Na dziaržaŭnyja pradpryjemstvy pryjšli novyja śpisy na represii ad KDB
Jak stała viadoma «Našaj Nivie», u dziaržaŭnyja pradpryjemstvy, u tym liku ŭstanovy adukacyi i achovy zdaroŭja, pryjšli novyja «čornyja» śpisy supracoŭnikaŭ, padrychtavanyja orhanami dziaržbiaśpieki. Ad kiraŭnictva arhanizacyj patrabujecca zvalniać ludziej na padstavie ŭdziełu ŭ akcyjach pratestu, danataŭ, kamientaroŭ i inšych formaŭ vykazvańnia niazhody z łukašenkaŭskaj uładaj ci salidarnaści z demakratyčnym rucham.
Takich rassyłak było ŭžo niekalki, usie jany pryvodzili da masavych zvalnieńniaŭ u arhanizacyjach, padparadkavanych dziaržavie.
I voś napiaredadni Novaha hoda adbyłasia novaja rassyłka ad KDB, u jakoj pieraličanaja čarhovaja «partyja» tych rabotnikaŭ, jakija trapili ŭ pole zroku orhanaŭ.
Nam dakładna viadoma pra takija rassyłki ŭ bankach, ustanovach adukacyi i achovy zdaroŭja. Tych, chto ŭ śpisach, zvalniajuć. Zastacca na dziaržaŭnaj rabocie možna tolki ŭ vypadku matyvavanaj pratekcyi z boku kiraŭnictva, budučy, naprykład, niezamiennym śpiecyjalistam.
Pa słovach tych, chto bačyŭ śpisy, KDB udaskanaliła svoj ałharytm vyličeńnia ludziej pa mabilnych sotach. Raniej sistema vydavała pamyłki, i ŭ śpisy čaściakom uklučalisia tyja, chto žyŭ u rajonie praviadzieńnia akcyj 2020 hoda abo byŭ vypadkovym minakom.
Ciapier ža tyja abanienty, jakija «trapilisia» na adnoj akcyi, prahaniajucca praz bazy abanientaŭ akcyj u inšyja dni, što pavyšaje dakładnaść vyznačeńnia.
Taksama ŭ śpisy traplajuć ludzi, jakija pisali kamientary ŭ pratesnych čatach abo ŭ telehram-kanałach.
Jašče adnaja nahoda — ustanoŭka pieravodu hrošaj u fondy padtrymki paciarpiełych abo ŭ bok demakratyčnych arhanizacyj. U takim vypadku čałavieka taksama zvalniajuć, ale paśla vypłaty pa multyplikatary (da stokratnaha) u biudžet.
Acanić chacia b prykładnuju kolkaści ludziej u novaj chvali śpisaŭ niemahčyma.
«Kali vy nie napišacie pa ŭłasnym žadańni, zvolniać nas». Palityčnyja zvalnieńni nie spyniajucca
U Homielskim dramatyčnym teatry — kadravyja čystki. Znoŭ praz «palityku»
«Nichto nie kazaŭ, što nazad nielha brać». Kiraŭniki raskazvajuć, jak vykručvajucca padčas zvalnieńniaŭ za palityku
«Pracavać niama kamu». Na biełaruskaj čyhuncy — novaja chvala palityčnych zvalnieńniaŭ (dabralisia i da kiraŭnictva)
Kamientary