ŚMI: Vierahodnaja pryčyna pandemii karanavirusa — uciečka z kitajskaj łabaratoryi
Pra heta paviedamiła vydańnie The Wall Street Journal zychodziačy z novaj sakretnaj spravazdačy, pradstaŭlenaj Biełamu domu i klučavym čalcam Kanhresa ZŠA.
Ministerstva enierhietyki ZŠA pryjšło da vysnovy, što vierahodnaj pryčynaj uźniknieńnia pandemii Covid-19 źjaŭlajecca ŭciečka z kitajskaj łabaratoryi. Vydańnie WSJ 26 lutaha paviedamiła, što hetaja vysnova zasnavanaja na novaj sakretnaj spravazdačy amierykanskaj vyviedki, ź jakoj taksama aznajomilisia ŭ Biełym domie i Kanhresie ZŠA.
Vydańnie piša, što padrabiaznaści hetaj spravazdačy pakul nie raskryvajucca, adnak infarmacyja Minenierha źjaŭlajecca važnaj, bo heta struktura «vałodaje značnym navukovym vopytam» i kantraluje sietku nacyjanalnych łabaratoryj ZŠA, častka ź jakich zajmajecca pieradavymi bijałahičnymi daśledavańniami.
Adznačajecca, što da takoj ža dumki pryjšło i Fiederalnaje biuro rasśledavańniaŭ, ale pa inšych pryčynach.
«Ministerstva Enierhietyki i FBR ličać, što virus vyjšaŭ u śviet z kitajskaj łabaratoryi, ale heta nie było śviadomym vykarystańniem bijazbroi. Jany nazyvajuć heta tolki nienaŭmysnaj uciečkaj», — paviedamlaje WSJ sa spasyłkaj na sakretnuju spravazdaču.
Adnak inšyja raźviedvalnyja viedamstvy pakul prytrymlivajucca inšaha mierkavańnia, ličačy pryčynaj pandemii naturalnuju pieradaču virusa ad žyvioły da čałavieka. U samim Minenierha taksama jość ludzi, jakija nie ličać jaho vysnovy dakładnymi.
Z aficyjnych asob prakamientavaŭ situacyju tolki daradca prezidenta ZŠA pa nacyjanalnaj biaśpiecy Džejk Salivan. Jon skazaŭ ahienctvu CNN, što ZŠA pakul nie pryjšli da adzinaj vysnovy nakont pachodžańnia Covid-19.
Kamientary