Rasijski hienierał pačytaŭ, što pišuć u sacsietkach, i zapuściŭ fejk
Kala 100 ukrainskich bieśpiłotnikaŭ sprabavali atakavać Maskvu 9 traŭnia, ale praktyčna ŭsie ataki byli papiaredžanyja, publična zajaviŭ hienierał-major avijacyi, staršynia prezidyuma arhanizacyi «Aficery Rasii» Siarhiej Lipavoj. Jaho słovy pracytavała «RIA-Naviny», ale nieŭzabavie sam hienierał pryznaŭ, što raspaŭsiudziŭ fejk.
Lipavoj śćviardžaŭ, što sproby napadaŭ 9 maja rabilisia z terytoryi jak Ukrainy, tak i Maskoŭskaj vobłaści ŭ nadziei na toje, što drony «niejkim čynam zmahli b dabracca da Krasnaj płoščy i nanieści tam niejkuju škodu».
«U vyniku dziejańniaŭ našych srodkaŭ SPA, u vyniku dziejańniaŭ našych padraździaleńniaŭ REB <…> častka była abiasškodžanaja, pasadžanaja, a častka była prosta źniščanaja», — zajaviŭ hienierał-major. Dadaŭšy pry hetym, što Ukraina ŭpieršyniu vykarystała drony amierykanskaj raspracoŭki z maksimalnym radyusam dziejańnia da 800 km.
Taksama Lipavoj śćviardžaŭ, što častka BPŁA, maŭlaŭ, była źbitaja ŭ Biełharadskaj vobłaści, niekalki bieśpiłotnikaŭ «abiasškodžanyja» na terytoryi Kurskaj vobłaści, na terytoryi Varonieža i na terytoryi Kałužskaj vobłaści. U vyniku «śviata prajšło biez zaŭvah», padkreśliŭ hienierał.
Ale ŭžo nieŭzabavie jon pryznaŭsia, što prosta niekrytyčna pastaviŭsia da infarmacyi z sacsietak:
«Infarmacyja pra 100 ukrainskich dronaŭ, jakija nibyta lacieli na Maskvu 9 maja, źjaŭlajecca niepravieranaj. Jana była atrymanaja ź nieaficyjnych krynic pa publikacyjach u sacyjalnych sietkach».
Ci budzie Siarhiej Lipavoj ciapier pryciahnuty da adkaznaści pavodle rasijskaha represiŭnaha «zakona ab fejkach», nie paviedamlajecca.
Ciapier čytajuć
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2222
Kamientary