Kala ŭźbiarežža ZŠA aruduje ahresiŭnaja vydra, jakaja napadaje na siorfinhistaŭ i zabiraje ŭ ich doški FOTY
Žyvioła lubić na doškach katacca i pieryjadyčna ich hryźci. Zusim niadaŭna dla hetaj spravy jana navat zaprasiła paplečnikaŭ.
U navakolnych vodach horada Santa-Kruz, što ŭ amierykanskim štacie Kalifornija, žyvie marskaja vydra, jakaja lubić napadać na siorfinhistaŭ i kraści ich doški. Maleńkaha źviarka zavuć 841, jon naradziŭsia nie ŭ dzikaj pryrodzie, a ŭ zapaviedniku (adtul i takoje niezvyčajnaje imia). Paźniej žyviołu vypuścili ŭ dzikuju pryrodu, paśla čaho jana pačała napadać na siorfieraŭ, bo pryvykła, kab jaje karmili ludzi.
Hetu historyju niadaŭna raspaviało Bi-bi-si.
Miascovyja siorfiery kažuć, što nikoli nie bačyli ničoha takoha, a tym časam u internecie doški z abjavami «Aściarožna! U hetaj miascovaści vodzicca ahresiŭnaja marskaja vydra!» užo vyklikali šmat žartaŭ. Fatohraf Mark Vudvard tym nie mienš zrabiŭ niekalki kadraŭ z vydraj 841, na jakich taja razam sa svaimi surodzičami katajecca na tolki što zachoplenych doškach dla siorfinhu. Na vačach u Vudvarda vydra biaźlitasna hryzła došku, ad jakoj pierad hetym adahnała jaje ŭładalnika.
Pa infarmacyi Bi-bi-si, sama vydra 841 — heta dačka jašče adnoj vydry, jakaja taksama žyła kala bierahoŭ Santa-Kruz i jakuju rehularna častavali ludzi. Nieŭzabavie žyvioła pryvykła da ludziej i ich łasunkaŭ, tamu pačała sama prypłyvać da ludziej. Tak jaje i złavili, a zatym adpravili žyć u Centr vieterynarnaj dapamohi i daśledavańniaŭ marskoj dzikaj pryrody ŭ horadzie Santa-Kruz. Užo tam navukoŭcy chutka zrazumieli, što jana ciažarnaja. Tak i naradziłasia vydra 841. Jana rasła ŭ akijanaryumie Manterej-Bej, dzie daśledčyki pryniali miery zaściarohi, kab luboŭ jaje maci da ludziej nie pieradałasia dačce. Rabotniki padčas razdačy ježy apranali čornyja ponča i zvaračnyja maski, za što ich u centry prazvali «naradam Darta Viejdera». Heta rabiłasia dla taho, kab vydry aścierahalisia, zastavalisia dzikimi i nie pryvykali być zaležnymi ad ludziej.
«Navukoŭcy z akijanaryuma Manterej-Bej dahetul nie ŭpeŭnienyja, čamu vydra 841, jak i jaje maci, nie navučylisia strachu da ludziej. Mahčyma, u jaje było rańniaje pazityŭnaje ŭzajemadziejańnie ź ludźmi, ci jaje znoŭ chtości prykarmiŭ. Moža być, heta prosta mocnyja hieny. Kažuć, što kali hetuju žyviołu tolki vypuścili na volu, to jana dobra spraŭlałasia biez čałavieka, łaviła krabaŭ i navat dałučyłasia da inšych vydraŭ. Ale potym jana pačała padpłyvać blizka da siorfieraŭ, i nieŭzabavie kolkaść vizitaŭ pavialičyłasia», — piša Bi-bi-si.
Aproč taho, žyvioła davoli chutka zrazumieła, što doški dla pačatkoŭcaŭ, jakija zroblenyja ź pienapłastu, bolš zručnyja dla taho, kab ich hryźci. Niadaŭna, pa słovach vidavočcaŭ, vydra «abkusała ŭsie da adzinaj doški, ale bolš za ŭsio joj spadabałasia viasiołkavaja». Takija pavodziny byli niezvyčajnymi. Bolšaść vydraŭ adčuvajuć mocny strach pierad ludźmi, bo hety strach dapamahaje im zastavacca ŭ biaśpiecy.
Na minułym tydni Cłužba achovy rybnaj haspadarki i dzikaj pryrody ZŠA abviaściła, što pačała pošuk vydry 841, kab złavić jaje i pierasialić u zapaviednik. Supracoŭniki słužby šukajuć novy dom dla vydry i kažuć, što takija pavodziny mahli raźvicca z-za harmanalnych usploskaŭ paśla niečakanaj źmieny asiarodździa.
U słužbie taksama dadali, što paćvierdžanych paviedamleńniaŭ ab traŭmach u ludziej z-za vydry niama, ale jana ŭžo paśpieła papsavać i skraści niekalki došak, tamu siorfieram i bajdaračnikam, jakija adpačyvajuć u hetym rajonie, treba być uvažlivymi, im rajać nie nabližacca da vydry.
Ciapier čytajuć
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju22
Kamientary