Ministr sportu Kavalčuk zabaraniŭ hulać u futboł eks-abaroncu zbornaj Biełarusi

29-hadovy abaronca Mikałaj Zołataŭ u svoj čas hulaŭ za zbornuju Biełarusi, pravioŭšy za jaje 14 matčaŭ u 2019-2021 hadach.

Apošnija čatyry z pałovaj hady jon vystupaŭ za miažoj (Ukraina, Francyja, Kazachstan). Ale ŭletku 2024-ha niečakana papoŭniŭ šerahi viciebskaha pryvatnaha kłuba «Maksłajn». Da hetaha Zołataŭ pravioŭ siem miesiacaŭ u kazachstanskim «Jelimai», dzie zhulaŭ vosiem matčaŭ i, pa infarmacyi «Trybuny», atrymlivaŭ kala 15 tysiač dołaraŭ na miesiac da spłaty padatkaŭ.

Zołataŭ viarnuŭsia ŭ Biełaruś 11 lipienia, kantrakt ź viciebskim kłubam, jaki hulaje tolki ŭ druhim dyvizijonie, byŭ padpisany da kanca 2024 hoda. Ale paśpieŭ za jaho futbalist pravieści ŭsiaho čatyry matčy: u 1/16 finału Kubka Biełarusi z «Naftanam» i ŭ 1/8 sa «Słavijaj», a taksama ŭ čempijanacie Biełarusi z «Astraŭcom» i BATE-2.

Z 5 žniŭnia hulec pierastaŭ nie toje što vychodzić na pole, ale navat traplać u zajaŭku na matčy, choć usie čatyry vyšejzhadanyja hulni adhulaŭ ad śvistka da śvistka. Voś užo šeść turaŭ, jak Zołataŭ zastajecca pa-za hulnioj. Pad niekalkimi pastami ŭ sacyjalnych sietkach kłuba zaŭziatary zadavali pytańni, kudy padzieŭsia abaronca, ale adkazu im nichto nie daŭ.

Pa infarmacyi «Trybuny», Zołataŭ nie hulaje pa patrabavańni Kavalčuka. U kancy lipienia viciebskamu kłubu było paviedamlena pra toje, što jon nie moža vykarystoŭvać futbalista, jaki «raniej vykazvaŭ niezadavolenaść dziejnaj uładaj Biełarusi».

Taksama, pa słovach krynic, jakija znajomyja ź situacyjaj, čynoŭniku nie spadabałasia, što Zołataŭ raniej asudžaŭ vajnu va Ukrainie. U vypadku admovy padparadkavacca «Maksłajnu» paabiacali prablemy.

Za Zołatava nibyta ŭ «Maksłajnie» zmahajucca i pakul kantrakt ź im nie skasoŭvajuć — spadziajucca, što z Kavalčukom atrymajecca niejak damovicca. Abaronca pa-raniejšamu trenujecca z kalektyvam, ale ŭ matčach nie ŭdzielničaje. Nie vyklučana, što ad Zołatava zapatrabujuć «ščyraha raskajańnia» ŭ abmien na mahčymaść dalej hulać u Biełarusi ŭ futboł.

Prytym situacyja z Zołatavym nie adzinkavaja. Z takimi ž prablemami, pa infarmacyi «Trybuny», sutyknuŭsia 25-hadovy napadajučy Pavieł Klańjo.

Ciapierašni siezon forvard pačynaŭ u «Maksłajnie», ale ŭ žniŭni futbalist padpisaŭ kantrakt z «Oršaj». Za jaje jon pravioŭ, jak i Zołataŭ, čatyry matčy, adnak ad 8 vieraśnia pierastaŭ traplać navat u zajaŭku, 16 vieraśnia «Orša» abjaviła pra rasstavańnie z forvardam, nijak nie patłumačyŭšy pryčyny.

Reč, jak vyhladaje, u tym, što ŭ kancy leta kłubu z Oršy Kavalčuk pavinien byŭ padpisać płan raźvićcia da kanca 2024 hoda, i pahadziŭsia heta zrabić tolki pry ŭmovie, što ŭ składzie nie budzie Klańjo. Hety forvard u 2020-m źniaŭsia ŭ videa futbalistaŭ, dzie razam z usimi skazaŭ frazu «My suprać hvałtu».

• 2
• 0
• 1
• 9
• 1
• 1
• 9
• 0