Byvaj, Jeŭropa! Biełarusy kančatkova pierasadžvajucca na kitajskija aŭto
20 aŭtamabilnych brendaŭ majuć aficyjnych dyleraŭ u Biełarusi. Try čverci ź ich — kitajskija brendy.
Kitajskija brendy amal całkam vycisnuli inšyja
Tatalnaja kitaizacyja biełaruskaha rynku pačała adbyvacca paśla taho, jak u adkaz na rasijskuju ahresiju suprać Ukrainy suśvietnyja aŭtavytvorcy pačali pakidać Rasiju i Biełaruś.
Dla paraŭnańnia, u 2022 hodzie na našym rynku aficyjna byli pradstaŭlenyja 28 brendaŭ, i tolki 4 ź ich (14%) prychodziłasia na kitajskija marki.
Jašče adnym paćviardžeńniem taho, što biełaruski rynak novych aŭto całkam addadzieny Kitaju — mižnarodny aŭtamabilny sałon «Motaršou» 2024, jaki prachodzić z 2 pa 6 kastryčnika ŭ Minsku.
Jak adznačajuć žurnalisty, na im upieršyniu na stendach nie było nivodnaha aficyjnaha pradstaŭnika jeŭrapiejskich brendaŭ. Tolki Kitaj.
Geely musić być udziačny sankcyjam
Admietna, što kala 50% prodažaŭ prychodzicca na aŭtamabili biełaruska-kitajskaj vytvorčaści (brendy Geely i Belgee).
Jašče adna tendencyja, jakuju na «Motaršou» ahučyli pradstaŭniki Biełaruskaj aŭtamabilnaj asacyjacyi (BAA) — niečuvany rost prodažaŭ novych aŭto ŭ Biełarusi. Lepš, čym ciapier, spravy ŭ aficyjnych dyleraŭ išli tolki ŭ 2019 hodzie, jaki ličycca rekordnym.
Pieršapačatkova ŭ BAA prahnazavali, što dyleram udasca realizavać 27 tysiač novych aŭto na praciahu hoda. Ale hety pakazčyk pieraadoleli ŭžo pa vynikach pieršych 8 miesiacaŭ.
Niečakanamu rostu prodažaŭ novych aŭto ŭ Biełarusi ŭ pieršuju čarhu spryjajuć zachodnija sankcyi ŭ dačynieńni da pastavak aŭto ź Jeŭropy i ZŠA ŭ Biełarusi. Praz heta BAA davodziłasia ŭžo niekalki razoŭ pierahladać prahnozy na 2024 hod u bok pavieličeńnia.
Novyja prahnozy
Pa vynikach pieršaha kvartała 2024 hoda ŭ BAA prahnazavali, što ŭ 2024 hodzie rynak dasiahnie i, mahčyma, pieravysić 35 000 realizavanych novych aŭtamabilaŭ, ale novyja abmiežavańni prymusili ich znoŭ pierahladzieć prahnozy.
Apošni prahnoz byŭ dniami ahučany na «Motaršou». Ciapier dylery čakajuć, što im udasca realizavać 47-48 tysiač novych aŭto za 2024 hod. A heta bolš, čym u davajennym 2021 hodzie.
Badaj hałoŭnaje adroźnieńnie ad davajennych časoŭ budzie ŭ tym, što ciapier ilvinuju dolu hetych mašyn buduć zajmać kitajskija brendy.
Nahadajem, što novy pakiet sankcyj, jaki pracuje ad 1 lipienia 2024 hoda, zabaraniŭ ekspart ź Jeŭrasajuza mašyn z abjomam ruchavika, bolšym za 1,9 litra, hibrydaŭ, elektramabilaŭ i lubych aŭto, daražejšych za 50 tysiač jeŭra ŭ Biełaruś.
Ciapier čytajuć
Danyja pakupnikoŭ upryhožańniaŭ Belaruskicry mahli trapić u ruki siłavikoŭ. HUBAZiK pahražaje kryminałkaj za novyja zakazy6
Danyja pakupnikoŭ upryhožańniaŭ Belaruskicry mahli trapić u ruki siłavikoŭ. HUBAZiK pahražaje kryminałkaj za novyja zakazy
«Ludzi, budźcie pilnyja! U takoj situacyi moža apynucca kožny žychar ES!» Hramadzianin Litvy, asudžany ŭ Biełarusi da 13 hadoŭ za «špijanaž», pieradaŭ list z kałonii3939
Kamientary