Rasiejcy ŭzarvali dambu Kachoŭskaj HES. Heta katastrofa, nastupstvy jakoj ciažka praličyć
U vyniku padryvu mašynnaj zały Kachoŭskaja HES poŭnaściu źniščanaja. Stancyja adnaŭleńniu nie padlahaje, paviedamili va Ukrhidraenierha.
Pačałasia evakuacyja žycharoŭ niebiaśpiečnych rajonaŭ, pra heta paviedamiŭ kiraŭnik Chiersonskaj vobłaści Alaksandr Prakudzin.
Kiraŭnictva Chiersonskaj AVA paviedamiła, što ŭzrovień vady praz padryŭ Kachoŭskaj HES dojdzie da krytyčnaha ŭzroŭniu na praciahu piaci hadzin, piša UNIAN.
Pra heta zajaviŭ kiraŭnik Chiersonskaj abłasnoj vajennaj administracyi Alaksandr Prakudzin u terminovym zvarocie da nasielnictva.
«Rasijskaja armija ździejśniła čarhovy akt teroru: uzarvała Kachoŭskuju HES. Praź piać hadzin vada dastanie da krytyčnaha ŭzroŭniu, raspačataja evakuacyja žycharoŭ niebiaśpiečnych rajonaŭ», — skazaŭ čynoŭnik.
Jon źviarnuŭsia da ludziej z prośbaj terminova sabrać dakumienty, rečy pieršaj nieabchodnaści i čakać evakuacyjnych aŭtobusaŭ.
Prakudzin zapeŭniŭ, što na miescy pracujuć pradstaŭniki ŭsich adpaviednych apieratyŭnych słužbaŭ i vajskoŭcy.
Padraździaleńni Nacyjanalnaj palicyi i Dziaržaŭnaj słužby nadzvyčajnych situacyj Ukrainy padniatyja pa tryvozie dla apaviaščeńnia i evakuacyi nasielnictva z patencyjnych zon zatapleńnia na pravabiarežnaj častcy Dniapra, u hetuju zonu traplaje i častka Chiersona.
Uładzimir Zialenski pravodzić ekstrannaje pasiadžeńnie Rady nacyjanalnaj biaśpieki i abarony Ukrainy.
Na Kachoŭskaj HES razburanyja 11 z 28 pralotaŭ.
Jak paviedamili ŭ ekstrannych słužbach, u zonu padtapleńnia mohuć trapić 80 nasielenych punktaŭ.
Kachoŭskuju HES pabudavali ŭ 1950-ch, heta adna z najbujniejšych hidraelektrastancyj śvietu. Na bierazie Kachoŭskaha vadaschovišča raźmiaščajecca Zaparožskaja AES, jana achałodžvałasia jaho vadoj.
Uzrovień vady ŭ Dniapry nižej za jaje moža padniacca na 12 mietraŭ, paviedamlajuć u administracyi Chiersonskaj vobłaści. Heta vyšynia piacipaviarchovaha doma.
Śmiarotnaja niebiaśpieka pahražaje ŭkrainskim bajcam, jakija za apošnija miesiacy ŭziali pad kantrol bałocistyja astravy na levym bierazie Dniapra.
Raźliŭ Dniapra nižej za HES robić niemahčymym jaho farsiravańnie tam. U toj ža čas razbureńnie płaciny spynić pastupleńnie vady ŭ Paŭnočna-Krymski kanał, što aznačaje prablemy ŭ vodazabieśpiačeńni Kryma navat paśla jaho vyzvaleńnia.
Całkam nastupstvy padryvu HES ciažka praličyć. U pryvatnaści, zastajecca biez achałodžańnia Zaparožskaja AES, heta stvaraje pahrozu jaje avaryjnaha spynieńnia.
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy29
Kamientary