Uśled za pałacava-parkavym kompleksam u vioscy Kraski na tarhi płanujuć vystavić majontak u vioscy Padarosk.
Biźniesoviec z Rasii nabyŭ pałac z parkam u vioscy Kraski Vaŭkavyskaha rajona, paviedamiła hazieta «Viečiernij Hrodno».
Jon zapłaciŭ za pałac kala $105000 (pryblizna 307 miljonaŭ rubloŭ) i źbirajecca ŭ im žyć. Pa słovach hałoŭnaha śpiecyjalista adździeła kultury Vaŭkavyskaha rajvykankama Łarysy Ružanskaj, novamu ŭładalniku na adnaŭleńnie panskaj siadziby dali dva hady. Budaŭničyja pracy jon źbirajecca pačać viasnoj i ŭ pieršuju čarhu zojmiecca parkam.
«Prodaž kompleksu ŭ vioscy Kraski ja liču vydatnaj padziejaj. Inakš jon by razvalvaŭsia dalej, — skazaŭ «Salidarnaści» staršynia Dobraachvotnaha tavarystva achovy pomnikaŭ historyi i kultury Anton Astapovič. — I nie važna, što ŭładalnikam staŭ hramadzianin z Rasii. Jakaja roźnica adkul haspadar — z Zachadu ci Uschodu? Hałoŭnaje, kab jon układaŭ hrošy ŭ restaŭracyju pałaca. Ciapier Minkult i hramadskaść pavinny adsočvać, kab jon vykonvaŭ nieabchodnyja ŭmovy».
Zhodna z prahramaj zachavańnia i raźvićcia kultury Hrodzienskaj vobłaści na 2007-2010 hh, na bazie pałacava-parkavaha kompleksu ŭ Kraskach płanavałasia stvaryć siadzibna-etnahrafičny turystyčny centr. Ale ni miascovy, ni abłasny biudžety z takoj zadačaj nie spravilisia i pałac vystavili na tarhi. Startavaja cana kompleksu składała 2 młrd. rubloŭ. Kupić jaho mierylisia biźniesoŭcy z Rasii, a taksama pryvatnaja firma z Baranavičaŭ.
Na tarhi moža patrapić i majontak ŭ vioscy Padarosk taho ž Vaŭkavyskaha rajonu. U Vaŭkavyskim rajvykankamie płanujuć vystavić jaho na aŭkcyjon z umovaj stvareńnia ŭ siadzibie ahraturystyčnaha kompleksu.
***
Pałacava-parkavaja siadziba ŭ vioscy Kraski Vaŭkavyskaha rajona Hrodzienskaj vobłaści źjaŭlajecca pomnikam architektury XIX-XX stst. Uklučaje pałac retraśpiektyŭna-zamkavaha stylu, uźviedzieny ŭ 1839-1905 hh, šerah draŭlanych i cahlanych pabudoŭ, a taksama piejzažny park płoščaj try hiektary z sažałkaj. Pałac ujaŭlaje saboju draŭlany adnapaviarchovy korpus z prybudavanym da jaho dvuchpaviarchovym cahlanym abjomam, viertykalnyja daminanty jakoha — kruhłaja i kvadratnaja ŭ siačeńni viežy z zubčatymi parapietami i fluhierami. Hałoŭny ŭvachod u siadzibu aformleny vysokim hankam i strelčatym partałam z čatyrma vuhłavymi pinaklami. Budynak vyłučajecca raznastajnaściu elemientaŭ dekoru fasadaŭ.
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii18
Kamientary