Prablema: dzieci-zorki YouTube padsadžvajuć dziaciej na fast-fud 

Ni dla kaho nie tajamnica, što dzieci pačynajuć hladzieć jutub užo z troch hadoŭ. I čym bolš darosłym stanovicca dzicia, tym bolš źjaŭlajecca influensieraŭ, za jakimi jano sočyć u internecie.

Va Univiersitecie Kaniektykuta zachacieli vyśvietlić, jakija marki praduktaŭ charčavańnia i napojaŭ bačać dzieci, kali hladziać videa, stvoranyja junymi videabłohierami. Daśledčyki praanalizavali sotni videa samych papularnych dziaciej na YouTube, piša NPR. Časta na hetych rolikach ježa akazvałasia ŭ centry ŭvahi.

Daśledavańnie pakazała, što prykładna ŭ tracinie vypadkaŭ dzieci, jakija źnialisia ŭ videarolikach, jeli (ci rabili vyhlad, što jaduć) roznyja prysmaki, nasyčanyja kałoryjami, ale biednyja na pažyŭnyja rečyvy.

Časta ježa była ŭplecienaja ŭ siužetnyja linii. Naprykład, u videa ad Kids Play, kanała z 16 miljonami padpisčykaŭ, dva influensiery lichamankava šukajuć haziroŭku.

U videa z kanała Like Nastya Show, jakoje maje 23 miljony prahladaŭ, siabroŭka hieraini prynosić na abied roznyja niezvyčajnyja prysmaki — heta vyklikaje ŭ Naści zachapleńnie i adnačasova rasčaravańnie ad svajho nie takoha smačnaha «zdarovaha» abiedu. Niahledziačy na toje, što ŭ kancy rolika amatarku niezdarovaj ježy čakaje adpłata ŭ vyhladzie niečakana vialikaha sałodkaha jazyka, rolik usio adno tranśluje, nakolki prysmaki žadanyja i pryvabnyja dla dziaciej; i, kali b u dziaciej była mahčymaść vybirać, to kožny chacieŭ by charčavacca sałodkim.

Jak kantent upłyvaje na dziaciej

Pa słovach Frensis Fleminh-Miličy, aŭtarki praviedzienaha daśledavańnia, markietynh charčovych praduktaŭ mocna ŭpłyvaje na toje, što dzieci chočuć jeści, — asabliva kali jany bačać, što pradukt spažyvaje chtości, kim jany mocna zachaplajucca. Heta, u svaju čarhu, upłyvaje na toje, što jany vyprošvajuć u baćkoŭ. Frensis nazyvaje takija pavodziny «siłaj nadakučlivaści».

«Bolšaść baćkoŭ ci luby, chto pravioŭ niejki čas ź dziciem, viedajuć i adčuvajuć siłu jaho «prystavańnia», — kaža Fleminh-Miličy.

Doktar Dženi Radeski, piedyjatr ź Mičyhanskaha ŭniviersiteta i aŭtarka prahramnaj zajavy Amierykanskaj akademii piedyjatryi ŭ dačynieńni da ličbavaj rekłamy dla dziaciej, kaža, što maleńkija dzieci asabliva ŭsprymalnyja da rekłamy, bo ich kiravalnyja funkcyi jašče nie całkam raźvityja, i jany horš kantralujuć impulsy, čym darosłyja.

Dzieci taksama vučacca, nazirajučy za inšymi, u tym liku za błohierami YouTube, adznačaje Radeski.

«Nazirajučy za tym, jak inšyja ludzi niešta robiać, karysnaje dla zdaroŭja ci nie vielmi, jany vybudoŭvajuć normy i zasvojvajuć, jak pabudavany śviet i što im varta rabić», — kaža Radeski.

Palityka Youtube

YouTube faktyčna zabaraniŭ usiu rekłamu praduktaŭ charčavańnia na kanałach, pryznačanych dla dziaciej, jašče ŭ 2020 hodzie. Ale zabarona nie spyniła častaje źjaŭleńnie ŭ rolikach niezdarovaj ježy.

«Mahčyma, dzieciam-influensieram i nie płaciać za pakaz hetych praduktaŭ. Ale heta nie značyć, što efiekt inšy», — kaža Fleminh-Miličy.

Roliki na YouTube usio roŭna pakazvajuć, jak inšyja dzieci ździajśniajuć svaje žadańni, i zaachvočvajuć chacieć toje ž samaje.

«Stvaralniki kantentu nasyčajuć svaje videa hetymi vielmi žadanymi i pryjemnymi rečami — vy ŭjaŭlajecie, hetyja vializnyja cukierki, pirožnyja i M&Ms paŭsiul, dzie tolki mahčyma, bo jany viedajuć, što heta pryciahvaje bolš uvahi dziaciej-hledačoŭ», — kaža Radeski.

YouTube maje rekamiendacyi pa jakaści videarolikaŭ, jakija nie ŭchvalajuć prapahandu niezdarovaha charčavańnia. Adnak, pa słovach Radeski, niahledziačy na heta, jaje daśledavańni nie vyjavili zaŭvažnych prykmiet palapšeńnia jakaści kantentu.

Jana kaža, što, u adroźnieńnie ad tradycyjnaj tele— i kinaindustryi, dzie jość rejtynhavyja doški, što vyznačajuć, jaki kantent padychodzić dla roznych hrup, internet nie maje takoha ekvivalentu. Tamu jon nie daje harantyi taho, što «jaki-niebudź čałaviek choć kali pierahladaŭ kantent, kab pierakanacca, što jon padychodzić dla vašaha trochhadovaha dziciaci».

• 1
• 0
• 1
• 0
• 1
• 0
• 0
• 0