Biełaruś vyvodziać ź izalacyi nie prosta tak — Zianon Paźniak pra palityku Trampa

«2025 hod — heta taptańnie na miescy»

«Pucin nie choča miru i ni pry jakich umovach na hety mir nie pojdzie», — adznačaje Zianon Paźniak, kamientujučy vyniki pajezdki pasłańnikaŭ prezidenta ZŠA Donalda Trampa da kiraŭnika Rasiei Uładzimira Pucina ŭ Maskvu.

Vieteran biełaruskaj palityki zaŭvažaje: situacyja, što składvajecca va Ukrainie, kali siarod surovaj zimy źniščajecca infrastruktura, idzie na karyść rasiejcam. I ŭ pytańni spynieńnia abstrełaŭ i dasiahnieńnia miru «rasiejcy buduć stajać na svaim doŭha», kali Zachad nie pojdzie na radykalnyja zachady.

«Mahčymaści jość — heta druhasnyja sankcyi, źnižeńnie cenaŭ na naftu, haz. Ale pakul na heta Tramp nie idzie — dumaje znajści niejki klučyk. Ale ničoha z hetaha nie budzie — heta ja ŭžo dakładna viedaju, bo amierykancy i jeŭrapiejcy absalutna nie razumiejuć Rasiei, nie razumiejuć hetaj mientalnaści, nie razumiejuć Pucina — dumajuć, što ź imi možna dahavarycca. Nikoli hetaha nie budzie», — upeŭnieny Zianon Paźniak. 

Pavodle palityka, druhi varyjant, jaki moža spynić Pucina, — žorstkaja dapamoha Ukrainie, to bok uzbrojeny kanflikt:

«Što ź ich budzie, my pahladzim. Pakul što niama ničoha. Ceły 2025 hod — heta ŭsio taptańnie na adnym miescy».

 «Amieryka nie choča być niańkaj»

Paźniak dadaje, što, navat kali peŭnyja damoŭlenaści pamiž bakami buduć dasiahnutyja, naprykład, prypynieńnie abstrełaŭ krytyčnaj infrastruktury, u rasiejskim styli — u luby momant hetyja damoŭlenaści pałamać. Navošta tady ZŠA schilajuć ukraincaŭ da pieramovaŭ z Maskvoj, jakaja vidavočna nie choča miru?

«Jany nie bačać inšych varyjantaŭ. Pavinny niešta sprabavać, rabić vyhlad, što niešta robicca, ale nie viedajuć, što rabić. I nie hatovyja da rezkich varyjantaŭ. Tym bolš prablema ź Iranam, z Hazaj — šmat inšych uźnikaje. Dla sučasnaj amierykanskaj palityki Ukraina dzieści na trecim miescy», — razvažaje Zianon Paźniak. 

Jon nahadvaje pra źmieny ŭ vonkavaj palitycy ZŠA — aryjentacyju na daktrynu Manro. Na dumku palityka, vystup prezidenta Trampa ŭ Davosie demanstruje paśladoŭnaść u schilnaści da hetaj palityki. Tramp zajaviŭ, što Jeŭropa źniščaje sama siabie, svaju cyvilizacyju, admoviłasia ad chryścijanstva, nie vykonvaje patrabavańniaŭ u NATO, razzbroiłasia. I ŭ hetych umovach Amieryka prosta nie choča być niańkaj dla ŭsiaho śvietu.

«Heta i jość vyražeńnie daktryny Manro», — adznačaje palityk.

Razam z tym Zianon Paźniak miarkuje, što ŭ stasunkach ZŠA ź JEZ jašče nie ŭsio stračana. 

«Jašče buduć staracca naładzić stasunki z NATO, ź Jeŭropaj. Adnak, kali hetaha nie budzie, ja nie baču pierśpiektyvy dla jeŭrapiejskaj cyvilizacyi. Jana prosta hinie», — miarkuje Zianon Paźniak.

