali akademičnyja daśledčyki i saŭnd-artysty sprabavali vykarystać łakdaŭny ŭ 2020 hodzie, kab zapisać huk ścichłych na niekatory čas haradoŭ. Padčas hetaha prajekta ludziam z usiaho śvietu prapanoŭvali dasyłać karotkija hukavyja zapisy sa svaich rajonaŭ.
Usio heta možacie pasłuchać pa hetaj spasyłcy.
Kamientary