Łukašenka prylacieŭ u Maskvu na parad. Da apošniaha heta nie afišavałasia
Raniej mierkavałasia, što kampaniju Pucinu na paradzie, jaki adbudziecca ranicaj 9 Maja na Krasnaj płoščy, składzie tolki prezident Kyrhyzstana Sadyr Žaparaŭ. Adnak učora Maskva zajaviła, što zaprasiła na ŭračystaści prezidentaŭ Tadžykistana i Turkmienistana, a siońnia stała viadoma, što ŭ Maskvu prybuduć i kiraŭniki Kazachstana Kasym-Žamart Takajeŭ, Armienii Nikoł Pašynian i Uźbiekistana Šaŭkat Mirzijojeŭ.
U Biełarusi ž z-za hetaha ŭ prahramie śviatkavańnia 9 Maja ŭskładańnie kvietak na płoščy Pieramohi ssunuli na viečar, 19:00. Zvyčajna jano adbyvałasia rankam.
U apošniaje dziesiacihodździe Alaksandr Łukašenka redka byvaŭ na Dzień Pieramohi ŭ Maskvie.
Adnak sioleta prysutnaść sajuźnikaŭ važnaja Uładzimiru Pucinu va ŭmovach, kali rasijskija vojski va Ukrainie buksujuć i na hetym fonie pačalisia publičnyja zvadki miž jaho siłavikami. 3 maja bieśpiłotniki ŭzarvalisia kala fłahštoka rezidencyi prezidenta ŭ Kramli.
Postsavieckija dyktatary vykarystoŭvajuć pieramohu ŭ Druhoj suśvietnaj vajnie dla apraŭdańnia svajho supraćstajańnia z Zachadam i pretenzij na asablivuju rolu.
Nacysckaja Hiermanija kapitulavała 78 hadoŭ tamu, poźnim viečaram 8 maja. U SSSR pra zakančeńnie vajny stała viadoma 9 maja, hetaja data i stała śviatočnaj. U pieršyja dziesiacihodździ paśla vajny hety dzień śviatkavali ścipła, z časam jon staŭ usio bolš pampieznym. Ciapier, kali vieteranaŭ amal nie zastałosia, ź jaho źlapili ceły kult z raznastajnymi rytuałami.
Na šeście z uskładańniem kvietak «Biełaruś pamiataje», u pryvatnaści, štohod u peŭny čas zhaniajuć pracoŭnych i navučencaŭ.
U krainach Jeŭrapiejskaha sajuza 9 maja adznačajecca Dzień Jeŭropy. Ideja hetaha śviata — kab pamiać pra vajnu nahadvała ludziam pra važnaść miru i adzinstva jeŭrapiejskich narodaŭ, jakija zdoleli pražyć amal vosiem dziasiatkaŭ hadoŭ biez vojnaŭ.
Kamientary