Alaksiej Dziumin. Što viadoma pra čałavieka, jaki moža zamianić Šajhu
Kandydaturu hubiernatara Tulskaj vobłaści Alaksieja Dziumina daŭno ŭžo nazyvali mahčymym pierajemnikam Pucina. Ale ŭ kantekście apošnich padziej u im bačać zamienu ministru abarony Šajhu. Čam admietny hety čałaviek?
50-hadovy Alaksiej Dziumin maje zvańnie hienierał-pałkoŭnika i ŭ minułym zajmaŭ pasadu namieśnika ministra abarony. Ale na joj Dziumin nie prabyŭ i dvuch miesiacaŭ (z 24 śniežnia 2015 hoda pa 2 lutaha 2016 hoda), paśla čaho byŭ pryznačany hubiernataram Tulskaj vobłaści.
Baćka Alaksieja Dziumina — vajskovy miedyk, hienierał Hienadź Dziumin, u 1990-ja ŭvachodziŭ u najbližejšaje atačeńnie tahačasnaha ministra abarony Rasii (1992-1996) Paŭła Hračova.
Sam Alaksiej Dziumin u dziacinstvie vandravaŭ za baćkam, jaki mianiaŭ miescy słužby, ale heta była nie dalokija Kamčatka i nie Kuška, a rasijskaje Čarnaziemje i Niečarnaziemje. Naradziŭsia Dziumin u Kursku, niejki čas žyŭ u Kałuzie i Varoniežy, u 1994 hodzie skončyŭ Varoniežskaje vyšejšaje vajskovaje inžyniernaje vučylišča radyjoelektroniki. Adrazu paśla zakančeńnia vučylišča jaho skiravali ŭ Maskoŭskuju vajskovuju akruhu, u nievialikuju vajskovuju čaść, jakaja zajmałasia procidziejańniem techničnym srodkam raźviedki praciŭnika.
Takim čynam, pačynaŭ jon jak technar, a nie jak śpiecnazaviec.
Praz hod Dziumin byŭ va ŭpraŭleńni prezidenckaj suviazi Fiederalnaj słužby achovy Rasii.
Paźniej Alaksiej Dziumin pierajšoŭ u Słužbu biaśpieki prezidenta (SBP) i prabyŭ tam da 2007 hoda, kali byŭ pryznačany kiraŭnikom achovy staršyni ŭrada Rasijskaj Fiederacyi Viktara Zubkova (Zubkoŭ pilnavaŭ hetuju pasadu padčas pieraźmienki pierad rakiroŭkaj Pucina i Miadźviedzieva).
Miarkujecca, što ŭ SBP Dziumin daros da asabistaj achovy Pucina.
Kali ŭrad uznačaliŭ Uładzimir Pucin, Dziumin staŭ jaho asabistym adjutantam. U 2012-2014 hadach — namieśnik načalnika ŭpraŭleńnia Słužby biaśpieki prezidenta. Zatym — namieśnik načalnika Hałoŭnaha ŭpraŭleńnia hienieralnaha štaba, kamandujučy Siłami śpiecyjalnych apieracyj, jakija adyhrali adnu z klučavych rolaŭ padčas zachopu Kryma.
Dziumin zabiaśpiečvaŭ biaśpieku Uładzimira Pucina na ŭsich jaho publičnych vystupach i ŭ jakaści premjer-ministra, i prezidenta. Pavodle infarmacyi haziety «Kommiersant», za hady pracy ŭ Słužbie biaśpieki prezidenta Alaksiej Dziumin zarekamiendavaŭ siabie jak čałavieka, «jakomu možna daviarać zadańni i być upeŭnienym u ich vykanańni».
Užo ŭ jakaści hubiernatara Tulskaj vobłaści Alaksiej Dziumin raskazvaŭ, što abaraniać Pucina jamu nibyta davodziłasia i ad dzikich źviaroŭ, u pryvatnaści ad miadźviedzia, jaki prabraŭsia da ŭvachodu prezidenckaj rezidencyi ŭ harach. Nu što ž, vierym.
Pra toje, nakolki Pucin daviaraje Dziuminu, moža śviedčyć adzin epizod, pra jaki pisaŭ žurnalist «Kamsamolskaj praŭdy» Alaksandr Hamaŭ.
Jon apisvaŭ, jak padčas pajezdki Uładzimira Pucina ŭ 2010 hodzie pa Sibiry i Dalokim Uschodzie, jakraz Alaksiej Dziumin prytrymlivaŭ Pucina padčas zaboru probaŭ skury i tłušču ŭ šerych kitoŭ.
«Ja potym hladzieŭ na hety žach. Pucin (a na mory — hajdanka!) z arbaletam celicca ŭ 15-mietrovaha kita, jaki hihanckaj śviečkaj vyskokvaje z mora. Strała — lacić! A pobač z Pucinym — Dziumin, jaki trymaje premjera, abniaŭšy za tułava…» — uspaminaŭ žurnalist.
Pavodle jaho słoŭ, sam Alaksiej Dziumin, kamientujučy hety momant, skazaŭ tak: «Pucin u nas upeŭnieny, jak u sabie».
Jak pisała ŭ svoj čas hazieta «Kommiersant», Dziumin raspracavaŭ i pravioŭ apieracyju ekstrannaj evakuacyi Viktara Janukoviča ŭ noč na 23 lutaha 2014 hoda. Sam Dziumin nazyvaŭ paviedamleńni pra jaho ŭdzieł u hetych padziejach mifami i admaŭlaŭsia ich kamientavać. Ën uvohule nie schilny da miedyjatyzacyi svajoj dziejnaści.
