Dola rasijskaha hazu ŭ imparcie krain Jeŭrapiejskaha Sajuza rezka źmienšyłasia, tamu ES hatovy całkam admovicca ad pastavak z Maskvy, zajaviła jeŭrakamisarka pa enierhietycy Kadry Simsan.
Pavodle słoŭ jeŭračynoŭnicy, dola rasijskaha hazu ŭ imparcie ES skaraciłasia z 45% u 2021 hodzie da 18% da červienia 2024 hoda, tady jak impart ad takich nadziejnych partnioraŭ, jak Narviehija i ZŠA, pavialičyŭsia.
«My bolš nie znachodzimsia pad uładaj trubapravodaŭ Pucina i my praciahvajem padtrymlivać našych ukrainskich partnioraŭ pa miery nabližeńnia zimy», — akcentavała Kadry Simsan.
Jeŭrakamisarka padkreśliła, što jeŭrapiejskija kampanii majuć prava vykarystoŭvać ukrainskuju hazavuju infrastrukturu, pakolki na heta niama sankcyj i jość zacikaŭlenaść z ukrainskaha boku.
«Ukraina taksama źjaŭlajecca vytvorcam hazu, tamu my pavinny kłapacicca, kab ich infrastruktura ŭsio jašče mieła kaštoŭnaść. Ale majo pasłańnie hranična jasnaje: niama nieabchodnaści šukać niejkija novyja sposaby praciahu handlu z «Hazpramam». Alternatyŭnyja pastaŭki dastupnyja, i my ŭzajemadziejničajem ź dziaržavami-členami, jakija paciarpieli, kab pakazać im, što alternatyŭnyja maršruty dazvolać dastavić nieabchodnyja abjomy», — detalizavała Simsan.
Jak viadoma, kantrakt na tranzit rasijskaha hazu praz Ukrainu zakančvajecca ŭ kancy 2024 hoda i Kijeŭ nie źbirajecca jaho praciahvać.
U dakładzie ab stanie enierhietyčnaj supolnaści za 2024 hod havorycca, što ceny na enierhanośbity ciapier bolš stabilnyja i zastajucca značna nižejšymi za pikavyja ŭzroŭni enierhietyčnaha kryzisu 2022 hoda.
Kamientary