Siamja tydzień prachodziła śviatočny kvest ad Minharvykankama. Padarunak vas ździvić
Staličnyja čynoŭniki vyrašyli pakreatyvić dy zrabili śviatočny kvest «Razam ź Minskam u 2024 hod». Udzielnikam prapanoŭvałasia naviedać 21 łakacyju ŭ Minsku — heta byli i handlovyja abjekty, i pradpryjemstvy, i zabaŭlalnyja placoŭki.
Dla taho, kab atrymać pryz kala Pałaca sportu (tam byŭ finiš), treba było adznačycca chacia b na dziesiaci punktach. Błohierka pad nikam polinka.drozd razam ź siamjoj tydzień prachodziła hety kvest i dzialiłasia ŭražańniami ŭ tyktoku. A potym pachvaliłasia padarunkami, jakija atrymała.
Siurpryz čakaŭ dziaŭčynu ŭžo na pieršaj łakacyi — siamja pajechała ŭ domik Dzieda Maroza ŭ park Horkaha. Vyśvietliłasia, što prosta tak zajści da kazačnych piersanažaŭ niemahčyma — patrebna atrymać dazvoł u administracyi parku. Tam ža stavili štamp u fłajer (paćviardžeńnie, što ludzi byli na łakacyi). Biełaruskija čynoŭniki ŭmiejuć zrabić kvest u kveście!
U administracyi dziaŭčynie stvaryli «śviatočny nastroj» pa-biełarusku: tam joj pračytali lekcyju, što treba było zapisacca da Dzieda Maroza (a heta płatnaja pasłuha).
U vyniku siamji ŭsio ž dazvolili zrabić adzin fotazdymak ź Dziedam Marozam i Śniahurkaj.
Druhoj łakacyjaj staŭ handlovy centr «Stalica». Taksama siamja naviedała Lidbeer Dvor, Muziej haradskoha pasažyrskaha transpartu, kaviarniu «Kamunarki», Muziej hadzińnikavaj spravy Biełarusi, naziralnuju placoŭku Nacyjanalnaj biblijateki, fudmoł «Kankors», handlovy centr «Halereja».
Apošniaj, dziasiataj łakacyjaj staŭ śviatočny kirmaš kala Pałaca sportu. Tam błohierka atrymała padarunki dla ŭsich — im uručyli paduški z frazami Łukašenki «Lubimuju nie addajuć», «Raspranajsia i pracuj».
— Hałoŭny pryz my atrymali — heta tydzień jarkich emocyj usioj siamjoj, — adznačyła błohierka. — Dźvie paduški pasielacca na kanapie, ja ŭžo zamoviła navałočki dla ich. A jašče dźvie z pravakacyjnymi nadpisami «Raspranajsia i pracuj» pasielacca ŭ nas u spalni.
Ciapier čytajuć
Jakaja łohika sudoŭ za Hajun? Mužčyna, jakoha zatrymlivali pa hetaj spravie, apisaŭ ubačanaje19
Kamientary