Niamieččyna doryć kožnamu na paŭnalećcie pa 200 jeŭra. Navat mihrantam

Raspaŭsiudžvajecca dumka, što ad pandemii karanavirusa ŭ Niamieččynie bolš za ŭsio paciarpieli maładyja ludzi i rabotniki kultury. Školniki i studenty byli faktyčna na paŭtara-dva hady pazbaŭlenyja viečarynak, kamunikacyi z adnahodkami i, mabyć, narmalnaj adukacyi (škoły začynialisia na praciahłyja terminy), jak piša Deutsche Welle.

A zakrytyja na tyja ž paŭtara-dva hady teatry, kinateatry, kancertnyja zały dahetul nie mohuć viarnucca da dapandemijnaha ŭzroŭniu zapaŭnieńnia załaŭ, nie kažučy ŭžo pra toje, što mnohija artysty faktyčna byli pazbaŭlenyja mahčymaści zajmacca ŭlubionaj spravaj.

Pryjšoŭ čas viartać daŭhi. Ułady Niamieččyny vyrašyli, što adnym udaram možna zabić dvuch zajcoŭ: vydzielić biudžetnyja hrošy na toje, kab niamieckaja moładź viarnuła sabie zhubleny navyk «vychodzić u śviet», a zaadno dapamahčy kultury.

Prajekt «Kulturny pašpart» (Kulturpass), jaki byŭ anansavany vosieńniu 2022 hoda, pačaŭ pracu ŭ sieradu.

Kamu i na što pryznačany hrošy?

Usie žychary Niamieččyny, jakim u 2023 hodzie spaŭniajecca 18 hadoŭ (hramadzianinam krainy być nie abaviazkova) atrymajuć pa 200 jeŭra, jakija z dapamohaj śpiecyjalnaha dadatku možna patracić na kulturnyja zabavy (kvitki ŭ kino, na kancerty, u teatry i muziei), a taksama, naprykład, na knihi ci muzyčnyja instrumienty.

Važna, što ŭrad takim čynam subsiduje łakalnyja kulturnyja ŭstanovy miascovaha, rehijanalnaha značeńnia, a nie bujnych kulturnych hulcoŭ.

Jašče adno abmiežavańnie — zabarona na virtualnaść. Pakupki pavinny być zroblenyja (ci chacia b zabranyja) afłajn.

Nielha tracić hetyja hrošy na Amazon abo Spotify — zamoŭlenuju knihu abo muzyčny instrumient pryjdziecca asabista zabrać u nievialikaj miascovaj kniharni.

Nielha pahladzieć film u stryminhu — nieabchodna nahami pryjści ŭ susiedni kinateatr.

Kali padčas pandemii niamieckija ŭłady ŭhavorvali moładź siadzieć doma, to ciapier stymulujuć vyjści na vulicu.

Pryjdziecca pačakać da 18-ci

Usiaho, pavodle padlikaŭ, tak zvanym «kulturnym pašpartam», na jaki vydzialajecca pa 200 jeŭra, mohuć skarystacca 750 tysiač žycharoŭ Niamieččyny, jakija adznačajuć sioleta paŭnalećcie. Pryčym hrošy vydzialajucca tolki ŭ momant, kali spaŭniajecca 18 — kali dzień naradžeńnia budzie ŭ śniežni, to čakać treba da śniežnia. Śpiašacca nie pryjdziecca: hrošy možna patracić na praciahu dvuch hadoŭ.

Usiaho niamieckija ŭłady vydzielili na prajekt 100 miljonaŭ jeŭra — hetych hrošaj chopić prykładna na 60 pracentaŭ ad 750 tysiač 18-hadovych hetaha hoda. Dziaržministr pa pytańniach kultury i miedyja Kłaŭdyja Rot užo zajaviła, što budzie ličyć pośpiecham, kali prapanovaj skarystajecca choć by pałova ad tych, kamu naležać vypłaty.

A ŭ vypadku, kali hrošaj nie chopić i cikavaść budzie bolš, to ŭłady abiacajuć vydzielić dadatkovyja srodki.

• 5
• 0
• 0
• 1
• 2
• 0
• 0
• 0