Ułady ZŠA nie dazvolili pačać testavańnie na ludziach pryłady kampanii Neuralink Iłana Maska
Amierykanskaja niejratechnałahičnaja kampanija, uładalnikam jakoj źjaŭlajecca Iłan Mask i jakaja raspracoŭvaje impłantavanyja interfiejsy «mozh — kampjutar», sutyknułasia z amierykanskim Upraŭleńniem pa kantroli za charčovymi praduktami i lekami.
Z momantu svajho zasnavańnia kampanija Neuralink Corporation naniała niekalki viadomych nieŭrołahaŭ z roznych univiersitetaŭ. Da lipienia 2019 hoda kampanija atrymała 158 miljonaŭ dalaraŭ finansavańnia (ź jakich 100 miljonaŭ ad Maska) i naličvała 90 supracoŭnikaŭ. U toj čas Neuralink abviaściła, što pracuje nad pryładaj, padobnaj da šviejnaj mašyny, zdolnaj impłantavać u mozh vielmi tonkija (4—6 mkm u šyryniu) nici, i prademanstravała sistemu, jakaja sčytvaje infarmacyju z mozha łabaratornaha pacuka praz 1500 elektrodaŭ. Pačatak ekśpierymientaŭ ź ludźmi čakaŭsia ŭ kampanii jašče ŭ 2020 hodzie, ale z tych časoŭ hety prahnoz byŭ pieraniesieny na 2023 hod.
I ciapier paviedamlajecca, što ŭ minułym hodzie ahienctva Ministerstva achovy zdaroŭja ZŠA adchiliła zajaŭku kampanii na pačatak testavańnia na ludziach.
Kampanija zrabiła zajaŭku na testavańnie na ludziach u 2022 hodzie, ale jana była adchilena z-za šmatlikich prablem. Tak, TechCrunch raspaviadaje, što «niejronavy šnurok», jaki farmuje impłant, moža mihravać praź miakkija tkanki mozha. Sama pryłada moža pierahravacca, impłantavany akumulatar moža vyjści z ładu, a vydaleńnie pryłady ŭ vyniku niaspraŭnaści, admovy abo infiekcyi moža paškodzić mozh.
Takija aściarohi całkam racyjanalnyja, i heta zvyčajnaja źjava, kali miedycynskija pryłady adchilajucca praz patencyjnyja prablemy ź biaśpiekaj, jakija ich stvaralniki albo nie pravieryli naležnym čynam, albo spadziavalisia, što rehulatar ich nie zaŭvažyć. Jak praviła, u takich vypadkach daśledčyki viartajucca da pracy i sprabujuć znoŭ praz hod.
Vielmi vierahodna, što hetaksama budzie i z Neuralink. Pry hetym jość śviedčańni, što Mask takim pavolnym tempam prahresu byŭ rasčaravany.
Ciažka acanić prahres i niaŭdačy kampanii, tamu što Neuralink (jak i inšyja kampanii Maska) viadzie davoli schavanuju dziejnaść i dzielicca navinami tolki ŭ formie vypadkovych, staranna arhanizavanych mierapryjemstvaŭ ci pres-kanfierencyj. Ale choć impłant byccam by pracuje, što dakazvajecca raniej prademanstravanym kampanijaj videa, dzie małpa ź impłantavanaj pryładaj hulaje ŭ pinh-ponh na kampjutary pry dapamozie dumki, ale pakul naŭrad ci źjaŭlajecca dokazam taho, što technałohija hatovaja da vyprabavańniaŭ na ludziach.
Da taho ž niekalki nieŭrołahaŭ i publikacyj, u tym liku ŭ pavažanym u navukovym śviecie časopisie MIT Technology Review, krytyčna aceńvali zajavy Maska pra Neuralink, nazvaŭšy niekatoryja technałahičnyja abiacańni «vielmi śpiekulatyŭnymi».
Bolšaść kampanij, jakaja pracuje ŭ hetaj śfiery, rabiła heta na praciahu mnohich hadoŭ (uklučna z dazvołam rehulatara na testavańnie i vykarystańnie na ludziach), nie dajučy takich hučnych abiacańniaŭ, jak Mask. Hetaja technałohija ŭjaŭlaje saboj patencyjny praryŭ dla ludziej ź ciažkimi zachvorvańniami, ale ŭviadzieńnie starońnich pradmietaŭ u mozh vielmi niebiaśpiečnaje. Kampanija, što choča zajmacca takimi surjoznymi rečami, jak adnaŭleńnie zroku i ruchomaści, pavinna spačatku dakazać, što impłantaty biaśpiečnyja na bazavym uzroŭni — i mienavita hetaha patrabuje rehulatar.
Ciapier čytajuć
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary