Vučeńni pa vykarystańni taktyčnaj jadziernaj zbroi. Jakaja ŭ ich rola Biełarusi i ci buduć zadziejničany sapraŭdnyja bojehałoŭki

Staršy navukovy supracoŭnik Instytuta AAN pa daśledavańni prablem razzbrajeńnia ŭ Ženievie Pavieł Podźvih raspavioŭ «Miedyjazonie», jak biełaruskija i rasijskija vajskoŭcy praviaduć vučeńni pa vykarystańni taktyčnaj jadziernaj zbroi i ci buduć vykarystoŭvacca jadziernyja bojezarady.

Biełaruskija vajskoŭcy ŭśled za rasijskimi abviaścili vučeńni ź jadziernaj zbrojaj. Jakaja rola ŭ hetym adviedziena biełaruskim častkam?

«Nakolki ja mahu zrazumieć, pravodzicca pravierka hatoŭnaści srodkaŭ dastaŭki — šturmavikoŭ SU-25 i rakiet «Iskander» i «Pałanez». U srodkaŭ dastaŭki ŭ hetym vypadku praviarajecca mahčymaść pierabaziravańnia rakietnych kompleksaŭ u niejkija punkty. Heta ŭsio moža być zroblena biez udziełu jadziernych častak. Spravazdačy, jakija ŭčora byli, — samaloty lotali, «Iskandery» jeździli.

Treba ŭličvać, što kantrol pravodzicca rasijskimi čaściami 12-ha hałoŭnaha ŭpraŭleńnia Ministerstva abarony Rasii. Piłoty samalotaŭ abo ekipažy rakietnych kompleksaŭ zabiaśpiečvaje biełaruski bok, jaki ich prymaje. Ich zadača — dastavić samalot u peŭnaje miesca, pryvieźci rakietny kompleks i tam čakać, kali rasijskija čaści pryjduć i ŭsie zahruziać.

My z dastatkovaj upeŭnienaściu viedajem, što bojeprypasy ŭ štatnym stanie zachoŭvajucca na składach, tam achoŭvajucca i absłuhoŭvajucca. Standartnaja pracedura razhortvańnia ŭklučaje ŭ siabie nastupny etapy: vy dastajacie ich sa składa, hruzicie ŭ hruzaviki, vieziacie ŭ peŭnaje miesca, tam ustaloŭvajecie na nośbit, padviešvajecie da samalotaŭ, dałučajecie bojehałoŭki da rakiet.

Nielha vyklučać, što heta ŭsio budzie adpracoŭvacca i z udziełam biełaruskich čaściej — vy možacie asobna treniravać pieraloty samalotaŭ abo pierabaziravańnie rakietnych kompleksaŭ u niejki punkt.»

Raniej Dziaržsakratar Savieta biaśpieki Alaksandr Valfovič raspavioŭ, što ŭ chodzie pravierki płanujuć ažyćciavić kantrol navykaŭ biełaruskich padraździaleńniaŭ pa padačy śpiecbojeprypasaŭ u rakietnyja voinskija čaści, padviescy ich na puskavyja ŭstanoŭki, dastaŭcy śpiecbojeprypasaŭ na aeradromy i padvieski ich na frantavyja šturmaviki SU-25.

Čamu Łukašenka kaža, što biełaruskija vojski taksama buduć kantralavać vučeńni, kali ŭsio padparadkavana VS RF?

«Heta palityčny prajekt, sproba nabyćcia statusu, niejkaj vahi. Sumna, što dla hetych manipulacyj vykarystoŭvajecca jadziernaja zbroja.

Šmat niesastykovak: u rasijskaj zajavie było, što vučeńni praviadzie Paŭdniovuju akruhu (pavodle viersii Alaksandra Łukašenki, z rasijskaha boku voźmuć udzieł vajskovyja čaści Maskoŭskaj i Leninhradskaj vajskovych akruh, a taksama siły i srodki Bałtyjskaha fłotu). Vy lepš za mianie viedajecie, što biełaruski lidar lubić apisvać tak, byccam u jaho ŭsia inicyjatyva. My nie možam ničoha dakładna śćviardžać. Ja nie viedaju, chto, kudy, čaho vozić, ale ja skažu, što treba z aściarožnaściu stavicca da zajavaŭ Łukašenki.

Ci buduć udzielničać u vučeńniach realnyja jadziernyja zarady?

«Mahu skazać, što ŭ takoha rodu vučeńniach realnyja bojezarady ŭdziełu nie prymajuć — dla hetaha jość vučebnyja makiety. Ale ŭsiakaje ŭ žyćci zdarajecca: rašeńni byvajuć vielmi roznymi i niečakanymi».

• 0
• 0
• 0
• 3
• 1
• 2
• 8
• 0