Abjadnany pierachodny kabiniet: Litoŭski zakonaprajekt nie zakranaje režymu Łukašenki, ale stvaraje ciažkaści dla biełarusaŭ, łajalnych da Litvy
Abjadnany pierachodny kabiniet Biełarusi vystupiŭ z krytyčnaj zajavaj adnosna zakonaprajekta, jaki ciapier prachodzić praź litoŭski Siejm i tyčycca mihracyjnych umoŭ dla biełaruskich hramadzian.
Abjadnany pierachodny kabiniet Biełarusi nie stavić pad sumnieŭ toje, što ŭ ciapierašnich składanych umovach Litva vymušanaja prymać miery pa zabieśpiačeńni svajoj nacyjanalnaj biaśpieki. Ale ŭ toj ža čas adznačaje, što zakonaprajekt № XIVP-2496(2) «Ab uviadzieńni abmiežavalnych mier u dačynieńni da vajennaj ahresii suprać Ukrainy» patencyjna zakranaje intaresy dziasiatkaŭ tysiač biełarusaŭ, jakija ciapier «žyvuć u Litvie i svajoj štodzionnaj pracaj robiać važki ŭniosak u nacyjanalnuju ekanomiku».
APKB źviartaje ŭvahu na toje, što vialikaja častka biełarusaŭ u vajnie va Ukrainie zusim nie na baku Rasii, što prajaŭlajecca jak u pratesnych vystupleńniach i dyviersijach unutry krainy, tak i dziejnaści emihracyi.
«Faktyčnaje raŭnavańnie hramadzian Biełarusi i Rasii nie maje pad saboj padstaŭ. Bolšaść biełarusaŭ nie padtrymlivaje ahresiju suprać Ukrainy. Vidavočna i toje, što rašeńnie nielehitymnaha dyktatarskaha režymu padtrymać rasijskuju ahresiju supiarečyć voli biełaruskaha naroda, jaki z 2020 hoda akazvaje supraciŭ režymu, damahajecca spynieńnia ŭdziełu ŭ vajennaj ahresii i adnaŭleńnia demakratyi», — padkreślivajecca ŭ zajavie kabinieta.
Adznačajem, što prypynieńnie mahčymaści padačy chadajnictvaŭ ab atrymańni hramadzianstva Litoŭskaj Respubliki datyčyć hramadzian Biełarusi, jakija pierajechali ŭ Litvu nie paźniej za 2012 hod, h. zn. da anieksii Kryma i akupacyi častak Danieckaj i Łuhanskaj abłaściej Ukrainy. Hetyja hramadzianie Biełarusi bolš za 10 hadoŭ lehalna pražyvajuć u Litvie, płaciać padatki, stvarajuć biznes i pracoŭnyja miescy, i jany ŭ dastatkovaj miery intehravanyja ŭ litoŭskaje hramadstva.
Prapanavanyja ŭ zakonaprajekcie abmiežavalnyja vizavyja zachady, na dumku APKB, buduć dziejničać suprać biełarusaŭ, nie źviazanych z režymam.
Kanstatujecca, što «ŭ cełym zakonaprajekt nie zakranaje režymu Łukašenki, ale stvaraje značnyja ciažkaści dla zakonapasłuchmianych i łajalnych da Litvy hramadzian Biełarusi, u tym liku tych, chto doŭhi čas pražyvaje ŭ Litoŭskaj Respublicy».
Tamu «Abjadnany pierachodny kabiniet Biełarusi budzie aktyŭna pracavać z zakanadaŭčaj i vykanaŭčaj uładaj Litoŭskaj Respubliki z tym, kab damahčysia spraviadlivaha staŭleńnia da zakonnych pravoŭ hramadzian Biełarusi, i raźličvaje na kanstruktyŭnaje ŭzajemadziejańnie».
Kamientary