Homielskaha žurnalista Andreja Tołčyna vinavaciać u škodzie intaresam nacyjanalnaj biaśpieki
Žurnalista zatrymali dva tydni tamu i asudzili na troje sutak, ale na volu jon nie vyjšaŭ.
Stała viadomaj imaviernaja pryčyna zatrymańnia ŭ Homieli byłoha žurnalista-fryłansiera, demakratyčnaha aktyvista Andreja Tołčyna. Jaho abvinavačvajuć pavodle art. 361-1 Kryminalnaha kodeksa — «Zakliki da dziejańniaŭ, nakiravanych na naniasieńnie škody nacyjanalnaj biaśpiecy Respubliki Biełaruś», piša BAŽ.
Sankcyi pavodle artykuła — da troch hadoŭ pazbaŭleńnia voli. Kali ž budzie pryznana, što takija dziejańni ŭčynienyja z vykarystańniem ŚMI albo internetu, to pakarańnie moža być ciažejšym — da piaci hadoŭ niavoli.
Siłaviki zatrymali 63-hadovaha Andreja Tołčyna naprykancy vieraśnia i źmiaścili ŭ izalatar časovaha ŭtrymańnia. Na nastupny dzień paśla zatrymańnia ŭ kvatery, dzie Andrej žyŭ z žonkaj, praviali pieratrus. Śledčyja zabrali kampjutarnuju techniku dy inšyja ličbavyja nośbity. Tłumačyli žoncy, što pieratrus ładziŭsia nibyta ŭ miežach spravy za ekstremizm.
Nieŭzabavie paśla pieratrusu Tołčyna pieraviali ŭ SIZA-3 na vulicy Knižnaj.
Andrej Tołčyn u demakratyčnym asiarodku Homiela staŭ zaŭvažnaj asobaj jašče ŭ 90-ch hadach, kali Biełaruś zdabyvała svaju niezaležnaść. Pracavaŭ tady naładčykam aparatury na radyjozavodzie «Pramień». Udzielničaŭ u niezaležnym prafsajuznym ruchu, jaki vystupaŭ za abaronu pravoŭ rabočych. Na demakratyčnaj asnovie abiraŭsia deputatam Homielskaha haradskoha savieta 21-ha sklikańnia — heta akurat toj saviet, adzin z dvuch u Biełarusi, jaki ŭ žniŭni 1991 hoda adkryta vystupiŭ suprać kamunistyčnaha dziaržaŭnaha pieravarotu ŭ Maskvie i vitaŭ abviaščeńnie niezaležnaści Respubliki Biełaruś.
U harsaviecie Andrej uvachodziŭ u kamisiju pa suviaziach z hramadskaściu i ŚMI, pracavaŭ śpiecyjalistam. Jon byŭ siabram źlikvidavanaj ciapier uładami Abjadnanaj hramadzianskaj partyi, praciahły čas ačolvaŭ haradskuju arhanizacyju hetaj partyi. Apiekavaŭsia dziejnaściu demakratyčnych dabračynnych fondaŭ. Źviedaŭ taksama i biespracoŭje.
Paśla vybaraŭ 2010 hoda Tołčyn u jakaści videaapieratara supracoŭničaŭ ź niezaležnymi miedyjaresursami, za što jaho šmat razoŭ štrafavali i navat adpraŭlali «na sutki» za kraty pavodle administracyjnych pratakołaŭ. U 2020 hodzie Tołčyna zatrymlivali razam z žurnalistkaj Łarysaj Ščyrakovaj za aśviatleńnie pratestaŭ, aficyjna — za ŭdzieł u masavych biesparadkach.
Śviatłana Cichanoŭskaja — Marynie Zołatavaj: Ty pieramožaš i ŭ hetym marafonie!
U listach z-za krataŭ palitźniavoleny žurnalist Andrej Kuźniečyk raskazvaje pra toje, jak śnić Minsk
«Dačka budzie padavać prašeńnie ab pamiłavańni, jana i tak naciarpiełasia…» — baćki źniavolenaj žurnalistki Ksienii Łuckinaj
Ciapier čytajuć
«Byŭ upeŭnieny, što ja niedatykalnaja asoba dla rasijan». Pieršaje intervju Jurasia Ziankoviča na svabodzie14
Kamientary