Novy prezident Arhienciny choča vyjści z BRIKS, kudy kraina tolki što ŭstupiła
Prezidentam Arhienciny staŭ libiertaryjaniec Milej, jaki ŭ svajoj kampanii rabiŭ staŭku na tyktok.
Ultrapravy palityk Chaŭjer Milej, jaki nie ličyŭsia favarytam druhoha tura prezidenckich vybaraŭ u Arhiencinie, niečakana pieramoh, nabraŭšy bolš za 56% hałasoŭ vybarščykaŭ, paviedamlaje Bi-bi-si.
Jaho supiernik, ministr ekanomiki Sierchia Masa pryznaŭ parazu i pažadaŭ pośpiechaŭ novamu lidaru.
«Vidavočna, što vyniki nie tyja, na jakija my spadziavalisia, i ja pahavaryŭ z Chaŭjeram Milejem, kab pavinšavać jaho i pazyčyć jamu ŭsiaho dobraha, bo jon — prezident, jakoha bolšaść arhiencincaŭ abrała na nastupnyja čatyry hady», — skazaŭ Masa.
53-hadovuju zorku tyktoka, muzykanta, ekanamista i televiadučaha z uskudłačanymi vałasami i hustymi bakienbardami paraŭnoŭvali z byłym prezidentam ZŠA Donaldam Trampam i eks-prezidentam Brazilii Žairam Bałsanaru z-za jaho rezkaha stylu i supiarečlivych vykazvańniaŭ.
Jon, u pryvatnaści, zaklikaŭ «kinuć chvory piesa (hrašovaja adzinka Arhienciny — NN) dziela dalara ZŠA «i abiacaŭ spalić Centralny bank, kab pakončyć z «rakam inflacyi».
Milej vystupaŭ suprać abortaŭ, za prava hramadzian mieć ahniastrelnuju zbroju, abiacaŭ razarvać suviazi z Kitajem, a taksama staviŭ pad sumnieŭ kolkaść achviar vajennaj dyktatury 1970-ch i admaŭlaŭ, što pryčynaj źmieny klimatu źjaŭlajecca dziejnaść čałavieka.
Pierad druhim turam jon źmienšyŭ abaroty svajoj rytoryki, kab pryciahnuć bolš umieranych vybarščykaŭ, ale ŭ pačatku pieradvybarnaj kampanii vyjšaŭ na scenu z uklučanaj bienzapiłoj, simvalizujučy radykalnyja źmieny, jakija jon płanuje pravieści ŭ dziaržavie, jakaja pakutuje ad ekanamičnych prablem.
Jaho słovy ab uviadzieńni dalara ZŠA ŭ jakaści aficyjnaj valuty ŭ krainie byli sustretyja apładysmientami prychilnikaŭ, u toj čas jak mnohija ekanamisty kazali ab finansavaj katastrofie.
U krainie, dzie hadavaja inflacyja ciapier pieravyšaje 140%, a dvoje ź piaci čałaviek žyvuć u biednaści, jaho pieramoha dakazvaje, što arhiencincy sytyja pa horła tradycyjnaj palitykaj i ekanamičnymi katastrofami — i hatovyja pasprabavać niešta novaje ŭ sprobie zrabić svajo žyćcio lepšym.
Milej nieadnarazova zajaŭlaŭ, što nie maje namieru raźvivać miždziaržaŭnyja adnosiny z Brazilijaj, Kitajem i Rasijaj z-za niazhody z palitykaj hetych dziaržaŭ. Jon ličyć Izrail i ZŠA pryjarytetnymi sajuźnikami Arhienciny.
U vieraśni jon zajaŭlaŭ: «Ja nie budu vieści biźnies nie tolki z Kitajem, ja nie budu vieści biźnies ni z adnym kamunistam. Ja abaronca svabody, miru i demakratyi. Kamunisty, kitajcy da hetaha nie adnosiacca. Prezident Rasii Uładzimir Pucin taksama nie ŭvachodzić u lik abaroncaŭ svabody, miru i demakratyi. Prezident Brazilii Łuła da Siłva taksama tudy nie ŭvachodzić. My chočam być maralnym majakom kantynienta. My jak dziaržava nie budziem prasoŭvać nijakich sumiesnych dziejańniaŭ ni z kamunistami, ni z sacyjalistami».
Daradca Mileja ŭ pytańniach zamiežnaj palityki Dyjana Mandzina ŭ kancy kastryčnika paviedamiła, što aljans «Svaboda nadychodzić» ciapier nie bačyć sensu va ŭdziele Arhienciny ŭ BRIKS, kudy kraina była pryniataja pavodle vynikaŭ samitu hrupy, jaki prajšoŭ u žniŭni.
Jak adreahavali ŭ śviecie
Prezident Brazilii Łuis Inasiu Łuła da Siłva, jakoha Milej padčas pieradvybarnaj kampanii nazyvaŭ «złosnym kamunistam», adnym ź pieršych pazyčyŭ novym uładam pośpiechu.
«Arhiencina — vialikaja kraina i zasłuhoŭvaje našaj pavahi. Brazilija zaŭsiody budzie hatovaja da sumiesnaj pracy z našymi arhiencinskimi bratami», — napisaŭ jon u sacsietcy X.
Prezident Kałumbii Hustava Pietra zajaviŭ, što vynik vybaraŭ «sumny dla Łacinskaj Amieryki».
«U nealibieralizmu bolš niama prapanoŭ dla hramadstva, jon nie moža adkazać na biahučyja prablemy čałaviectva», — zajaviŭ jon.
Prezident Čyli Habryel Boryč zajaviŭ, što vitaje pieramohu Mileja, a Sierchia Masa padziakavaŭ, pryznaŭšy parazu.
«Ja zyču arhiencinskamu narodu ŭsiaho najlepšaha i viedaju, što jon zaŭsiody budzie karystacca našaj pavahaj i padtrymkaj», — napisaŭ jon.
Pavinšavaŭ Mileja i Donald Tramp.
«Uvieś śviet naziraŭ! Ja vielmi hanarusia taboj. Ty pieraviernieš svaju krainu i sapraŭdy zrobiš Arhiencinu znoŭ vialikaj», — zajaviŭ jon.
Na pasadu novy prezident ustupić 10 śniežnia. Prezident Arhienciny Albierta Fiernandes skazaŭ, što hatovy pačać pieradaču spraŭ novamu lidaru, ale ź pieramohaj jaho vinšavać nie staŭ.
Ciapier čytajuć
«Usio tak ci inakš budzie vyrašacca na poli boju». Čym budzie zajmacca novaja kiraŭnica Misii demakratyčnaj Biełarusi va Ukrainie?14
Kamientary