Pradaviec «relikvij śviatoj Jeŭfrasińni» pradaje jašče i kresła Džordža Vašynhtona
Učora biełaruskich internaŭtaŭ uskałychnuła navina pra prodaž na internet-aŭkcyjonie nibyta relikvij śviatoj Jeŭfrasińni Połackaj, jakija pry bližejšym razhladzie mieli b być relikvijami paŭlehiendarnaj Paraskievy Połackaj, a kali detalova pahladzieli admysłoŭcy — dakumient, jaki mieŭ śćviardžać sapraŭdnaść relikvij, akazaŭsia falsifikatam. Jan Ramejka pahladzieŭ, što ž jašče pradaje hety handlar.
Akazałasia, što akaunt pradaŭca na aŭkcyjonie nazyvajecca saintsrelics — «śviatyja relikvii». Akaunt zarehistravany 12 śniežnia 2020 hoda ŭ Čarnahoryi. Sajt pakazvaje, što pradaviec maje 148 vodhukaŭ, pry hetym 100% vodhukaŭ za apošni hod — pazityŭnyja. Ciažka skazać, nakrutka heta ci handlar apraŭdaŭ čakańni pakupnikoŭ.
«Śviatyja relikvii dla prodažu manastyram, kaściołam i pryvatnym kalekcyjam», — rekłamuje jon svaju dziejnaść u šapcy staronki.
Akramia fejkavaj «śviatoj Jeŭfrasińni», pradaviec prapanuje «relikvii» śviatoha Franciška Asizskaha. Praŭda, nie srebny kaŭčeh z kostkami, a maleńki kavałačak kostki ŭ apravie. I — taksama z dakumientam nibyta ad biskupa, jaki paćviardžaje «sapraŭdnaść» relikvii.
Pra inšy kavałačak kostki handlar śćviardžaje, što jana naležyć śviatomu Janu Paŭłu II. I taksama padmacoŭvaje heta «biskupskim dakumientam».
Iraničnaj detallu źjaŭlajecca toje, što na «biskupskich hramatach» usiudy napisana na łacinie Nullo modo licere eas vendere — «Nie dazvalajecca pradavać ni ŭ jakim vypadku». Ale miescam vysyłki relikvij paznačany Vatykan. Vidać, kab dadać salidnaści.
Ale samym darahim łotam u handlara saintsrelics źjaŭlajecca draŭlanaje kresła, na jakim nibyta siadzieŭ pieršy prezident ZŠA Džordž Vašynhton.
Handlar i heta «paćviardžaje» dakumientam — praŭda, užo nie ad biskupa, a nibyta ad kiraŭnika łondanskaha aukcyjonnnaha doma Christie's. Kaštuje draŭlanaje kresła 28 tysiač dalaraŭ — niejak tanna, jak dla sapraŭdnaha kresła Vašynhtona.
Praŭda «miescam vysyłki» hetaha ekspanata paznačany nie Vatykan, a Ispanija.
Paśla prahladu składvajecca ŭražańnie, što my majem spravu z machlarom, jaki prapanuje fejkavyja «relikvii» davierlivym pakupnikam.
Čytajcie taksama:
«Moščy Jeŭfrasińni» — padrobka. Voś čamu
«Naša Niva» — bastyjon biełaruščyny
PADTRYMAĆCiapier čytajuć
Kiraŭnik Lidy zaklikaŭ siłavikoŭ nie spyniać palityčnych represij29
Kamientary