Sierbski sud pačaŭ razhlad spravy ab ekstradycyi biełaruskaha kinarežysiora
Biełarusa Andreja Hniota zatrymali ŭ kastryčniku 2023 hoda ŭ Sierbii na zapyt biełaruskich uładaŭ, jakija abviaścili jaho ŭ mižnarodny vyšuk za nibyta ŭchileńnie ad vypłaty padatkaŭ. Z tych časoŭ Andrej Hniot znachodzicca pad vartaj u Centralnaj turmie Białhrada.
«Ja spadziajusia, što Sierbija nie paddasca cisku z boku Biełarusi ab majoj ekstradycyi», — skazaŭ Hniot u Viarchoŭnym sudzie, dadaŭšy, što ekstradycyja pastavić jaho ŭ «śmiarotnuju niebiaśpieku».
Sudovy praces aśviatlaje Bałkanskaja słužba Radyjo Svaboda.
Hniot, apranuty ŭ majku z nadpisam «Praŭda», abvinavačańni va ŭchileńni ad vypłaty padatkaŭ adchiliŭ, nazvaŭšy kryminalnuju spravu suprać siabie palityčna matyvavanaj, nieabhruntavanaj i łžyvaj.
«Biełaruski režym padviarhaje žorstkim represijam usich, chto vystupaje suprać jaho», — skazaŭ Hniot, jaki skazaŭ, što pryjechaŭ u Sierbiju dla pracy nad mižnarodnym videaprajektam i byŭ aryštavany, kali vyjšaŭ z rejsu z Banhkoku.
U pačatku sakavika apielacyjny sud admianiŭ rašeńnie Vyšejšaha sudu ŭ Białhradzie, jaki paličyŭ, što zakonnyja pieradumovy dla jaho ekstradycyi ŭ Biełaruś byli vykananyja. Ale apielacyjny sud viarnuŭ spravu ŭ Vyšejšy sud na pierahlad, zajaviŭšy, što byli istotnyja parušeńni pracedury.
Hniot vyjechaŭ ź Biełarusi ŭ Tajłand u 2020 hodzie paśla taho, jak krytykavaŭ biełaruski režym i ŭdzielničaŭ u pratestach paśla prezidenckich vybaraŭ.
Hniot zajaviŭ sudu, što režym Łukašenki choča pakarać jaho za aktyŭnaść najpierš tamu, što jon źjaŭlajecca adnym z zasnavalnikaŭ niaŭradavaj arhanizacyi «Svabodnaje abjadnańnie spartoŭcaŭ Biełarusi» (SOS BY).
«My adkryta vystupali suprać dyktatury, parušeńniaŭ pravoŭ čałavieka i falsifikacyi vybaraŭ u Biełarusi ŭ 2020 hodzie. Nam pomściać, i tamu ja ciapier tut», — skazaŭ Hniot.
SOS BY zaklikaŭ admianić vybary, Łukašenku pajści ŭ adstaŭku i vyzvalić hramadzian, aryštavanych padčas demanstracyj suprać režymu. Paźniej arhanizacyja była pryznana ekstremisckaj, što zachodnija ŭrady razhladajuć jak instrumient pieraśledu palityčnych dysidentaŭ.
Pry hetym raniej kiraŭnik Biełaruskaha fondu spartovaj salidarnaści Alaksandr Apiejkin u svaim fejsbuku pastaviŭ pad sumnieŭ datyčnaść Andreja Hniota da stvareńnia SOS BY.
«Jon sapraŭdy dapamahaŭ zdymać roliki z vykazvańniem hramadzianskaj pazicyi spartoŭcaŭ u žniŭni-vieraśni 2020, kamunikavaŭ ź niekatorymi spartoŭcami. Pra niejki inšy aktyŭny ŭdzieł u hramadskim ruchu spartoŭcaŭ ja nie čuŭ», — napisaŭ Apiejkin.
Hniot na sudzie taksama pradstaviŭ sudu dakumienty, jakija, pavodle jaho, paćviardžajuć jahonyja śćvierdžańni, što ŭ Biełarusi buduć parušanyja jahonyja pravy čałavieka, i doŭha apaviadaŭ pra toje, čamu jon nie atrymaje tam spraviadlivaha vyraku.
Jahony advakat Filip Safijanič zajaviŭ Radyjo Svaboda, što zakonnych padstavaŭ dla ekstradycyi niama i jaho aściarohi adnosna pieraśledu apraŭdanyja, asabliva ŭ śviatle paviedamleńniaŭ Arhanizacyi Abjadnanych Nacyjaŭ pra toje, što ludzi, jakija znachodziacca ŭ źniavoleńni ŭ Biełarusi, padviarhajucca roznym formam katavańniaŭ.
Na słuchańniach prysutničali pradstaŭniki ambasadaŭ krain ES i pravaabaroncy. Paśla słuchańniaŭ Hniota viarnuli ŭ Centralnuju turmu Białhrada, kab čakać dalejšaha razhladu spravy.
Apielacyjny sud u Sierbii admianiŭ rašeńnie ab ekstradycyi režysiora Andreja Hniota. Ale rassłablacca rana
Interpał zabłakavaŭ dostup da źviestak biełaruskaha režysiora, jakoha chočuć ekstradavać ŭ Biełaruś ź Sierbii
Biełaruskamu režysioru-rekłamščyku pahražaje ekstradycyja ź Sierbii. Farmalna pa ekanamičnym artykule
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2929
Kamientary