U 2016 hodzie źjaviłasia rasśledavańnie telekanała «Dožd́» pra Alaksieja Dziumina. U im śćviardžałasia, što ŭ śniežni 2014 hoda Alaksiej Dziumin pierasialiŭsia ŭ kvateru ŭ domie №10 u Kałymažnym zavułku ŭ Maskvie płoščaj 344 kvadratnyja mietry.
Rynkavy košt hetaj nieruchomaści, pavodle acenak miedyja, u 2016 hodzie składaŭ 700 miljonaŭ rubloŭ. Adnak Dziumin śćviardžaŭ, što da kvatery nie maje nijakaha dačynieńnia. Jaje ŭładalnik — poŭny jaho ciozka.
Jość jašče adna reč, jakaja ŭmacoŭvaje suviazi Dziumina z Pucinym, — chakiej.
Budučy hienierał pačaŭ zajmacca (i davoli prafiesijna) jašče ŭ čaćviortym kłasie. Paśla škoły jaho navat zaprašali hulać za varoniežskuju kamandu «Buran». Ale jon vybraŭ karjeru vajskoŭca.
Chakiej Dziumin nie pakinuŭ całkam. Ciapier jon uznačalvaje apiakunskuju radu Načnoj chakiejnaj lihi, jakuju zasnavaŭ u 2011 hodzie Uładzimir Pucin.
Tam Dziumin pieravažna hulaje na pazicyi bramnika i, pavodle ŭražańniaŭ niekatorych žurnalistaŭ, jakija prysutničali na matčach hetaj lihi, časam demanstruje vialikaje majsterstva, kab uchilicca ad šajby paśla kidka prezidenta.
U 2015 hodzie Dziumina pryznačyli načalnikam Hałoŭnaha štaba Suchaputnych vojskaŭ, a 24 śniežnia taho ž hoda — namieśnikam ministra abarony.
2 lutaha na toj čas hienierał-lejtenant byŭ pryznačany vykonvać abaviazki hubiernatara Tulskaj vobłaści. U vieraśni jon pieramoh na vybarach hubiernatara.
Treba skazać, što Tulskaja vobłaść jašče z carskich časoŭ była centram vajskova-pramysłovaha kompleksu. Jakraz tam znachodzilisia vialikija abaronnyja pradpryjemstvy, jakija vyrablajuć u tym liku zienitna-rakietnyja kompleksy.
Pačynajučy z 2017 hoda proźvišča hienierała nieadnarazova ŭspłyvała siarod imaviernych pierajemnikaŭ Pucina na pasadzie prezidenta Rasii.
Roznyja krynicy śćviardžajuć, što łajalnaść Dziumina da Pucina i jaho nadziejnaść vysoka ceniacca ŭ Maskvie. Dziumin zastajecca fihuraj, blizkaj da rasijskaha prezidenta. Krynicy ŭ Kramli adznačajuć, što ich źviazvajuć davierčyja adnosiny.
U 2021 hodzie Alaksieju Dziuminu zakrytym ukazam prezidenta Rasii prysvoili zvańnie hienierał-pałkoŭnika.
U kastryčniku 2022 hoda pisali pra toje, što pryznačeńnie tulskaha hubiernatara Alaksieja Dziumina na vyšejšy vajskovy post łabiruje siarod inšych Ramzan Kadyraŭ, jaki maje ŭ svaim rasparadžeńni bajazdolnyja čačenskija čaści. Pisali, što i Jaŭhien Pryhožyn maje dobryja stasunki ź Dziuminym. Ličycca, što hienierała padtrymlivaje pamočnik prezidenta Dźmitryj Mironaŭ, a taksama šmat chto z pradstaŭnikoŭ rehijanalnych uładaŭ.
Padčas niadaŭniaha miaciažu Pryhožyna ŭ miedyja zjaviłasia infarmacyja, što Alaksiej Dziumin asabista jeździŭ na pieramovy ź im. Ale pres-słužba hubiernatara hetu infarmacyju abvierhła.
U toj ža čas Ihar Strałkoŭ (Hirkin) miarkuje, što Dziumin «byŭ niejkim čynam uciahnuty ŭ zmovu». Ën adznačaje, što heta «adziny hubiernatar na šlachu «Vahniera», jaki nie abviaściŭ u vobłaści navat nadzvyčajnaha stanovišča». «Niahledziačy navat na toje, što jon «hałavoj jeść» navat spraŭniej, čym jaho były načalnik pa achovie prezidenta — Zołataŭ, jak iranizuje ŭ svaim dopisie Strałkoŭ.
Strałkoŭ, były pałkoŭnik Fiederalnaj słužby biaśpieki, nievysoka aceńvaje intelektualnyja zdolnaści Dziumina, «u jakoha ŭ hałavie, jak mianie mnohija zapeŭnivali, navat nie apiłki, a sucelny manalit». «Admova Dziumina ad udziełu i padtrymki mieła dadatkova dematyvavać «kuchara» [Pryhožyna] praciahvać baraćbu», — piša Strałkoŭ.
Vybar novaha ministra abarony — niaprostaja zadača dla Uładzimira Pucina va ŭmovach, kali ŭkrainskaja apieracyja akazałasia pravałam, a miaciež «vahnieraŭcaŭ» ahaliŭ raskoł unutry prapucinskich siłaŭ.
Čytajcie jašče:
Kamientary
V principie, Ukraina ničieho nie potieriajet pri naznačienii etoho kłouna ministrom oborony strany-vraha!