«Ja daŭno zrazumieła, kim chaču być». Školnica ź Lidy, jakaja nabrała 400 bałaŭ z 400, raskazała, kudy budzie pastupać
Palina Dyčak zdała na 100 bałaŭ centralizavanyja ekzamieny pa ruskaj movie i chimii, a paźniej atrymała maksimalny vynik na CT pa bijałohii. Atestat u vypusknicy taksama biezdakorny. Takim čynam jana nabrała 400 bałaŭ z 400 mahčymych.
Hetym letam dziaŭčyna płanuje pastupić u Biełaruski dziaržaŭny miedycynski ŭniviersitet. Jana spyniłasia na lačebnym fakultecie. Abituryjentka raskazała, što sioleta BDMU skončyŭ jaje brat, tamu ŭ jaje ciapier jość «žyvy prykład», jak piša «Sputnik».
«Nasamreč daŭno zrazumieła, što chaču być akurat doktaram. Dapamahać ludziam nie kožnamu dadziena, ale ja liču, u mianie jość takaja rysa charaktaru, ja ščyra chaču dapamahčy čałavieku. Upeŭnienaja, što ŭ mianie ŭsio atrymajecca, budu staracca», — kaža Palina.
Jana kaža, što zdavać ispyty było lohka.
«Sioleta, vy viedajecie, byli novaŭviadzieńni: my zdavali CE. Pieršym pradmietam u mianie była ruskaja mova, druhim — chimija. Nie skažu, što chvalavałasia, tolki źlohku, moža. Razumieła, što ad vynikaŭ zaležyć los majho pastupleńnia, majoj budučyni. I, viadoma, treba było apraŭdać padrychtoŭku, jakuju ja viała ciaham apošniaha hoda», — kaža Palina.
Zadańni ŭ testach, jak adznačaje abituryjentka, byli prostymi i zrazumiełymi.
Ale pa jaje słovach, jana nie dumała, što 100 bałaŭ pa kožnym pradmiecie atrymać realna.
«Letaś, darečy, taksama dziaŭčynka ź Lidy nabrała 400 bałaŭ. Ja dumała: jak u jaje tak atrymałasia, niaŭžo takoje mahčyma? Ale ciapier razumieju: jašče jak mahčyma. Ale kali b mnie paŭhoda tamu skazali, što ja atrymaju maksimum na CE i CT, ja b nie pavieryła», — pryznajecca dziaŭčyna.
Da ispytaŭ pa chimii i bijałohii Palina pačała rychtavacca z 10-ha kłasa. Zajmałasia z repietytarami niekalki razoŭ na tydzień. Ruskuju movu vyvučała samastojna, dapamahali vykładčyki ŭ škole. Svaje viedy vypusknica Lidskaj SŠ №16 rehularna praviarała na repietycyjnym testavańni.
«Pa ŭsich troch pradmietach ja ŭžo nabirała 100 bałaŭ na repietycyjnych testavańniach, ale na roznych etapach. Adnak raniej za čas nie radavałasia, razumieła, što hety vynik jašče treba ŭtrymać. Užo kali ŭbačyła maksimalnyja bały na CE i CT, z palohkaj vydychnuła. Usio atrymałasia idealna!» — kanstatuje jana.
Atestat u Paliny taksama biezdakorny — 10 bałaŭ pa kožnym pradmiecie. Jak joj heta ŭdałosia? Na dumku dziaŭčyny, usio prosta.
«Ja zaŭsiody była vydatnicaj ź pieršaha kłasa, mnie prosta padabałasia vučycca. Było i lohka, i cikava. U starejšych kłasach ja zrazumieła, što patrebny vysoki vynik, tamu staranna zajmałasia, kab atrymać 10,0», — zapeŭnivaje lidčanka.
Upadabanyja pradmiety ŭ Paliny — chimija i bijałohija, a nielubimych niama: pa jaje słovach, usio dajecca joj adnolkava dobra.
«Ci liču ja siabie batanikam? Niea! Mnie chapaje času i na vučobu, i na pahulać. Lublu tancavać, niadaŭna skončyła Lidskuju dziciačuju škołu mastactvaŭ. Tak što za padručnikami da poźniaj nočy ja nie siadžu i zubryłkaj nazvać siabie nie mahu», — padkreślivaje jana.
***
Vynik Paliny Dyčak — čaćviorty vypadak u historyi ŭstupnych kampanij u Biełarusi. Hod tamu rekardsmienkaj na CT stała taksama abituryjentka ź Lidy Anastasija Bildź, jakaja pastupiła ŭ hałoŭnuju IT-VNU krainy — BDUIR.
U 2021-m 400 bałaŭ atrymała abituryjentka z Žodzina Anastasija Savaścionak, jakaja paśla stała studentkaj FMA BDU. A ŭ 2018-m maksimalny vynik pakazała dziaŭčyna ź Pinska Anastasija Žaŭnieryk, jakaja taksama stała studentkaj fakulteta mižnarodnych adnosin.
Kamientary
Była b razumnaja i chacieła b stać jakasnym śpiecyjalistam - pastupiła b za miažoj.
Tak usie narmalnyja i robiać.
U Biełarusi nie zastałosia VUZaŭ - adni šyldy. Usie dobryja i vumnyja vykładčyki, chto davaŭ choć niekjki "prestyž" svajmu VUZu,- zvolnieny, zvolnilisia ci siadziać.
Heta FAKT. Mied BHU BHUIR - usie lepšyja ich fakultety prajšli praz čystki....Rektary univieraŭ i fakultetataŭ - khbšnyja haulajtery i stukačy, pa vuzach chodziać mienty. BRSM i studsaviet = łukajuhiend. Majcie choć pavahu da siabie!
z 2020 byŭ čas vyvučyć lubuju inšaziemnuju movu dy pastupić za miažoj.
U Biełarusi pastupajuć tolki tyja kamu plavać na svajo žyćcio. Jašče i raspred budzie na Ch hadoŭ chutka