«Vychad z SSSR byŭ niezakonnym, usie naležać nam». Rasijski deputat pradrakaje vajnu z usimi byłymi savieckimi respublikami, navat ź Biełaruśsiu

Pavodle deputata partyi «Adzinaja Rasija» i prychilnika «ruskaha śvietu» Jaŭhiena Fiodarava, Rasija budzie vymušanaja vajavać z usimi byłymi savieckimi respublikami, niahledziačy na ŭzrovień ich łajalnaści, kab całkam «viarnuć» ich u svoj terytaryjalny skład.

Pra heta adzinaros zajaviŭ dvojčy (7 i 14 vieraśnia) u prakramloŭskich telehram-kanałach. 

U jakaści arhumientaŭ deputat pryvodzić toje, što «Rasiju pryznali pravapierajemnicaj SSSR, a ŭsie astatnija savieckija respubliki stali niezaležnymi ŭ abychod zakona Savieckaha Sajuza i ciapier majuć kanflikty z Rasijaj». 

Tamu, pa mierkavańni Fiodarava, usie pavinny viarnucca ŭ skład Rasii («bo jana i jość SSSR») i pry žadańni znoŭ pasprabavać adździalicca, «ale pa zakonie, uličvajučy toje, što Rasija moža i nie zachacieć ich adpuskać».

Kali admoviacca, to ich čakaje vajna, pahražaje kiraŭnik NOD.

«Usie respubliki vyjšli sa składu SSSR niezakonna, i Rasii rana ci pozna daviadziecca vajavać z usimi. Naprykład, ź Biełaruśsiu heta budzie nie siońnia. Z Hruzijaj užo vajavali, z Ukrainaj vajujem ciapier. Heta ŭ poŭnaj stupieni datyčyć i Armienii.

Treba hladzieć na rečy realna: Rasija i jość SSSR, respubliki parušyli zakon № 1409 i vyjšli biez refierendumaŭ, zabraŭšy z saboj nie svaje terytoryi. Tamu i buduć kanflikty, pakul jany nie viernucca da nas i nie buduć dziejničać pa zakonie. Rasija moža ich i adpuścić, ale heta pieraškodzić našamu vyžyvańniu», — zajaviŭ adzinaros Fiodaraŭ.

Na jaho dumku, suvierenitet byłych savieckich respublik mahčymy «tolki pa žadańni Rasii», a taksama na ŭmovach «nieŭstupleńnia ŭ varožyja błoki i poŭnaha kantrolu Rasii nad ich vajskovym siektaram». Inakš kanflikty nie spyniacca, a miežy Rasii nie buduć adnoŭlenyja, ličyć kiraŭnik NOD.

Nijakaj reakcyi z boku režymu Łukašenki na hetyja słovy Fiodarava nie było.

Pavialičyć

Što nie tak z zajavami i arhumientacyjaj Fiodarava?

Amal usio. 

Pačynajučy z taho, što jašče ŭ 1991 hodzie sama Rasija (tady RSFSR) na čale z tahačasnym jaje prezidentam Barysam Jelcynym była adnoj ź pieršych, chto vyjšaŭ sa składu SSSR biez usialakich refierendumaŭ i pierachodnych pieryjadaŭ, što zabaroniena zakonam SSSR № 1409, na jaki spasyłajecca adzinaros Fiodaraŭ. Kamunisty sprabavali admianić heta siłaj i prajhrali.

U tym ža hodzie Rasija, Biełaruś i Ukraina padpisali Biełaviežskija pahadnieńni ab kančatkovym spynieńni isnavańnia SSSR, a taksama ab uzajemapavazie suvierenitetu i terytaryjalnaj cełasnaści respublik. Mižnarodnaja supolnaść adrazu pryznała niezaležnaść usich byłych respublik Sajuza.

Rasija abjaviła siabie pravapierajemnicaj SSSR tolki pa mižnarodnych abaviazańniach (naprykład, jana atrymała ŭ spadčynu miesca pastajannaha člena Rady Biaśpieki AAN), a taksama pa pytańniach majomaści i daŭhoŭ Savieckaha Sajuza. Terytaryjalna RF pa zakonie zastavałasia takoj ža, jak i RSFSR na momant vychadu z Sajuza (bieź Biełarusi, biez Ukrainy z Krymam i Danbasam, biez astatnich respublik).

A kali brać prapahandyscki naratyŭ ab tym, što «respubliki nie pavinny byli pakidać sabie terytoryi, što da SSSR im nie naležali», to pa toj ža łohicy Rasija pavinna admovicca ad Kalininhradskaj vobłaści, Kurylskich astravoŭ, Prydniastroŭja i mnohich inšych terytoryj (u pieršuju čarhu tych, što jana akupavała z 2014 pa 2023 hod va Ukrainie).

U cełym pahrozy Jaŭhiena Fiodarava ab niepaźbiežnych vojnach z usimi byłymi savieckimi respublikami za viartańnie ich u skład Rasii nie vytrymlivajuć nijakaj krytyki. 

Rasija z usimi svaimi mahčymaściami prajhraje ŭ vajnie navat z adnoj byłoj savieckaj respublikaj i tamu prosić dapamahčy ŭzbrajeńniami izalavanyja i ekanamična słabyja tatalitarnyja režymy.

• 5
• 0
• 29
• 21
• 3
• 3
• 63
• 0