Štučny intelekt zymitavaŭ intervju paralizavanaha Michaela Šumachiera. Siamja padaje ŭ sud na časopis
Siamja Michaiła Šumachiera płanuje sudzicca z časopisam, jaki apublikavaŭ zhienieravanaje štučnym intelektam intervju z byłym piłotam «Formuły-1». Niamiecki časopis Die Aktuelle pazicyjanavaŭ intervju jak ekskluziŭnaje i pieršaje dla Šumachiera paśla taho, jak u śniežni 2013 hoda jon atrymaŭ ciažkuju čerapna-mazhavuju traŭmu i pierastaŭ źjaŭlacca na publicy, paviedamlaje Bi-bi-si.
15 krasavika fotazdymak Šumachiera źjaviŭsia na vokładcy Die Aktuelle z zahałoŭkam: «Michael Šumachier, pieršaje intervju!» Na vokładcy taksama havorycca, što heta hučyć zmanliva realistyčna.
Užo ŭnutry artykuła jość udakładnieńni: adkazy Šumachiera zhienieravaŭ štučny intelekt. Siarod adkazaŭ, naprykład, «kamientar» pra žyćcio paśla traŭmy.
«Majo žyćcio całkam źmianiłasia paśla (incydentu). Heta byŭ žudasny čas dla majoj žonki, maich dziaciej i ŭsioj siamji. U mianie była takaja mocnaja traŭma, što ja miesiacami lažaŭ u štučnaj komie. Inakš moj arhanizm nie zmoh by spravicca z usim hetym», — zhienieravaŭ ŠI «słovy» Šumachiera.
Siamja paćvierdziła infarmacyjnamu ahienctvu Reuters, što jany płanujuć vyrašać hetaje pytańnie ŭ sudovym paradku. Vydaŭcy časopisa admovilisia ad kamientaroŭ.
Šumachier, siamirazovy čempijon «Formuły-1», u śniežni 2013 hoda atrymaŭ surjoznuju traŭmu, kali kataŭsia na łyžach u Alpach, i daktary, pakolki bajalisia za jaho žyćcio, uviali jaho ŭ stan štučnaj komy.
U červieni 2014 hoda mieniedžar Šumachiera paviedamiła, što jon vyjšaŭ z komy i ciapier jaho čakaje doŭhaja reabilitacyja. «Što datyčyć jaho budučyni, to my prosim vašaha razumieńnia — dalejšaja jaho reabilitacyja nie budzie publičnaj», — zajaviła tady Sabina Kem.
Z tych časoŭ były spartsmien prachodziŭ adnaŭleńnie na bierazie Ženieŭskaha voziera. U śniežni 2018 hoda ŚMI paviedamili, što Šumachier bolš nie prykavany da łožka i nie maje patreby ŭ aparacie štučnaj vientylacyi lohkich, ale jamu patrebny pastajanny dohlad.
Adnak detali pra stan jaho zdaroŭja siamja byłoha piłota «Formuły-1» nie vydaje.
U dakumientalnym filmie Netflix 2021 žonka Šumachiera Karyna skazała: «My žyviom doma. Zajmajemsia terapijaj. My robim usio mahčymaje, kab zrabić Michaelu lepš i pierakanacca, što jamu kamfortna. Prosta dać jamu adčuć našu siamju, našu suviaź».
Jana patłumačyła, što Michael byŭ suprać publičnaści i zaŭsiody kazaŭ, što «asabistaje jość asabistaje».
«Michael zaŭsiody abaraniaŭ nas, i ciapier my abaraniajem Michaela», — adznačyła Karyna.
Šumachier vyjhraŭ dva tytuły čempijona śvietu siarod piłotaŭ Formuły-1 z Benetton u 1994 i 1995 hadach, a z 2000 pa 2004 hod jon vyjhraŭ piać tytułaŭ zapar u kamandzie Ferrari.
Vyjhraŭšy 12 z 13 pieršych hran-pry 2004 hoda Šumachier daterminova staŭ čempijonam śvietu siomy raz, što stała rekordam «Formuły-1», jaki tolki ŭ 2020 hodzie pabiŭ brytanski aŭtahonščyk Ljuis Chemiłtan.
Kamientary
Sobłazn vielik , a čiełoviek słab.