U prybiralniach Pałaca kultury BiełAZa kamiery pastavili prosta nad unitazami
Hości, jakija naviedali «BiełAZfest» na minułych vychadnych, byli niepryjemna ździŭlenyja hetym adkryćciom, piša Ex-press.by.
Prybiralnia — heta adno ź niamnohich miescaŭ, dzie čałaviek adčuvaje biaśpieku i abaronienaść ad starońnich vačej. Ustanoŭka kamier u takich miescach padryvaje heta pačućcio, stvarajučy atmaśfieru pastajannaha kantrolu. A ŭ naviedvalnikaŭ Pałaca kultury BiełAZa ciapier jość pytańni: chto za imi naziraje ŭ prybiralni, jak pad nahladam spraŭlać patrebu, mianiać prakładki, i ci nie apynucca hetyja zapisy ŭ internecie?
Čytač vydańnia Dzianis ličyć, što administracyja parušaje prava naviedvalnikaŭ na niedatykalnaść pryvatnaha žyćcia. Pavodle jaho słoŭ, u Pałacy kultury kamiery stajać paŭsiul: u załach, repietycyjnych pakojach, harderobie, a ciapier i ŭ prybiralniach.
Dzianis paviedamiŭ Ex-press.by, što kamiery ŭ prybiralniach pastavili nie tolki što, haradžanie daŭno abmiarkoŭvajuć ich źjaŭleńnie:
«Videakamiery stajać usiudy, i ja viedaju, što ich niepasredna hladzić dyrektar, u jaho ŭ kabiniecie ŭstalavanyja ekrany. Heta moža być źviazana z žadańniem praduchilić akty vandalizmu abo padtrymlivać čyściniu ŭ hramadskich miescach. Kažuć, što hetyja kamiery nie tolki vyjavu pišuć, ale i huki… Voś užo zadavalnieńnie taho, chto hladzić! Kali surjozna, takija zachady zdajucca praźmiernymi i nie apraŭdvajuć parušeńnie prava na niedatykalnaść pryvatnaha žyćcia».
Haradžanin havoryć i pra toje, što ŭ mnohich krainach ustanoŭka kamier u miescach, dzie ludzi mohuć znachodzicca biez adzieńnia, zabaronienaja zakonam. Heta tyčycca tualetaŭ, raspranalniaŭ i dušavych. Pakarańni za takija dziejańni varjirujucca ad štrafaŭ da kryminalnaj adkaznaści.
Dziejańni administracyi Pałaca kultury mohuć być rascenienyja jak niezakonnyja:
«U cyvilizavanym hramadstvie hramadzianie mahli b źviarnucca ŭ pravaachoŭnyja orhany i pravaabarončyja arhanizacyi dla abarony svaich pravoŭ i pryciahnieńnia ŭvahi hramadskaści. Ale ŭ Biełarusi, asabliva na BiełAZie, heta moža akazacca składanaj zadačaj».
Duš za 10 rubloŭ, šalonaja čarha aŭto i chity rasijskich pop-zorak: jak sioleta prajšoŭ fiestyval Viva Braslav
Śviatkavali ŭ kalidory pobač z prybiralniaj: u bresckaj škole pierastaralisia sa ścipłaściu vypusknoha
Dziaŭčat u formie prybiralščyc nie puścili ŭ handlovy centr u Minsku praz hałoŭny ŭvachod
U Maskvie mužčyny masava sprabujuć znajomicca, macajučy dziaŭčat za jahadzicy. Tak zahadaŭ rabić seks-koŭč ź Biełarusi8
Kamientary
Ustaloŭvać kaniešnie abaviažuć za ŭłasnyja srodki.