Ministr abarony Ukrainy: Na pačatku studzienia Rasija i Biełaruś zakryjuć miežy, budzie mabilizacyja
«U vas zastaŭsia adzin tydzień. Na pačatku studzienia ŭłady zakryjuć miežy i pačnuć čarhovuju chvalu mabilizacyi», — źviarnuŭsia da rasijan Alaksiej Reźnikaŭ.
«Miežy buduć zakrytyja i ŭ Biełarusi», — papiaredziŭ Reźnikaŭ. Ën nie ŭdakładniŭ, budzie mabilizacyja pravodzicca taksama ŭ Biełarusi ci tolki ŭ Rasii.
«Za bojem kurantaŭ vy možacie nie pačuć stuk u dźviery — heta pastukaje vajenkam», — skazaŭ Reźnikaŭ.
Ministr abarony Ukrainy zaklikaŭ rasijan uchilacca ad mabilizacyi. Zvarot Reźnikava apublikavany na Youtube-kanale Ukrainian military TV.
Kiraŭnik Minabarony padkreśliŭ, što ŭ pieršuju čarhu jaho zvarot datyčyć žycharoŭ bujnych rasijskich haradoŭ.
«Ja dakładna viedaju, što ŭ vas zastaŭsia prykładna adzin tydzień, pakul jašče jość choć niejki vybar. Na pačatku studzienia rasijskija ŭłady zakryjuć miežy dla mužčyn, zatym abvieściać vajennaje stanovišča i pačnuć čarhovuju chvalu mabilizacyi. Miežy taksama buduć zakrytyja i ŭ Biełarusi», — skazaŭ Reźnikaŭ.
Ministr abarony Ukrainy zaklikaŭ rasijan adkazać na adno pytańnie: «Kali vy adpraviciesia na vajnu, dzie možacie zahinuć abo stać kalekaj na ŭsio astatniaje žyćcio, za što kankretna vy budziecie vajavać? Asabista vy».
Jon raspavioŭ pra straty, jakija paniesła armija RF za 10 miesiacaŭ, pra toje, što rasijskaja ŭłada jašče letam admaŭlała mahčymaść mabilizacyi, a ŭ pačatku vosieni praviała pieršuju chvalu.
Reźnikaŭ nahadaŭ rasijanam pra adpraŭku na vajnu dziasiatkaŭ tysiač źniavolenych, pra paŭhadavyja sproby ŭziać Bachmut.
«Kiraŭnictva Rasii ŭžo daŭno razumieje, što zaduma z vajnoj suprać Ukrainy abiarnułasia dla ich katastrofaj… Ale jany nie mohuć vam u hetym pryznacca», — skazaŭ rasijanam ministr abarony Ukrainy.
«Adzinaja pryčyna, dziela jakoj vas adpraviać na vajnu — kab vy abaranili złačyncaŭ, ich pałacy, ich bankaŭskija rachunki. I sami stali złačyncami», — skazaŭ Reźnikaŭ i dadaŭ, što tysiačy ruskich, mabilizavanych vosieńniu, užo zahinuli.
U Biełarusi apošnija miesiacy pravodzicca źvierka śpisaŭ vajskovaabaviazanych mužčyn. Ëść padstavy mierkavać, što adbyvajecca i prychavanaja mabilizacyja, praŭda, u nievialikich maštabach.
Kamientary