«U pytańni «biełarusy nie roŭna rasijanie» kropka ŭ Litvie nie pastaŭlena». Labiedźka raskazaŭ, pra što havaryli na pasiadžeńni parłamienckaha kamiteta

— My zadavolenyja sustrečaj. Heta byli słuchańni ŭ Kamitecie pa mižnarodnych pytańniach, z udziełam čalcoŭ hrupy «Za demakratyčnuju Biełaruś» Siejma Litvy.

Zaraz vielmi napružany čas dla parłamientaryjaŭ, pierad vakacyjami ŭ ich vielmi ščylny paradak dnia, ale, kali my vyjšli z prapanovaj takich słuchańniaŭ, to dla nas znajšli «akienca», i heta byŭ čas ich pierapynku na abied — to-bok deputaty nie pajšli na abied, a pajšli razmaŭlać pra Biełaruś.

Sustreča prachodziła ŭ farmacie Chatham house, tamu ja nie mahu cytavać udzielnikaŭ. Mahu tolki skazać, što ź biełaruskaha boku śpikierkaj była Śviatłana Cichanoŭskaja, jakaja dakładna vykazałasia: nielha pamiž biełarusami i rasijanami siońnia stavić znak roŭnaści.

Pavialičyć

— Ci pravilna ja razumieju, što asnoŭnym pytańniem hetaj sustrečy było ŭraŭnoŭvańnie biełarusaŭ i rasijan u sankcyjnych abmiežavańniach?

— Heta adzinaje pytańnie. My adrazu skazali, što my nie idziem davać niejkija «pušystyja» zapeŭnieńni litoŭskamu boku, i nie chočam tolki dobrych słoŭ ad ich. My pavinny razmaŭlać vielmi ščyra pa vielmi kankretnym pytańni.

Hetaje pytańnie nie vielmi prostaje, ale dobrym znakam było, što litoŭskija deputaty pahadzilisia i achviaravali svaim volnym časam. Byli amal usie čalcy kamiteta. I cikavaść była vysokaj. My damovilisia pra nastupnyja kroki, ale ja pakul nie chacieŭ by ich nazyvać.

— A temu «lićvinizmu» uzdymali?

— Było i heta pytańnie. My zrabili prapanovu, kab praciahnuć hetuju razmovu. My chutka anansujem, što my damovilisia razam zrabić.

— Tema ŭraŭnoŭvańnia biełarusaŭ i rasijan u sankcyjnych abmiežavańniach užo abmiarkoŭvałasia ŭ Siejmie. I niekalki miesiacaŭ tamu, zdajecca, u joj była pastaŭlena kropka, kali deputaty adchilili vieta prezidenta Naŭsiedy pa adpaviednych źmienach u zakanadaŭstva. Čamu zaraz hetaja tema znoŭ źjaviłasia?

— Jakraz kropka i nie była pastaŭlena. Kropka była pastaŭlena ŭ kankretnych prapanovach, jakija byli sfarmulavanyja i ŭniesienyja ŭ Siejm prezidentam. Ale pa pytańni «biełarusy nie roŭna rasijanie» kropki pastaŭlena nie było, i my pra heta jakraz havaryli.

I znoŭ projdzie niejki čas — i znoŭ hetyja dyskusii ŭźniknuć u infarmacyjnaj prastory. Kali b siońnia było hałasavańnie ŭ Kamitecie pa mižnarodnych pytańniach, to prapanovy, jakija zaraz znachodziacca ŭ Siejmie, jany b nie prajšli. Kali b było pasiadžeńnie plenarnaje, hetyja b prapanovy nie prajšli.

Čaho čakać? Roznyja scenary. Moža być i taki, što papraŭki tak i zastanucca na ŭzroŭni prapanoŭ i nie pojduć dalej pa pracedurach.

— A jaki ahulny nastroj byŭ na hetym pasiadžeńni? Ci była niejkaja varožaść, niejkija pretenzii da biełarusaŭ?

— Pretenzij uvohule nie było. Było šmat pytańniaŭ, jakija tyčylisia roznych aśpiektaŭ, ale dakładna heta nie byli paproki. Nastroj byŭ pracoŭny, pazityŭny.

• 15
• 0
• 2
• 0
• 1
• 0
• 4
• 0