U Słucku ŭ mai zdali šmatpaviarchovik, u jakim niemahčyma žyć. Na domie — vielmi trapny murał

Žychary doma źviarnulisia pa dapamohu adrazu z tryma prablemami. Heta adsutnaść aciapleńnia, niepracujučyja ŭ dzieviacipaviarchoviku lifty i damafonnaja sistema.

— Z 13 kastryčnika ŭ nas u domie pačali padavać aciapleńnie, ale batarei narmalna nie nahravajucca, jany praktyčna chałodnyja. Nieadnarazovyja zvanki ŭ ŽEU nie dali nijakaha vyniku. Nam kažuć, što ŭ domie staić aŭtamatyčnaja sistema abahravańnia, a ŭ padvale jość niejkija datčyki, jakija ŭ zaležnaści ad tempieratury na vulicy rehulujuć tempieraturu ŭ batarejach. I my pavinny paciarpieć, pačakać, kali na vulicy pachaładaje i batarei pačnuć nahravacca, — paviedamlaje žycharka doma. — Ciapier nočy vielmi chałodnyja, a batarei ŭ mianie «nulavyja», nijakaha ciapła nie dajuć.

Ale rachunak mnie ŭsio roŭna vystaviać. Dyk čamu ja pavinna płacić za aciapleńnie, jakoha niama? Naš dom zdali ŭ mai, a ŭ nas da hetaha času niama damafona, nie pracuje lift, dyk jašče i batarei chałodnyja».

— Choład žudasny, batarei letnija. Dzieci śpiać u štanach, u škarpetkach i pad dźviuma koŭdrami. Pra bardak u padjeździe ja ŭvohule maŭču. Načalnica ŽEU-5 skazała: «Vaźmicie vienik i padmiacicie». Rabotniki da nas chodziać, a tołku niama, — raspaviała inšaja žycharka doma.

— My atrymali kvateru na Barysaŭca, 15, ale žyć tam niemahčyma. Haračuju vadu na vierchnich pavierchach treba spuskać hadzinu, lift nie pracuje, nichto da hetaha času nie daje adkazu, kali naohuł jon zapracuje. Ale bolš za ŭsio pryvodzić u šok, što da hetaha času batarei ŭ kvatery chałodnyja, — paćviardžaje słovy žycharoŭ jašče adna žančyna.

Karespandentka SlutskGorod pasprabavała razabracca ŭ situacyi i pierš za ŭsio patelefanavała ŭ ŽEU-5, na jaki skardzilisia žychary.

Mužčyna na inšym kancy provadu paviedamiŭ, što ŭ hety momant načalnik adsutničaje, ale jamu viadoma, što bryhada rabotnikaŭ pavinna pryjści zaŭtra, 19 kastryčnika, kab pačać puskanaładačnyja raboty.

— Vychodzić, jašče adnu noč ludzi vymušanyja znachodzicca ŭ choładzie? — udakładniła karespandentka.

Na takoje pytańnie adkazu ŭ supracoŭnika ŽEU nie znajšłosia, i trubku pieradali inžynieru.

Razmova atrymałasia niepryjemnaja, jak piša vydańnie, bo pracaŭnica arhanizacyi ad pramych pytańniaŭ uchilałasia, padvyšała ton i naohuł prapanavała napisać zvarot na elektronnuju poštu.

— Nakont lifta i damafona źviartajciesia ŭ słužbu zakazčyka. Kaniec suviazi, — adkazała supracoŭnica i pakłała trubku.

Razam z tym u Słuckaj ŽKH karektna rastłumačyli, što sistema aciapleńnia ŭ domie sučasnaja, aŭtamatyčnaja, i mała chto z rabotnikaŭ pradpryjemstva ź joj znajomy. U suviazi z tym, što budaŭnictvam doma zajmałasia UKB, pieršyja puskanaładačnyja raboty aciaplalnaj sistemy pavinien ździejśnić padradčyk. Jany zapłanavanyja na čaćvier, 19 kastryčnika.

Historyja ź liftam, jak vyśvietliłasia, jašče bolš składanaja. Pa hetym pytańni ŭ słužbie zakazčyka rastłumačyli, što dom sapraŭdy byŭ zdadzieny ŭ mai, ale «pad kryło» arhanizacyi pierajšoŭ tolki ŭ siaredzinie leta. Adnak da hetaha času zapusk lifta nie byŭ zrobleny z pryčyny adsutnaści adkaznaj asoby — i, jak vynik, adsutnaści rehistracyi.

— Z momantu pieradačy nam doma było praviedziena šeść tarhoŭ, ale ŭdzielničać u ich padradčyki čamuści nie chočuć. Admaŭlajecca navat naš «Liftservis». Nie viedajem, z čym heta źviazana. Apošnija tarhi zakančvajucca 3 listapada, i kali da taho času padradčyk nie znojdziecca, mahčyma, daviadziecca vyrašać prablemu inšymi šlachami, — adkazali vydańniu ŭ słužbie zakazčyka.

Što da damafonnaj sistemy, to tut žycharam prapanavali zaklučyć dahavory z adnoj z arhanizacyj, jakija hetym zajmajucca. U Słucku ich bolš za piać, adrasy vydańnie paznačyła.

Admietna, što na takim domie, u jakim «niemahčyma žyć», vielmi simvaličny murał — z vyratavalnikam.

• 3
• 0
• 9
• 11
• 1
• 7
• 11
• 0