Minskaja «Piasočnica» sa stryt-fudam adkryła novy siezon. Jaki vybar ježy i kolki što kaštuje
27 krasavika ŭ Minsku adkryŭsia piaty letni siezon u «Piasočnicy» — papularnaj placoŭcy sa stryt-fudam i zabavami. Realt daviedaŭsia, kolki kaštuje tam pajeści i čym płanujuć zabaŭlać.
Piasočnica znakamitaja svaimi setami ź fiksavanym koštam u kožnym fud-traku. U hetym hodzie ich dva — «Piasočnica» za 14 rubloŭ i Coca-Cola za 11,90. Heta na 2 rubli daražej, čym u minułym siezonie.
Punktaŭ ź ježaj sioleta budzie 15. Siarod ich dva novyja: mieksikanskaja kuchnia ad Dontacos i burhiery ad Burger Bro.
Akramia setaŭ, u kožnaha fud-traka jość svajo mieniu. Burhiery kaštujuć u miežach 14—20 rubloŭ, pica — ad 11 da 22 rubloŭ, blincy — 8,5—11,5 rubla. Chot-dohi ad 8 rubloŭ, a maroziva ad 3,5 rubla za šaryk. Napoi možna znajści ad 1,5 rubla za harbatu i ad 4 — za kaktejli i limanady. Pradajecca i ałkahol.
Akramia novych kropak ź ježaj, na placoŭcy źjaviłasia jašče adno hrafici va ŭsiu ścianu. Šmat miescaŭ, dzie možna pasiadzieć. Heta i stoliki pad adkrytym niebam, a jašče pad parasonami i la ekrana. Jość areli ź miakkimi siadzieńniami.
Na arelach adpačyvaje Kaciaryna. Dziaŭčyna čakaje siabroŭ i pakul što pryhladajecca da abstanoŭki.
— Prychodžu siudy ŭžo, napeŭna, treci hod. Tut pryhoža, ježa čaściej za ŭsio smačnaja. Lublu tančyć, kali tut majstar-kłasy pravodziać. Ciapier nie vielmi viesieła, ale ŭpeŭnienaja, što dalej budzie lepš. Najbolš lublu višniovy limanad i blincy.
Na ŭvieś letni siezon arhanizatary abiacajuć cikavyja zabaŭki i kirmaš padarunkaŭ «Harošak Markiet». A papracavać možna budzie ŭ kavorkinhu z Wi-Fi.
Placoŭka budzie pracavać štodzień z 12.00 da 23.00 pa adrasie Kujbyšava, 45. Na viečar suboty 29 krasavika zapłanavanaja viečaryna z kancertam z nahody adkryćcia placoŭki.
Kamientary