«Uvoz aŭto va ŭzroście da 5 hadoŭ faktyčna zabaronieny». Jak źmieniać situacyju novyja praviły pryhonu aŭto ŭ Biełaruś
Z 4 červienia litoŭskaja mytnia ŭvodzić novyja praviły vyvazu z terytoryi krainy ŭ Biełaruś aŭtamabilaŭ, nie starejšych za 5 hadoŭ. Pierahonščyki ŭ stupary ad niekatorych ź ich.
Patrabavańni ŭzmacnili i raspaŭsiudzili na ŭsie aŭto niezaležna ad cany i ruchavika
Častka hetych patrabavańniaŭ z 23 sakavika prymianiałasia da aŭtamabilaŭ z abjomam ruchavika bolšym za 1,9 litra abo daražejšych za 50 tysiač jeŭra.
Vykanać ich było mahčyma, bo hałoŭnym było apłacić aŭto ź biełaruskaha banka. Damova kupli-prodažu, płaciožka, invojs i ekspartnaja dekłaracyja musili być aformleny na pakupnika ź Biełarusi, jaki paćviardžaŭ u harantyjnym liście, što kuplaje aŭto dla asabistaha karystańnia na terytoryi Biełaruś i što jano nie budzie pierapradadziena ŭ Rasiju.
Ad pradaŭca taksama prasili paćvierdzić fakt atrymańnia hrošaj i paviedamić, što jon viedaje, kim źjaŭlajecca pakupnik, jaki harantuje, što mašyna nie trapić u Rasiju.
Pačynajučy z 4 červienia, hetyja patrabavańni raspaŭsiudzili na lubyja aŭto ź Jeŭropy, ZŠA abo inšych krain (niezaležna ad koštu i abjomu ruchavika), z momantu vypusku jakich prajšło nie bolš za 5 hadoŭ.
I samaje hałoŭnaje, što dadalisia novyja. Ciapier dla paśpiachovaha vyvazu aŭto ź ES mytniki patrabujuć pakazać jašče i dekłaracyju ad vytvorcy.
Što kažuć pierahonščyki
Surazmoŭca ź liku pierahonščykaŭ ličyć, što vykanać hety punkt budzie amal niemahčyma.
«Z nočy mašyny, maładziejšyja za 5 hadoŭ, nie vypuskajuć, navat kali ŭ ich užo byli aformlenyja ekspartnyja. Taksama mytnia ŭ Litvie ad siońnia nie adkryvaje EX (ekspartnyja dekłaracyi) na lubyja aŭtamabili, maładziejšyja za 5 hadoŭ. Heta faktyčna poŭnaja zabarona na impart takich aŭto ŭ Biełaruś», — ličyć mužčyna.
Pa infarmacyi surazmoŭcy, toje samaje adbyvajecca i ŭ Polščy. Polskaja mytnia afarmlaje ekspartnyja dekłaracyi tolki na mašyny, starejšyja za 5 hadoŭ.
Pierahonščyk miarkuje, što atrymać dekłaracyju ad vytvorcy zmohuć tolki aficyjnyja dylery, jakija lehalna pastaŭlajuć novyja mašyny ŭ Biełaruś.
Siarod inšych patrabavańniaŭ, jakija, na dumku surazmoŭcy, składana vykanać — pradstaŭleńnie vypiski z rachunku transpartnaj kampanii z paćviardžeńniem atrymańnia apłaty za dastaŭku aŭto.
«Zvyčajna za dastaŭku raźličvajucca pa fakcie pryjezdu mašyny ŭ Biełaruś. Čaściej za ŭsio najaŭnymi. Zredku pieravodam, ale nichto nie płacić za transparciroŭku napierad», — adznačaje pierahonščyk.
Surazmoŭca kaža, što, naprykład, litoŭskija pieravozčyki nie zmohuć vykanać i hety punkt, bo banki Litvy daŭno nie prymajuć płaciažy ź Biełarusi. Ale hety punkt možna vykanać, kali zamović dastaŭku ŭ polskaj abo, naprykład, kazachstanskaj kampanii.
Hałoŭnaj pieraškodaj na šlachu patrymanych aŭto va ŭzroście da 5 hadoŭ pieravozčyk nazyvaje mienavita patrabavańnie mieć dekłaracyju ad vytvorcy.
«Sankcyi nie zabaraniajuć pradavać u Rasiju mašyny z abjomam ruchavika da 1,9 litra i koštam da 50 tysiač jeŭra. Ale hety zakon bolš žorstki, bo nie padzialaje mašyny pa košcie i abjomie ruchavika. To-bok jon bolš strohi, čym sami sankcyi, bo pašyrany pakiet dakumientaŭ ciapier patrabujuć i na tyja mašyny, što nie znachodziacca pad ahulnymi sankcyjami ES», — tłumačyć pierahonščyk.
Čamu mienavita mašyny da 5 hadoŭ?
Reč u tym, što dla aŭto va ŭzroście da 5 hadoŭ dziejničajuć najmienšyja mytnyja taryfy. Praz heta ŭ bolšaści vypadkaŭ usie namahalisia pryhaniać mienavita takija aŭto.
Praŭda, i bolš staryja mašyny taksama viazuć. Niadaŭna «Naša Niva» źviartała ŭvahu na heta. U prodažy možna sustreć 15-hadovyja inšamarki, jakija pryvieźli ź Jeŭropy.
Jak vynikaje z novaŭviadzieńnia, vieźci aŭto, starejšyja za 5 hadoŭ, pa-raniejšamu možna biez pašyranaha pakieta dakumientaŭ.
U infarmacyi na sajcie litoŭskaj mytni havorycca pra toje, što dakumient pryniali adrazu piać krain ES. Ich nie pieraličvajuć, ale najbolš vierahodna, što da pahadnieńnia dałučylisia Polšča, Litva, Łatvija, Estonija i Finlandyja. Kožnaja z hetych krain maje supolnuju miažu ź Biełaruśsiu i/abo Rasijaj. Dakumient padpisali 9 maja, ale apublikavali tolki 3 červienia, to-bok mienš čym za sutki da taho, jak jon nabyŭ moc.
«Rasijanie jechać pierastali, a ŭ našych niama stolki hrošaj». Što adbyvajecca na aŭtamabilnym rynku Biełarusi
U Litvu bieź ježy, napojaŭ i cyharet. Što adbyvajecca z uvozam biełaruskich tavaraŭ u Litvu?
Nie tolki luksavyja aŭto i śviežyja małalitražki. U Biełaruś masava honiać navat 16-hadovyja mašyny ź Jeŭropy
Kamientary