«Pieramoha ŭ Biełarusi ŭ 2020-m hodzie mieła b vialiki palityčny ŭpłyŭ na astatniuju Jeŭropu» — En Epłbaŭm
U novym vypusku tok-šou «Žyćcio-malina» amierykanskaja žurnalistka En Epłbaŭm padzialiłasia svaim pohladam, čamu Pucin nie pahłynaje Biełaruś, chto vyratavaŭ Łukašenku ŭ 20-m hodzie, i patłumačyła, čamu Cichanoŭskaja — vyklik dla Rasii.
En Epłbaŭm — amierykanski historyk, piśmieńnica i žurnalistka. U minułym redaktarka časopisaŭ The Economist i The Spectator, člen vydavieckaj rady The Washington Post. Uładalnica Pulitceraŭskaj premii. Maje biełaruskija karani (jaje prodki pachodziać z Kobryna). Žyvie ŭ Varšavie. U šlubie ź ministram zamiežnych spraŭ Polščy Radasłavam Sikorskim. Pryniała polskaje hramadzianstva.
Chto vyratavaŭ Łukašenku ŭ 2020-m?
En Epłbaŭm adznačaje, što ŭ 2020-m hodzie, kali Łukašenka byŭ na miažy pravału, jon «u asnoŭnym» byŭ vyratavany Rasijaj. Ale taksama jaho vyratavali Iran, Kitaj i Vieniesueła.
«Kubincy ŭ AAN hałasavali razam ź Biełaruśsiu. Kitajcy pryvieźli vialikija inviestycyjnyja prajekty ŭ Biełaruś. (…) Tamu Biełaruś stała niejkim prajektam, jaki vyratavali aŭtakratyčnyja dziaržavy, nadaŭšy bolš siłaŭ Łukašenku».
Žurnalistka zaŭvažaje, što nie bačyć, kab u Łukašenki byŭ niejki inšy płan, jak padtrymlivać sistemu i zastavacca pry ŭładzie.
Čamu Pucin nie pahłynaje Biełaruś?
Epłbaŭm dapuskaje, što Biełaruś moža stać častkaj Rasii. «Byli momanty, kali zdavałasia, što heta toje, čaho choča Pucin. Była razmova pra aljans», — nahadvaje žurnalistka i zaŭvažaje, što nie viedaje, čamu heta ŭsio jašče nie zdaryłasia.
Epłbaŭm prapanuje svaju viersiju: «Moža być, Pucinu zdajecca karysnym mieć Łukašenku jak sajuźnika. Kab heta vyhladała tak, što ŭ jaho bolš siabroŭ. A kali b Biełaruś była častkaj Rasii, tady b jon vyhladaŭ bolš izalavanym».
«Pieramoha Cichanoŭskaj stała b vyklikam dla Pucina»
Na pohlad Epłbaŭm, «stvareńnie padziełu pamiž Biełaruśsiu i Rasijaj i dapamoha biełarusam u tym, kab źmianić Biełaruś, budzie dla Pucina vialikim udaram. Bo jon bačyć Biełaruś, Rasiju i Ukrainu razam».
Pa słovach žurnalistki, metaj Pucina źjaŭlajecca stvareńnie «niejkaj novaj dziaržavy z rasijskaj uładaj, jakaja moža paŭpłyvać na Jeŭropu z-za svaich hieahrafičnych pamieraŭ».
Epłbaŭm nazyvaje dva samyja prostyja šlachi dla taho, kab hetaha nie zdaryłasia: «Heta pieramoha Ukrainy ŭ vajnie ci źmiena režymu ŭ Biełarusi. I tady vy stvarajecie bolš słabuju sistemu».
Žurnalistka raskazvaje, što jość jašče adno mierkavańnie adnosna taho, jak demanstracyi ŭ 2020-m hodzie i nastupnyja represii suprać demanstrantaŭ stali pryčynaj uvarvańnia Pucina va Ukrainu.
«Mova demakratyi i mova svabody, jakaja vykarystoŭvałasia ŭ Biełarusi ŭ 2020-m hodzie, napužała Pucina takim ža čynam, jak u 2014-m va Ukrainie. Jon pabačyŭ pieramohu demakratyčnaha ruchu ŭ krainach, jakija i hieahrafična, i krychu linhvistyčna, i inšym čynam pobač. Jak ja baču, pamiž tryma krainami jość šlubnyja, siamiejnyja, histaryčnyja suviazi», — tłumačyć Epłbaŭm i dadaje:
«Ja dumaju, što Pucin usprymaŭ padziei [2020-ha hoda ŭ Biełarusi] jak asabistuju pahrozu. Tamu pieramoha Śviatłany Cichanoŭskaj u Biełarusi, kali b jana stała prezidentkaj, stała b vialikim vyklikam dla Pucina ŭ jaho hałavie. Kali jana moža stać prezidentkaj Biełarusi, čamu tady niechta inšy nie moža stać prezidentam Rasii. (…) Niezaležnaja Biełaruś stała niečym nakštałt ideałahičnaha vykliku Pucina, jaki, mahčyma, choć i nie lubiŭ Łukašenku, ale pieraadoleŭ heta».
Ci mahła pieramoha ŭ Biełarusi ŭ 20-m hodzie źmianić situacyju ŭ rehijonie?
Epłbaŭm adznačaje, što inšaja sistema ŭ Biełarusi adrazu b źmianiła situacyju ŭ rehijonie. U sajuzie z Polščaj, naprykład, adrazu b dapamahła Ukrainie. Heta adrazu b addaliła Rasiju. Polskaja ŭschodniaja miaža, uschodniaja miaža Jeŭrasajuza była b u biaśpiecy.
Heta było b dobra i dla ekanomiki. Było b vydatna, kab Biełaruś mahła stać udzielnicaj jeŭrapiejskich rynkaŭ. Heta dapamahło b i biełarusam, i ŭsim astatnim. Heta mieła b vialiki ekanamičny efiekt. A taksama mieła b vialiki palityčny ŭpłyŭ na astatniuju Jeŭropu».
Akramia hetaha, jak ličyć žurnalistka, heta b «nazaŭsiody źniščyła płan Pucina pa adnaŭleńni rasijska-biełaruska-ŭkrainskaj impieryi».
Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada8
Kamientary
Im treba pakajacca i syjści z palityčnaha alimpa zamiežnych apazicyjanieraŭ.