Byłaja himnastka ź Biełarusi, siarebranaja pryziorka Alimpijady-2012 hoda i zasłužanaja majstarka sportu Natalla Leščyk pierajechała žyć u Biełastok. Tut jana budzie treniravać polskich dziaciej.
Aficyjna biełaruskuju spartsmienku pradstavili haradskija ŭłady Biełastoka 26 krasavika, paviedamlaje Mostmedia.io.
Siarebranaja pryziorka Alimpijady-2012 pa mastackaj himnastycy Natalla Leščyk nie chavała svaju pazicyju paśla prezidenckich vybaraŭ-2020 u Biełarusi. Dziaŭčyna padpisała list svabodnych spartsmienaŭ i vykazałasia pa situacyi ŭ krainie. Taksama jana asudziła rasijskuju ahresiju va Ukrainie ŭ lutym 2022 hoda.
— Paśla pratestaŭ u nas u Biełarusi vielmi tryvožnaja situacyja, vielmi šmat ludziej sadžajuć u turmu. Ja adkryta vykazvała pazicyju suprać dyktatury i vajny. Była vierahodnaść, što pa mianie pryjduć i pasadziać. Uvieś čas była ŭ tryvožnym stanie i tamu vymušanaja była źjazdžać z krainy, — skazała na pres-kanfierencyi Natalla.
Uzimku 2022 hoda spartsmienka vyjechała ź Biełarusi. Jana pierajechała ŭ Polšču i spačatku žyła va Urocłavie. Viasnoj 2023 hoda Natalli prapanavali pracu ŭ Biełastoku, taksama ŭ polskim horadzie joj dali žyllo.
— Biełastok mnie zdaŭsia bolš pryvabnym, čym Urocłaŭ. Tut u mianie znajomyja byli, jany i spakusili pierajechać. Ja b chacieła skazać dziakuj Polščy za haścinnaść, prytułak i mahčymaść pačuvacca ŭ biaśpiecy. Ja vielmi rada papracavać u Biełastoku ź dziećmi. Spadziajusia, naša praca budzie praduktyŭnaj.
U himnastycy na Alimpijskich hulniach u polskich spartoŭcaŭ niama miedaloŭ, haradskija ŭłady Biełastoka miarkujuć, što biełaruskaja spartoŭka zdoleje padrychtavać budučych polskich čempijonaŭ da Alimpijady ŭ ZŠA. 34-ja letnija Alimpijskija hulni projduć letam 2028 hoda ŭ Łos-Andželesie.
Ciapier čytajuć
Jak u halečy śpivałasia radnia Łukašenki? Małaviadomyja fakty25
Kamientary