Zvolnienaha za antyvajennyja vykazvańni Dźmitryja Nazarava ŭ maskoŭskim teatry zamienić biełarus
Narodnaha artysta Rasii, zorku sieryjała «Kuchnia» i mnostva filmaŭ Dźmitryja Nazarava dniami zvolnili z rasijskaha MMT imia Čechava za antyvajennyja vykazvańni. Ciapier stała viadoma, što ŭ roli Vołanda ŭ śpiektakli «Majstar i Marharyta» jaho zamienić biełaruski akcior Anatol Kot.
Pra zvalnieńnie Nazarava i jaho žonki Volhi Vasiljevaj stała viadoma 14 studzienia, paśla taho, jak u jaho «adbyłasia razmova» z kiraŭnikom Maskoŭskaha mastackaha teatra imia Čechava Kanstancinam Chabienskim. Pierad hetym «Maskoŭski kamsamolec» pisaŭ, što Nazarava zvolnili z-za jahonych vykazvańniaŭ suprać vajny va Ukrainie i «antyrasijskich nastrojaŭ». Paśla 24 lutaha Nazaraŭ sapraŭdy publikavaŭ na svaim jutub-kanale roliki z antyvajennymi vieršami i pieśniami.
A ciapier z paviedamleńnia teatra stała viadoma, što «29 studzienia rolu Vołanda ŭ śpiektakli «Majstar i Marharyta» ŭpieršyniu vykanaje Anatol Kot».
Sam akcior hetuju navinu prakamientavaŭ tak: «Mahu tolki skazać, što padćviardžaju infarmacyju. Bolš mnie kamientavać pakul niama čaho».
49-hadovy Anatol Kot — biełarus, jaki z 2004 hoda žyvie i pracuje ŭ Maskvie. Da 2022 hoda jon słužyŭ u Maskoŭskim dramatyčnym teatry pad kiraŭnictvam Armiena Džyharchaniana, a nie tak daŭno pierajšoŭ u Teatr satyry.
U 2020 hodzie Kot u intervju radyjo «Svaboda» raiŭ usim biełaruskim milicyjantam, bajcam AMAPa i vajskoŭcam uvažliva pieračytać prysiahu. Na jaho dumku, hienierału, jaki addaje haniebnyja zahady chapać ludziej, jość što hublać — hrošy, uładu: «Ale ja vielmi spadziajusia, što chłopcy ŭ pahonach nie apyrskajuć siabie kryvioju svaich suhramadzian, kab potym nie było zanadta pozna. Tamu što jany nie vypjuć stolki harełki, kab zahłušyć reštki sumleńnia abo bol u sercy».
Akramia taho, Kot byŭ viadomy ŭ tym liku i pa rolach partyzana ŭ lehiendarnym biełaruskim filmie «Akupacyja. Misteryi» i hienierała biełaruskaj armii ŭ filmie «Žyvie Biełaruś!». Hetyja karciny ŭ siońniašniaj Biełarusi zabaronienyja.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary