Błohierka Volha Takarčuk, jakaja terminova źjechała ź Biełarusi z baćkam, prosić ab dapamozie

«Mianie zavuć Takarčuk Volha. Ja błohierka. Maja historyja pačałasia z momantu, kali Siarhiej Cichanoŭski vyrašyŭ vyłučycca kandydatam u prezidenty Respubliki Biełaruś. Ja tady hladzieła jahonaje videa i razumieła, što nie mahu zastacca ŭ baku.

Paźniej, kali Siarhieja zatrymali i zamiest jaho vyłučyłasia Śviatłana, ja zapisała niekalki emacyjnych videa, jakija zaŭvažyli ludzi, i pačali padpisvacca. Tak ja niečakana dla siabie stała błohierkaj.

Taksama ja była niezaležnaj naziralnicaj. A paśla vybaraŭ nie prapuściła nivodnaha maršu, uklučajučy maršy piensijanieraŭ. Ja zapisvała matyvavalnyja videa, kab u ludziej nie apuskalisia ruki, i kab jany nie spynialisia vieryć u pieramohu. Na žal, videa z majho kanała na YouTube daviałosia vydalić dziela biaśpieki tych, chto patrapiŭ u kadr.

U studzieni 2021 hoda mianie pieršy raz zatrymali pa artykule 23.34 (art 23.34 KaAP RB — parušeńnie paradku arhanizacyi abo praviadzieńnia masavych mierapryjemstvaŭ). Paśla jašče raz, i jašče. Ahułam 4 razy. Va ŭsich vypadkach davali štraf 30 bazavych, plus uvieś čas ad suda da suda ja była na Akreścina. Potym na mianie zaviali pieršuju kryminalnuju spravu pa artykule 391 (art. 391 KK RB — abrazu sudździ ci narodnaha zasiadalnika) za abrazu sudździ i praz try dni adpuścili pa paručalnictvie baćki i pad padpisku ab niavyjeździe. Ja razumieła, što kali sprava dojdzie da suda, mnie mohuć dać realny termin. Ale niahledziačy na ŭsie ryzyki, ja vyrašyła zastacca.

19 traŭnia 2021 hoda da mianie pryjšli ź pieratrusam i litaralna źniščyli kvateru, a mianie zabrali pa 342 artykule (art 342 KK RB — arhanizacyja i padrychtoŭka dziejańniaŭ, jakija hruba parušajuć hramadski paradak).

Praz 3 dni dadali jašče adzin artykuł 188 (art. KK RB 188 — paklop) i adpravili ŭ Žodzina, dzie namalavali jašče 2 epizody da 342 artykuła.

Siem miesiacaŭ ja praviała ŭ Žodzina ŭ čakańni sudu. Potym byŭ etap na Vaładarku i sud, jaki pakaraŭ mianie paŭtara hadami kałonii. Ja vyjšła na volu ŭ červieni 2022 hoda, całkam adsiedzieŭšy pryznačany termin. A praz 4 miesiacy paśla vyzvaleńnia — u kastryčniku 2022 hoda — mianie ŭnieśli ŭ śpis ekstremistaŭ. Ale ja ŭsio adno chacieła zastacca ŭ Biełarusi, kab być pobač z darahimi mnie ludźmi.

Našaje žyćcio pałamali 23 studzienia 2024 hoda, kali ŭ 7:30 ranicy pryjšli supracoŭniki KDB i zabrali mianie na dopyt pa spravie INeedHelp. Na ščaście, telefon moj byŭ pačyščany, tamu ničoha tołkam pradjavić mnie nie atrymałasia. Mianie pratrymali da viečara, skłali pratakoł, zabrali telefon i adpuścili.

Adnak u toj ža dzień zatrymali i maju maci. Ciapier jana pad śledstvam u Žodzina. My z tatam zrazumieli, što i na jaho taksama buduć zavodzić kryminalnuju spravu, tamu vyrašyli źjaždžać. Tata nie vytrymaŭ by turmy, dy i ja nie pieražyła b čarhovaha terminu i rasstańnia ź dziećmi.

Tamu 27 studzienia 2024 hoda ja, dzieci i tata — my źjechali. Stan baćki žudasny, bo jahonaje žyćcio pavaliłasia za try dni. A na mnie tata-piensijanier užo bieź piensii i dvoje maleńkich dziaciej. Prosim luboj dapamohi!» — piša jana.

Dapamahčy Volzie Takarčuk

• 5
• 0
• 8
• 7
• 3
• 61
• 19
• 0