Isteryki Pryhožyna pakazvajuć, što Rasija moža być bližejšaj da 1917 hoda, čym my dumajem

Ciažka ŭjavić sabie krainu Zachadu, dzie vojenačalnik, a tym bolš padčas vajny, dazvalaje sabie vypady ŭ takoj formie na adras ministra abarony i kiraŭnika Hienštaba, jakija sabie dazvalaje na adras Šajhu i Hierasimava Jaŭhien Pryhožyn.

Zusim inšuju karcinu my nazirajem z ukrainskaha boku frontu, dzie kiraŭnictva armii, jak i prezident, karystajucca samym vysokim davieram hramadzian.

Fronda Pryhožyna, a hety były kryminalnik zapazyčyŭ dla svaich vystupaŭ styl Uładzimira Žyrynoŭskaha, a abodva jany, u svaju čarhu, niby syšli sa staronak Fiodara Dastajeŭskaha, vymušaje zhadać pavarotnyja momanty rasijskaj historyi.

Najbolš «kuchar Pucina», jaki trapiŭ u bližniaje koła Uładzimira Pucina i staŭ miljarderam, jakomu dazvolili ŭznačalić hihanckuju najmanuju armiju, ciapier nahadvaje inšaha histaryčnaha piersanaža — Ryhora Raspucina, avanturysta, jaki zdabyŭ vializny ŭpłyŭ na carski dvor padčas Pieršaj suśvietnaj vajny. Atačeńnie kiraŭnika Rasii ŭrešcie likviduje hetaha vyskačku, a chutka hrymnie Lutaŭskaja revalucyja.

U samoha Pryhožyna na jazyku toje, što ŭ inšych na dumcy. Ën pahražaje adstupleńniem z Bachmuta, nazyvaje situacyju krytyčnaj.

«Na siońnia my prychodzim da taho, što PVK «Vahnier» zakančvajecca, PVK «Vahnier» praź niejki karotki čas pierastanie isnavać. My pojdziem u historyju. Ničoha strašnaha, tak byvaje», — praročyć Pryhožyn.

Na pohlad Pryhožyna, «mnohija z tych, chto jašče ŭčora padtrymlivaŭ śpiecapieracyju, siońnia znachodziacca ŭ sumnievach, albo kateharyčna suprać taho, što adbyvajecca. Pradstaŭnikam hłybinnaj dziaržavy chočacca terminova viarnucca da svajho zvyčajnaha žyćcia, starych zvyčak i kamfortu».

Takija ludzi «na naradach maŭčać, vykazvajuć svaje sumnievy. A pry pryniaćci rašeńniaŭ pa biurakratyčnych pracedurach tarmoziać tyja ci inšyja dziejańni, nakiravanyja na pieramohu ŭ hetaj vajnie».

Hetyja zajavy vielmi nahadvajuć pošuk unutranych vorahaŭ, jaki raspačaŭsia ŭ Pieciarburhu, kali Pieršaja suśvietnaja pakazała varty žalu stan rasijskaj armii.

Kiraŭnik PVK «Vahnier» taksama aceńvaje stan rasijskaj armii biez aptymizmu. Ci moža być takoje, što «VSU ŭprucca ŭ abaronu RF, paniasuć surjoznyja straty, paśla čaho pačniecca kałasalnaje kontrnastupleńnie vojskaŭ RF da miežaŭ DNR, abo da Dniapra, ci ŭvohule da Polščy»? Pryhožyn adkazvaje dalikatna: «Uličvajučy siońniašniuju dynamiku i prablematyku, takoje kontrnastupleńnie, skažam miakka, nie vielmi imaviernaje».

Pavialičyć

Pryhožyn miarkuje, što bolš realny inšy varyjant, kali «ŭkrainskaja armija raspačnie kontrnastupleńnie i dzieści zdoleje prarvać abaronu».

«U hetym vypadku ŭ vojsku, jakoje hadami siabie ličyła adnym z najlepšych vojskaŭ śvietu, mohuć pačacca spačatku ŭpadnickija nastroi, a potym situacyja dehraduje, jak heta ŭžo było paśla prajhranych vojnaŭ pačatku XX stahodździa — Finskaj, Japonskaj — i trahičnych padziej 1917 hoda».

«Heta moža pryvieści da hłabalnych źmienaŭ u rasijskim hramadstvie. Narod užo šukaje vinavatych u tym, što my nie samaja mocnaja armija ŭ śviecie, a ŭ hetaj situacyi buduć šukać «krajnich», — zaścierahaje Pryhožyn.

Na pačatku Pieršaj suśvietnaj rasijskamu narodu taksama abiacali Bierlin i vyzvaleńnie Śviatoj Safii, tolki trochi paŭdnioviej.

Kali šavinistyčny čad raźviejvajecca, narod bačyć ułasnuju biednaść i štabieli trupaŭ. Tyja, jakija ŭžo ciapier pakazvaje publicy Pryhožyn.

Užo z sakavika 2022-ha, kali rasijanie źbiehli z-pad Kijeva, mnohija prahnazavali, što ŭkrainskaja vajna stanie dla Pucina tym, čym była rasijska-japonskaja dla Mikałaja II. Isteryki Pryhožyna pakazvajuć, što 1905-m usio moža nie abmiežavacca.

Ale majo pytańnie: a Biełaruś? Ci znojducca ŭ Biełarusi siły, zdolnyja skarystacca momantam i zdabyć dla krainy niezaležnaść i demakratyju, kali Rasija asłabnie? Ci znojduć jany apiryšča ŭ siłavych strukturach Biełarusi? 

• 54
• 0
• 4
• 3
• 3
• 1
• 5
• 0