Zabojstva ŭ Sierabrancy: Lipski chacieŭ zabić nie 33-hadovuju susiedku, a jaje siastru. Ale pamyliŭsia, bo tyja pamianialisia kvaterami
Lipski zmahaŭsia ź siamjoj Piatrovych hadami, za što atrymaŭ kryminalnuju spravu.
Historyja Alaksandra Lipskaha, jaki byŭ u vyšuku za zabojstva trochhadovaj daŭniny, a 13 žniŭnia 2024 hoda byŭ sam zabity pry zatrymańni, abrastaje novymi padrabiaznaściami.
Rabotniki ŭpraŭleńnia Śledčaha kamiteta pa Minsku raskazali svajo bačańnie jaho historyi.
Lipski skončyŭ jurydyčny fakultet. Paśla navučańnia pracavaŭ u jurydyčnaj kantory na poŭnačy Rasii, dzie, vierahodna, i chavaŭsia apošnija try hady. Tam ža, ale pa inšaj śpiecyjalnaści pracavaŭ i jahony baćka.
Śledčyja pierakazvajuć słovy žycharoŭ doma na praśpiekcie Rakasoŭskaha, dzie Alaksandr Lipski žyŭ z maci Raisaj: maŭlaŭ, chłopiec pastajanna chadziŭ z uklučanaj kamieraj mabilnaha telefona, kab paśla vykarystoŭvać videazapisy suprać ludziej, ź jakimi jon vioŭ biaskoncyja sprečki.
Alaksandr Lipski pastajanna pisaŭ skarhi ŭ ŽES, milicyju, telefanavaŭ u DAI i aburaŭsia drennymi parkoŭkami kala doma. Śledčaja Kryścina Łahucina pryvodzić prykład:
«Jon inicyjavaŭ, kab dvor doma, dzie jon žyŭ, zakryli ad starońnich mašyn. Paźniej, kali sabraŭ dastatkovuju kolkaść podpisaŭ susiedziaŭ pa hetym pytańni, rezka staŭ u apazicyju da ŭłasnaj idei. Zatym užo adpracavanaja historyja: uklučany mabilny telefon z kamieraj i pravakacyja žycharoŭ.
Ale asnoŭny kanflikt byŭ ź siamjoj Piatrovych. A kali bolš kankretna, to ź siastroj zahinułaj Valanciny, Volhaj, i jaje mužam Alaksiejem». Imiony paciarpiełych źmienienyja.
Alaksandr Lipski abvinavačvaŭ siamju hetych Piatrovych u tym, što jany pastajanna zalivajuć jaho kvateru. Infarmacyja nie paćviardžałasia. Druhaja pretenzija — toje, što Alaksiej Piatroŭ źviazany z kryminalnym śvietam Ukrainy. Heta, pa słovach śledčych, taksama jaho fantazii.
Tym nie mienš, adnojčy Lipski mocna šturchnuŭ Alaksieja Piatrova. Jak i pisała «Naša Niva», na chłopca zaviali kryminalnuju spravu za pryčynieńnie mienš ciažkaha cialesnaha paškodžańnia. Śledčyja adznačajuć, što jon nie źjaviŭsia ŭ sud i trapiŭ u vyšuk.
Była jašče adna ćmianaja historyja: maci Lipskaha paśla taho kanfliktu naŭmysna ŭpała na asfalt i biłasia hałavoj, kab paźniej pakazać pravaachoŭnikam cialesnyja paškodžańni, nibyta naniesienyja Piatrovym. Ale jana nie ŭličyła, što kamiery videanazirańnia ŭ dvary ŭsio heta zafiksavali.
Što ž pryviało da zabojstva?
Pa mierkavańni śledčych, Alaksandr Lipski chacieŭ adpomścić za raniejšyja kanflikty i svaju kryminalnuju spravu i zabić Volhu Piatrovu i jaje muža Alaksieja. Ale nie viedaŭ, što siamja źjechała, a na ich miescy žyvie siastra Volhi sa svaim mužam.
Mienavita hetaja siastra, Valancina, i stała pamyłkovaj achviaraj.
Jaje mužu pašancavała — kali Lipski stralaŭ u jaho, pistalet daŭ asiečku. Mužčyna paśpieŭ vyskačyć z akna piataha paviercha. Niahledziačy na padzieńnie z takoj vyšyni i šmatlikija traŭmy, jon vyžyŭ.
Što ž tyčycca maci, jakuju šukali na paru z zabojcam, to jaje ŭdzieł u złačynstvie nie dakazany. Jaje abviaścili ŭ vyšuk jak bieź viestak źnikłuju. Žančynu da hetaha času nie znajšli.
Kamientary