Na jehiera zaviali kryminałku, jon zvolniŭsia i zapłacić bolš za 6400 rubloŭ kampiensacyi, choć jon usiaho tolki zabraŭ z darohi miortvuju vydru.
Kala vadajoma pobač ź vioskaj Izabelina Maładziečanskaha rajona 48-hadovy jehier Tavarystva palaŭničych i rybałovaŭ padabraŭ miortvaha samca račnoj vydry. Suprać mužčyny raspačali kryminalnuju spravu, piša mlyn.by.
Prakuratura Maładziečanskaha rajona nakiravała ŭ sud kryminalnuju spravu, raspačatuju pa druhoj častcy artykuła 282-1 «Niezakonnaje pieramiaščeńnie (transparciroŭka) zahinułaj dzikaj žyvioły, jakaja adnosicca ŭ adpaviednaści z zakanadaŭčymi aktami da abjektaŭ palavańnia».
Złačynstva karajecca štrafam abo aryštam, abo abmiežavańniem voli na termin da dvuch hadoŭ, abo pazbaŭleńniem voli na termin da troch hadoŭ.
Abvinavačany raniej sudzimy nie byŭ. Mužčyna žanaty, u jaho troje niepaŭnaletnich dziaciej. Na papiarednim rasśledavańni fihurant raskazaŭ śledčamu, što 4 sakavika jon spyniŭsia kala voziera, kab pravieryć taŭščyniu lodu, pakolki nazaŭtra źbiraŭsia na rybałku.
Na abočynie darohi ŭbačyŭ miortvuju račnuju vydru, jakuju, na jaho dumku, źbiła mašyna. Jon zabraŭ jaje.
«Pry hetym jon razumieŭ, što parušaje zakon, nie aformiŭšy dla pieravozki nieabchodnuju dakumientacyju, ale błankaŭ pry sabie nie było, i mužčyna vyrašyŭ advieźci miortvuju žyviołu dadomu, kab tam, ź jaho słoŭ, aformić dakumienty», — piša vydańnie.
Ale pa darozie jaho spynili supracoŭniki DAI.
Zhodna z zakanadaŭstvam, škoda, pryčynienaja navakolnamu asiarodździu niezakonnaj transparciroŭkaj adnoj vydry padlahaje kampiensacyi ŭ pamiery 200 bazavych vieličyń (6400 rubloŭ). Abvinavačany pavinien kampiensavać škodu i adkaža pa kryminalnym artykule.
Kiraŭnik Maładziečanskaj rajonnaj arhanizacyjnaj struktury Biełaruskaha tavarystva palaŭničych i rybałovaŭ patłumačyŭ śledčamu, što paśla ździajśnieńnia hetaj praviny jehier zvolniŭsia, i niezrazumieła, dla čaho jamu ŭvohule patrebnaja była miortvaja vydra, bo jaje miasa nieprydatnaje dla ježy, a futra vialikaj kaštoŭnaści nie maje.
Kamientary