Pry hetym, kaža surazmoŭca, amierykancy nie mohuć raźviazać pytańnia vajny va Ukrainie i «chočuć skinuć jaho na Jeŭropu», zhadvajučy vialiki akijan, jaki raździalaje dva paŭšarji Ziamli:

«Maŭlaŭ, vy žyviacie pobač z Ukrainaju, heta vašyja prablemy — vy pavinny pra heta dumać. Čamu my pavinny za vas usio rabić? I heta praŭda. NATO finansujuć ZŠA, i Tramp prymusiŭ ich [jeŭrapiejcaŭ] niejak źviarnuć na heta ŭvahu. Za dva hady vajna źmianiłasia kardynalna, a jeŭrapiejskija armii zastalisia na ŭzroŭni Druhoj suśvietnaj vajny. Jany ž ničoha nie robiać! Amierykancy robiać, a Jeŭropa — ničoha. Nu, źbirajucca, vykazvajuć zakłapočanaść, prymajuć niejkija rašeńni, ale niama ničoha. I ab hetym Tramp u Davosie havoryć».

«Amierykancy razumiejuć, što prajhrajuć, addaŭšy Biełaruś Rasiei»

Što datyčyć Biełarusi i jaje stasunkaŭ z ZŠA, to Zianon Paźniak miarkuje, što zaprašeńnie Alaksandra Łukašenki ŭ Radu miru — krok «dobry i dla narodu, i dla dziaržavy». Voś jak jon abhruntoŭvaje svaju dumku:

«2024 hod, pra Biełaruś užo nidzie nie ŭspaminali — jaje nie było! Pačynalisia pieramovy pra mir, i jany mahli b usialak pajści. I ŭ situacyi, kali Biełaruś užo nie isnuje, jana ŭžo nie palityčny subjekt, pra jaje nichto nie havoryć, možna i raźmianiać, jak Krym. Heta vielmi niebiaśpiečnaja zjava była, razumiejecie? Tamu pazicyjaj našaha ruchu było admovicca ad sankcyjaŭ i «abmieńvać» na ich palitviaźniaŭ. Jeŭropa nie choča hetaha rabić, Bajden hetaha nie moh rabić — tolki Tramp. I voś jon pačaŭ palityku, jakoj faktyčna vyvieŭ Biełaruś ź izalacyi».

Pry hetym palityk dumaje, što hety krok, choć i dobry dla Łukašenki, usio adno nie daje jamu lehitymizacyi.

Pavodle Paźniaka, amierykancy pačali «prahmatyčnuju, racyjanalnuju palityku i dasiahajuć vynikaŭ». Radu miru palityk ličyć «vielmi charošaj idejaj» i padkreślivaje: taja pryznanaja rašeńniem Rady biaśpieki AAN. Ale navošta Trampu ŭ hetym składzie Alaksandr Łukašenka?

«Amierykancy cudoŭna razumiejuć, što Biełaruś — heta stratehičnaja terytoryja. Jany razumiejuć, što, addaŭšy Biełaruś Rasii, prajhrajuć. Jany pavinny mieć tam svaju ruku, svoj upłyŭ, infarmacyju. I padychodziać vielmi akuratna — praź źniaćcie sankcyjaŭ, vyzvaleńnie palitviaźniaŭ. A nastupnaje što adbyvajecca? U hety ž čas pryznajuć kalijnyja soli stratehična važnym praduktam dla Amieryki. A dzie jość kalijnyja soli? U Biełarusi. Značyć, heta pryceł», — razvažaje surazmoŭca.

Spadar Zianon miarkuje, što takimi dziejańniami ZŠA płanujuć viarnuć biełaruski handal na zachodni rynak, što ŭ doŭhaj pierśpiektyvie addalić krainu ad rasiejskaha ŭpłyvu. Surazmoŭca dadaje: na taki vynik pracuje i jahony ruch.

«My stavim zadaču [u kantaktach z partniorami pa Biełarusi] admieny sankcyjaŭ — heta adzin momant, vypusk palitviaźniaŭ — druhi, spynieńnie represijaŭ — treci, vielmi važny momant. A čaćvierty — inviestycyi. Jany nie pojduć, kali nie buduć spynienyja represii: uźniknie prablema dypłamatyi. Dla nas heta vielmi važna: my vyciahvajem naš narod. Potym treba budzie admiena błakavańnia transpartu — pavinny chadzić ciahniki ŭ Jeŭropu, pavinien być handal. Narod pavinien kantaktavać ź Jeŭropaj! I faktyčna atrymlivajecca, što hramadstva budzie pastupova adciahvacca ad Rasiei», — zaklučyŭ Zianon Paźniak.

• 34
• 2
• 4
• 14
• 2
• 0
• 0
• 1