Prankiery Vavan i Leksus pad vyhladam Parašenki dazvanilisia da Cichanoŭskaj, ale nie zmahli padtrymać razmovu ź Viačorkam pa-ŭkrainsku
Na intervju da kiraŭnika ANT Marata Markava pryjšli prankiery Vavan i Leksus, jakich źviazvajuć z rasijskimi śpiecsłužbami. Jany pakazali videa rozyhryšu Śviatłany Cichanoŭskaj. Praŭda, u pranku, jaki prapahanda vystaŭlaje jak siensacyjnyja pryznańni, ničoha sakretnaha papraŭdzie nie prahučała.
Videa pakazali asobnymi kavałkami. Kali jaho zapisali, nie nazyvajecca. Śviatłana Cichanoŭskaja i inšyja pradstaŭniki Ofisa padklučylisia da zvanka pa videasuviazi. U adkaz na pytańni prankieraŭ ahučyli faktyčna toje ž, što kažuć na intervju i mižnarodnych sustrečach.
Tak, Cichanoŭskaja raskazvała, što jany adstojvajuć pazicyju, kab nie zdymali sankcyi na kalij z Łukašenki.
Paśla da razmovy padklučyŭsia Valer Kavaleŭski, jaki tłumačyŭ, chto łabiruje źniaćcie sankcyj — krainy Paŭdniovaj Jeŭropy z suviaziami ŭ Łacinskaj Amierycy (Brazilija była adnym z asnoŭnych spažyŭcoŭ biełaruskaha kaliju).
Cichanoŭskaja razvažała taksama pra raźmiaščeńnie rasijskaj jadziernaj zbroi na terytoryi Biełarusi, što heta vialikaja pahroza, bo paśla budzie ciažka vyhnać rasijskich vajskoŭcaŭ.
Pra połk Kalinoŭskaha palityk skazała, što jany padparadkujucca Uzbrojenym siłam Ukrainy i demsiły nie mohuć zahadać im vyzvalić Biełaruś, bo dobraachvotniki znachodziacca ŭ padnačaleńni va ŭkrainskaj armii.
Paśla hetaha da razmovy dałučyŭsia inšy daradca Cichanoŭskaj — Franak Viačorka, jaki vałodaje ŭkrainskaj movaj, i staŭ razmaŭlać na joj. Na hetym videa ANT pieraryvajecca, ale, vidać, paśla hetaha «Parašenka» prapanavaŭ pasłuchać ukrainski himn.
«Navošta?» — spytała na hetu niečakanuju prapanovu Cichanoŭskaja.
«Prabačcie, Piatro Alaksiejevič nabuchaŭsia paśla sustrečy ŭ Brusieli i z vami chacieŭ by buchnuć, kali što, jak pryjedziem, sustreniemsia», — skazaŭ inšy prankier, jaki prykidvaŭsia pamočnikam Parašenki.
«Nu, my nie buchajem», — adkazała Cichanoŭskaja.
Hety prank Vavan i Leksus nazvali padarunkam dla Markava.
Uładzimir Kuźniacoŭ (Vavan) dadaŭ taksama, što jany rabili ad imia Cichanoŭskaj pranki z roznymi palitykami i fondami.
U 2014-m hetyja ž prankiery razyhrali Alaksandra Łukašenku. Jamu pazvanili pad vyhladam syna byłoha prezidenta Ukrainy Viktara Janukoviča i pytalisia pra mahčymaść palityčnaha prytułku. Paśla pranku zvolnili pres-sakratarku Łukašenki Natallu Piatkievič. Toj prank zdaryŭsia na fonie imknieńnia Łukašenki zaniać niejtralnuju pazicyju pa situacyi ŭ Krymie i Danbasie.
Ciapier čytajuć
Na Mazyrskim naftapierapracoŭčym zavodzie prajšli zatrymańni siarod kiraŭnictva1
Kamientary