Unuk Hieroja Savieckaha Sajuza Mikałaja Kiedyški staŭ hołasam Paspalitaha rušeńnia, jakoje choča «vyzvalić Biełaruś»
«My znoŭ adradžajem słaŭnuju tradycyju Paspalitaha rušeńnia, kab abaranić rodny kraj», — zajaŭlajuć stvaralniki zhurtavańnia. Pavodle ich, toj, chto navažycca pryjści ŭ Rušeńnie, musić być hatovy, što jamu daviadziecca sa zbrojaj u rukach vyzvalać Biełaruś.
Na sajcie Paspalitaha rušeńnia adznačana, što heta «niezaležnaje, dobraachvotnaje abjadnańnie biełarusaŭ, jakija praz vajskovuju, fizičnuju i tearetyčnuju padrychtoŭku imknucca da abarony niezaležnaści Biełarusi, adnaŭleńnia zakonnaści na jaje terytoryi i adradžeńnia biełaruskich vajarskich i nacyjanalnych tradycyj».
Jaho pradstaŭnik Siaržuk Kiedyška kaža, što Paspalitaje rušeńnie abjadnała 8 charuhvaŭ, stvoranych biełaruskimi palitemihrantami ŭ Litvie i Polščy. Jany pačali paŭstavać ź inicyjatyvy pradstaŭnika Abjadnanaha pierachodnaha kabinieta Valeryja Sachaščyka.
U charuhvach bolš za 150 čałaviek.
«Ludzi ŭ nas roznych palityčnych pohladaŭ. Jość biełaruskamoŭnyja. Bolšaść, zrazumieła, ruskamoŭnyja, bo my ž viedajem, na jakoj movie naša hramadstva razmaŭlaje. Ale heta nijak nie pryvodzić da sutyknieńnia. Hetym my pakazvajem, što ŭsio mahčyma. Mohuć być razam i anarchisty, i nacyjanalisty ŭ adnoj struktury, kali jość supolnyja mety», — adznačaje Kiedyška.
Pa jaho słovach, ciapier spartova-vajenny kirunak u asiarodździ palityčnaj emihracyi zapatrabavany.
Charuhvy dziejničajuć jak vajskova-spartovy patryjatyčny kłub, u jakim ludzi ŭ tym liku nabyvajuć navyki abychodžańnia sa zbrojaj, taktyčnaj miedycyny, ahulnaj vajskovaj padrychtoŭki.
Siaržuk Kiedyška adznačaje, što Paspalitaje rušeńnie rychtuje rezierv dla biełaruskich i ŭkrainskich uzbrojenych farmiravańniaŭ.
Jon nie vyklučaje, što ŭ Biełarusi ich pryznajuć ekstremisckim farmavańniem.
«Ale my hatovyja i da praktyčnych dziejańniaŭ. Čałaviek, jaki navažycca pryjści ŭ Paspalitaje rušeńnie, musić być padrychtavany da taho, što jamu daviadziecca ŭziać zbroju ŭ ruki i pajści vyzvalać Biełaruś», — zajaŭlaje Siaržuk Kiedyška.
Paspalitaje rušeńnie rehistruje fond, kab jaho dziejnaść była lehalizavanaja ŭ Polščy. Sami ž charuhvy vyrašyli abjadnacca dla pošuku resursaŭ, bo «pačynajuć dziejnaść z nula».
«U nas jość damoŭlenaść na treniroŭki z bajcami Pałka Kalinoŭskaha. My chočam zastavacca ŭ parniorskich i siabroŭskich adnosinach z usimi palityčnymi subjektami, zacikaŭlenymi ŭ vyzvaleńni i pabudovie svabodnaj demakratyčnaj Biełarusi i raźličvajem na ich dapamohu»,— adznačaje aktyvist.
Siaržuk Kiedyška słužyŭ u desantnych vojskach. Demabilizavaŭsia siaržantam. Udzielničaŭ u rekanstruktarskim rycarskim ruchu. Pravodziŭ zaniatki ź dziećmi na histaryčnuju i rycarskuju tematyku i praciahvaje heta ŭ emihracyi — u Varšavie zasnavaŭ dla dziaciej emihrantaŭ «Škołku žaleznaha dryvasieka».
Kaža, što byŭ zaanhažavany ŭ roznyja palityčnyja abjadnańni, ale zastaŭsia biespartyjnym. U 2020 hodzie za ŭdzieł u ruchu za svabodnyja vybary suprać jaho była raspačataja kryminalnaja sprava.
Siaržuk Kiedyška — unuk arhanizatara minskaha padpolla Mikałaja Kiedyški, Hieroja Savieckaha Sajuza, imiem jakoha nazvanaja vulica ŭ Minsku.
Paspalitym rušeńniem u Vialikim Kniastvie Litoŭskim nazyvałasia mabilizacyja ŭsich ludziej na abaronu ajčyny ŭ vypadkach vyklučnaj pahrozy. Słova «paspality» na starabiełaruskaj movie aznačała «usieahulny, ahulnanarodny, usienarodny, narodny».
«Naša Niva» — bastyjon biełaruščyny
PADTRYMAĆ
Kamientary
Nie davajcie čužyncami być!
Chaj pačujuć, jak serca načami
Ab radzimaj staroncy balić. …..Bicie vorahau bicie pahanych nie davajtie spokojna im žyć, chaj pačujuć jak z nočy da rana pad nahami im hleba haryć …